مدينة الرياض، موطن لـ ٧ مليون نسمة وملايين الزوار الموسميين، أغلبهم يجون لزيارة الأقارب والأحباب، أو لمتابعة المال والإشراف على الأعمال، أو للاستمتاع بالفعاليات والأجواء الشتوية النجدية، أو ان هذي مجرّد أعذار للزوار عشان يجون للرياض ويأكلون من مطاعمهما العريقة والمعاصرة . 

لمطاعم الرياض تاريخ طويل ويحمل قصص مختلفة: قصص ريادة أعمال ناجحة، قصص لنقاط التقاء الحضارات، قصص شهيّة جدًا وفي لستات كلماشي بتقرأها، وتشتهيها، ونتأمل انك تأكلها. 

لستة من كلماشي كانت أول منتجات كلماشي، وهي نشرة دورية تحمل توصيات لمطاعمنا وتجاربنا المفضلة في مدن مملكتنا الحبيبة. في هذي اللستة بنجمّع أبرز ما تكلمنا عنه في لستة من كلماشي، وبيصير منشور سنوي نشارك فيه حصاد السنة، تذكير بسيط: حنّا ما نأخذ اعلانات من المطاعم، كل المحتوى تم بحوكمة عالية مع فريق البحث والتقصي السمين جدًا. 

تكلمنا في لستة من كلماشي عن أكثر من ٢٥٠ مطعم، وكل لستة كانت تتكلم عن نوع معّين من المطاعم. بعد هذي الرحلة الطويلة جانا سؤال: وش هي أكثر المطاعم في الرياض ثباتًا في المستوى حاليًا؟  

في هذي اللستة جمعنا أفضل المطاعم اللي تكلمّنا عنها في لستاتنا السابقة:

تكلّمنا عن ماما نورة كثير في لستاتنا وهذا ما يهم، لأن مهما تكلّمنا عن هذا الصرح العظيم ما يكفي لأنه فخر الرياض وأهلها. ثلاثة معلومات يمكن تهمّك عن ماما نورة: 

١. كل الفواكه الموجودة في ديكورات المحل هيّ ضيافة للزبائن والزوار. 

٢. خلال السنوات الأخيرة تم إضافة ٣ أشياء للمنيو: فطيرة الجبن السايل، أجنحة دجاج مشوية، مشروبات غازية.

٣. في سنة ٢٠٢٣ ماما نورة طلعت من الرياض وراحت الدمام ايضًا. 

كتبنا عن ماما نورة في أول لستة لنا بعنوان ثاني افضل شاورما في الرياض، قلنا عنّه:

"ماما نورة هو مؤسسة عريقة من مؤسسات الرياض، زيّه زيّ معهد الإدارة بالضبط. شاورمتهم الدجاج لذيذة وتوارثناها بين الأجيال. لكن ممكن نقول ان البطل الحقيقي في ماما نورة مب الشاورما، إلا فطيرة الجبن. ليه هذا الصنف توّه قايم من النوم؟ لأنه كل شوي يتمغّط. فطيرة الجبن من ماما نورة هي التعريف الحقيقي لكلمة تماغيط، تقدر تحوّله من أكلة للعبة أولمبية زيّ: أطول تمغيطة جبن بالتاريخ"

هذي أقدم جرّة فول في الرياض.. أبو سالم الله يرحمه هو صاحب المحل واللي كان قائم عليه بنفسه، هذا المحل من أقدم الفوّالين في الرياض وله أكثر من ٥٠ سنة يقدّم فول وشاهي بس. العجيب، والغير متوقّع: هذا خيار مناسب للفيقانز. 

كتبنا عن فوال عبدالله الحاتم في لستتنا بعنوان كيف تصير فيقان وسعيد بالرياض:

"تذكر اذا رحت تأكل هناك انت تأكل تاريخ الرياض، الجرّة هناك غالبًا عمرها أكبر من عمرك"

وحدة من اللستات اللي سويناها كانت بعنوان مطابخ تجمّل بكل عزيمة، ننصحكم تقرون اللستة كاملة، هذيك من اللستات اللي ضمّت عمالقة مطاعم المندي في الرياض زي مكتوم باخلعة ومندي رواف، واخترنا يدخل في هذي اللستة مطعم الكندي للمندي اللي كتبنا عنّه لتوافد السياح من حوالي العالم فيه:

إحصائياً: ٤ من كل ٥ أشخاص عايشين في الرياض يتفقون ان النقاء هو ألذ فلافل وحمّص في الرياض، الخامس واحد ما ذاق حمص النقاء. هذا المطعم سمعته سابقته و خلفه إدارة تحط الجودة العالية والسعر المناسب فوق كل شي، كتبنا عنه في لستة دليل الغافل عن محلات الفلافل:

