كلمة تسعدك: فطاير

تاريخ النشر 2022-12-22

اللغة العربية فيها ١٢،٦٩٩،٠٠٠ كلمة، لكن فيه كلمة واحدة مستحيل تستخدم في سياق سيء. وشّي؟  فطاير. بكل أنواعها، فطاير مدورة، فطاير شامية، فطاير عزيمة. كلها تسعدك وتونّسك وتشبّعك.. بس للأمانة في جملة وحده فيها فطاير وتزعّل: الفطاير خلصت. 

عشان ما تخلّص عليك الفطاير، جمّعنا لك لستة من ألذ مطاعم ومخابز الفطاير بالرياض. 

بس قبلها، من وين جتنا الفطاير؟ يقولون انه قبل ٦٠٠٠ سنة خلط المصريين القدامى العسل والمكسرات مع القمح، وفيه ناس يقولون إن الإغريق هم اللي بدأوها لكن حنّا ما نعرف تاريخها الدقيق.. بس نعرف انه تاريخها مليان دقيق.


المطعم الأول

فرن أبو جمعة

في شارع العطايف سنة ١٩٨١ تأسس هذا المخبز اللي اليوم توارثوه ثلاث أجيال، أولهم كان أبو جمعة عرّاب الفطاير في الرياض، وبعد وفاته الله يرحمه ويغفر له استلم ابنه جمعة، أبو زهير، هذي المهمة. 

أبو زهير كمّل على نفس نسق أبو جمعة ويقدمون فطاير قوارب صغيرة بشكلها السوري المميز، تقدر تطلب من عندهم أنواع مختلفة من الفطاير وتحدد كمية حشوتها على كيف كيفك. 

تعودوا كثير من أهالي الرياض يسافرون سفر لين ما يوصلون لشارع العطايف، إذا مب عشان فطايرهم اللذيذة، عشان شاهي الضيافة اللي يحضرونه داخل فرن الفطاير في الفرع. قد سمعت بشاهي فرن؟ 


المطعم الثاني

مذاقات خفيفة

شف لوحته، ركّز فيها، هل هذا مطعم يحاول يبهرك؟ الإجابة لا. لكن فطايرهم مبهرة. وهذا يعطي درس مهم لكل أصحاب المطاعم: لا تتفذلك بالبراند والهوية والصور والخرابيط ذي، تبي مطعمك ينجح؟ سوّ أكل لذيذ. 

مطعم مذاقات خفيفة هو محل ثلاثي الأضلاع، وشلون محل ثلاثي الإضلاع؟ يقدمون ثلاث وجبات خفيفة ولذيذة على اسمهم: شاورما، بيتزا وفطاير. في يومهم الكويّس حنّا نقول انه عندهم ألذ فطيرة سبانخ بالرياض. 


المطعم الثالث

فرن زاد

رابح صقر فنان كبير، بس وين يأكل فطاير في الرياض؟ يقول لنا مُساعد معلم الفطاير في فرن زاد الأستاذ سالم انه عيال رابح: صقر ووليد دايمًا يجون عنده ويجيبون لأبوهم فطاير من فرن زاد، أبو صقر يحب فطيرة المحمرة جدًا، بس يجي في بالنا سؤال: هل يأكل حبّه ولا حبتين؟ 

سالم له ١١ سنة يشتغل جنبًا لجنب معلم الفطاير احسان، ويوصف الشغل في فرن زاد انه حريقة، طبعًا يقصد عدد الزبائن وكمية الفطاير اللي تطلع من مطعمهم الصغير في حيّ المحمدية وتغذي موظفين عدّة في الوزارات المقاربة لهم وفي المدينة الرقمية. 


المطعم الرابع

مخابز الكعكي

تعرف ان العام الدراسي بدأ لمّا تشوف طابور طويل من الأمهات قدام هذا المخبز. الأمهات هكّروا الفطور المدرسي لأطفالهم و جابوه من مخابز الكعكي لأن فطايرهم مثل فطاير الأمهات.

عائلة الكعكي من مكة المكرمة، ويقربون لهم من بعيد مخابز الكعكي المشهورة في المدينة المنورة ومكة، لكنهم شركات مختلفات. 

مخابز الكعكي هذي في السليمانية هي من أول محلّات الفطاير في الرياض، و بتلاحظ انك اذا دخلت جوّا المكان مب قديم، المكان حديث ومجدد ويبدعون في فطايرهم مثل فطيرة السبانخ، الفطيرة المفضلة عند فريس، الطباخ غير الماهر. شفت حلقة كبمارو؟ 


المطاعم الخامس

سحائب طيبة

في معركة السليمانية الكبرى للفطائر الشامية بتلقى هالمحل مع غريمه التقليدي وخصيمه وجاره الجدار بالجدار فطائر البرج، حنّا فضلنا سحائب طيبة عشان أبو قاسم، وهو شيف بنجالديشي الجنسية عاش حياة طويلة متعلقة بالفطاير. بدأ مسيرته مع غريم سحائب طيبة فطاير البرج، وبعدها راح لفندق الانتركونتنتال في عمّان الأردن ثم جاء يشتغل في سحائب طيّبة وطوّر معهم خلطة دبس الرمان. 

سحائب طيبة عندهم ألذ فطيرة عكّاوي بالرياض يستخدمون فيها نوعين من الجبنة، جبنة بلدية وجبنة تشيكية. 


المطعم السادس

نسائم طيّبة

أهالي الرياض مفروض يعرفون اسم هذي المدينة في سوريا: النبك. لأنها مهمة جدًا لفطايرنا. مثل مطعم سحائب طيبة، مطعم نسائم طيّبة في الصناعية القديمة يشتغل ويقدم الفطيرة النبكية الأصيلة، المطعمين اللي عندنا كلهم نسخ لذيذة من مطعم استراحة طيبة في النبك، سوريا. 

تأسس نسائم طيبة في سنة ٢٠٠٢، وبوسط زحمة الصناعية وازعاجها بتلقى السكينة داخل هذا المطعم بشكله الهندسي المثير. 

العجينة لعبتهم، يخمرونها بحرفية عالية، ويعاملونها بصبر ولطف عشان تعطينا قرمشة ولذاذة لا يعلى عليها. 


شارك هذي اللستة

التعليقات


فطيرة الدمشقيه بالملز اهم شيييي وينها

قبل عام واحد - Kenda

ركن الفطيرة البسيطة في الدرعية قدم مفهوم جديد للقوارب من بين كل مطاعم فطاير الدرعية .. ويفتح من الصبح ويوصل ويشتغل بكميات كبيرة

قبل عام واحد - الدرعية

وتنور الفطيرة الدمشقية؟؟؟ الذ فطاير بالرياض

قبل عام واحد - احب الفطاير

تعجبني مدونتك واسهابك في طرحك العفوي الجميل ولكن لي ملاحظة عتب مني لمحل يقدم أشهى الفطاير من التسعينات الهجرية وقد يكون سقط سهوا منك .... ارجوا التواصل لنتشرف بزيارتك 0555202435

قبل عام واحد - صالح آل عوض
عطنا رأيك

تبي تقرأ لستات ثانية؟

الرياض تحب البروست

لستة التجهيزات الرمضانية

يا حلوك في رمضان