"ألذ حمص بالرياض، بس مب هذا الشي الوحيد اللي هم الأحسن فيه، عندهم ألذ متبل والأهم من هذا عندهم ألذ صحن فلافل، هم أثبتوا إنهم مطعم محترم وعندهم أصناف لذيذة مختلفة، بس حنّا اللي لازم نعترف فيهم كمطعم وما نسمّيهم حمص"

اللستة اللي تقراها الحين هي وحدة من برامج كلماشي المتنوعة، عندنا برامج مرئية غيرها يمكن تعجبك زي:

مقصود مطعم فنّان بشكل مرعب، عندهم وحدة من ألذ ساندويتشات الشاورما في الرياض، يفوزون بألذ ثوم، ويفوزون بألذ صحن بروستد، تكلّمنا عن البروستد حقه خصيصاً في لستتنا بعنوان ديربي الكوليسترول:

"للأمانة مقصود ما عندهم دجاج مقلي، عندهم بروست. والبروست هو دجاج مقلي بصيغه سعودية خاصة، محيطه مقرمش ولبه طري.. وزيّ هبّات مطاعم ومقاهي الكويت، مقصود يقدّم تجربة السجن لزبائنه ويقدّم هذا البروست على صحن من حديد"

هذا المحل يعتبر من معالم الرياض اللي تمثلها، وهو جزء أساسي من جدول الرياض قديماً:  طبق حلى بقيمة غذائية صفرية، وبدون طعم، إلا إذا قد أكلته وأنت صغيّر. عشان كذا كان ضروري نحطه في لستة كلاسيكيات الرياض:

"صدى التحلية عنده سوفليه من ألذ ما يكون وهو الحلى الرسمي لمواليد الثمانينات في الرياض، تقدر تطلب السوفليه عندهم مع آيسكريم أو بدون.. تقدر تطلبه بأربعة أحجام مختلفة: صغير أو وسط أو كبير، أو الحجم العائلي اللي نتحدّاك تأكله لحالك"

اللي يخلّي مقهى باء عظيم مب الحب اللي منتشر في المكان على هيئة ريحة مخبوزات، ولا طعم الحلويات اللي يجيب الابتسامة لوجهك لا شعورياً، ولا المكان الرايق وجلساتهم الخارجية في الجو الزين، اللي يخلّي هذا المقهى عظيم انه جمعها كلّها، كتبنا عنه في لستة مقاهي الحي ترجعك حي:

"الجو العائلي للمقهى تحس فيه من أول رشفة لكوب القهوة. لا اراديًا بترجّع ظهرك وراء، تحط رجولك على الطاولة وتقعد كأنك قاعد في صالة بيتكم. للمقهى إطلالة ساحرة على وادي حنيفة، وهو مكان خلّاب تنهي فيه رحلة مشي طويلة أو تبدأها هناك خاصة بأجواء ديسمبر البديعة"

فرن أبو جمعة عملة نادرة في الرياض، وين تلقى مطعم يبيع لك فطاير لذيذة جداً وبأسعار تبدا من ١.١٥ ريال؟ فطاير أبو جمعة هيّ نقطة توقف ممتعة في شارع العطايف التاريخي بمدينة الرياض، تكلمنا عنه أكثر في لستتنا بعنوانكلمة تسعدك: فطاير. كتبنا عن فرن أبو جمعة:

"تعودوا كثير من أهالي الرياض يسافرون سفر لين ما يوصلون لشارع العطايف، إذا مب عشان فطايرهم اللذيذة، عشان شاهي الضيافة اللي يحضرونه داخل فرن الفطاير في الفرع. قد سمعت بشاهي فرن؟"

حبيبة اسم على مسمّى، هي فعلاً حبيبة على قلوبنا ولها مكانتها الخاصة في القلب، زي ما كنافتهم لها مكانها الخاص في المعدة مهما كنت شبعان، فرعه في حي السليمانية يعتبر أحلى قفلة لليالي الرياض، وكتبنا عنه في لستة الرياض عاصمة الحلويات الشرقية:

"كنافة حبيبة الناعمة بالجبن هي إثبات واضح وفاضح ان البشرية ضعيفة، مهما كان خطتك الصحية وحميتك الغذائية بتنكسر قدام أول صبّة شيرة على هذي الكنافة"

فاصل: كلماشي نقوا السليمانية! وقاعدين نبحث على تي بوي يساعدنا في المكتب، ولذلك انطلقنا بمساعدة نجمنا الطبّاخ غير الماهر فريس من برنامج مطبخ فريس في رحلة بحث عن التي بوي هناك: تعرف أحد؟ ساعدنا! 

هذا المحل الجديد نسبيًا صار واحد من أهم محلات الآيسكريم في الرياض، إتنا أرتيزان جيلاتو بدّع في دمج الجيلاتو الإيطالي مع النكهات السعودية زي اللوز الطايفي أو مانجا جازان، كتبنا عنه في لستة كيف تاكل ثلاجة بالصيف:

"هذا المحل عليه نقاش واسع، هل يعتبر محل جيلاتو ولا محل يبيع مواد غذائية بالجملة؟ مثال: لمّا تطلب منّه نكهة الفستق فأنت بتاكل فستق حقيقي بدون أي وسيط.. إتنا صار محطّة رسمية لزوّار الرياض وأهاليها، يبرد عليهم داخليًا ويثلج صدورهم"

ما تقدر تتكلم عن شهر رمضان المبارك في مدينة الرياض بدون ما تجيب طاري العجينة الهشة لسمبوسة مطعم غوّار. برّا شهر رمضان تقدر تأكل فول، مطبق، وأشياء كثير منه، بس في نهاية شهر شعبان تبدأ الطوابير تزدحم في هذا المطعم عشان كذا حطّيناه في لستتنا بعنوان رمضان شهر ما تطلب فيه من المطاعم:

"تزامنًا مع زحمة المطعم الموسمية تلقى بياعين السوبيا والهريسة موجودين على الرصيف المقابل لطابور غوّار الطويل اللي يتوقف عن إدخال الزبائن في شهر رمضان ويكتفي انه يخدمهم عبر الشبابيك الكبيرة.لكن هل عجينته فعلًا مميزة؟ وسمبوسته لذيذة؟ الجواب سهل: رح له وشغّل ثلاث حواس عندك: اسمع قرمشته، ذق طعمه، وشف لمعته. 

رأينا حنا: ما قرمشت سمبوسة في رمضان قد ما تقرمشت سمبوسة غوّار"

كبدة فهد مطعم تقدر تعتمد عليه، تروح له اليوم أو تروح له بعد سنتين دامك تشوف أبو خالد في المحل اعرف ان الكبدة بتجيك طازجة بدون ولا غلطة، كتبنا عنه في لستتنا بعنوان افطر في بوفية ما تسوي نفسها بوفية:

"من ٢٥ سنة ما تغيّرت كبدة الحاشي عندهم، والعم فهد، أو أبو خالد، صاحب المطعم موجود ويساعد الزبائن بنفسه ويحرص كل الحرص على رضاهم. تلقاه هناك من الفجر حتى الظهر يوميًا يشرف على المطعم"

مطاعم الأفراح من المطاعم اللي تميزت هذي السنة مع تجديداتهم للفروع، صار عندهم تطبيق! لقوا التوازن المثالي بين المحل اللي يفتح النفس بتصميمه ونظافته وبين أكل البوفيات اللذيذ، كتبنا عنه في لستة مين المسؤول عن الفول:

"كلنا في كلماشي محبين للقلابة بشكل عام مثل أي شخص تربى على الفول في الرياض لكن الجرة في الأفراح معروفين فيها وتستحق الشهرة بجدارة، وعندهم طلبات أخرى متألقة زي الصنعاني: اللي هو عبارة عن فول مخلوط مع بيض مقلي و تقدر تضيف معاه جبن ابيض أو جبن شيدر.. ننصح بالجبن الأبيض مع تميس البسكوت"

فيه شي اسمه بخاري وفيه شي اسمه بخاري سمرقندي، هذا المطعم بيخرّب عليك مطاعم البخاري اللي كنت تحبها بعد ما تجرب رزهم الذهبي النثري ودجاجهم المقمّر بالدرجة المثالية، كتبنا عنه في لستتنا بعنوان وشلون تاكل وليمة بأقل من ٣٠ ريال:

"في بلاد ما وراء النهر تقع مدينة سمرقند اللي يقول عنها الأديب أمين معلوف انها "أجمل وجه أدارته الأرض يومًا نحو الشمس"، وحنا نقول ان أزين صحن بخاري أدارته الأرض يومًا نحو الشمس هو صحن بخاري من مطعم سمرقندي"

حي السويدي من الأحياء المميزة في الرياض وله مطاعمه وبوفياته المعروفة، زي اللي في منطقة شبرا وشارع التسالي، بس لو فيه مطعم واحد يدخل قائمة أفضل المطاعم في الرياض فهو بيكون مطعم أماسي الديوان اللي كتبنا عنه في لستة الرياض تعرف تاكل سندويتشة: