وش ألذ كورة بالكورة الأرضية؟ تغشيشة: تجيك مقلية بعض الناس يسمونها طعمية وهي أكلة عالمية. الإجابة: فلافل

ميزة الفلافل إنك تقدر تاكلها بأي طريقة: صحن، ساندويتش، حبات. 

عشان كذا صعب تلقى أحد ما يحب الفلافل. وكل واحد وعنده إضافاته المفضلة لها وتقدر تحلل شخصيته منها: واحد يحب الباذنجان؟ هذا شخص ناضج. واحد يحب الكتشب؟ هذا عالة على البشرية.

في لستة دليل الغافل عن محلات الفلافل بنذكر لكم ٥ محلات فلافل وطعمية في الرياض، بعضها جديدة وبعضها قديمة بس نضمن لكم إن كلها لذيذة. حنا ما نمزح في الفلافل، نأخذ الموضوع بشكل جدّي، لدرجة إننا نعرف أبعاد الصبة بالتفصيل: طولها ١٩.٦٩ سم، ارتفاعها ٥.٠٩، الوزن ٠.٨٧. ومرجعنا لهذي البيانات هو أفضل صفحة فيك يا ويكيبيديا: صفحة الصبّة

الصفحة هي مرجع ممتاز للأكلة الشوارعية اللي تتميز فيها مدينة الرياض: الصبّة. فيها معلومات مختلفة ومراجع رهيبة زي مقالة أحمد الهليل اللي بعنوان: أكل الفلافل صبة صبة.

نتمنى هذي اللستة برضو تكون مرجع ممتاز للفلافل خاصة انها لستة رقم ٥٠، هذي اللستة غالية علينا لأنها تعلمنا اننا صار لنا أكثر من سنة نمدح لكم مطاعم ومقاهي الرياض، لكن جا وقت الإجازة الصيفية، وفريقنا بيصيف في عسير والطايف عشان كذا اللستات بشكلها الحالي بتوقف لمدة شهر وراجعين مع رجعة المدارس.

مطعم النقاء من أشهر المطاعم الشعبية في الرياض، بس محد يسميه باسمه الأصلي كل أهل الرياض يسمونه حمص النقاء لأن عندهم ألذ حمص بالرياض، بس مب هذا الشي الوحيد اللي هم الأحسن فيه، عندهم ألذ متبل والأهم من هذا عندهم ألذ صحن فلافل، هم أثبتوا إنهم مطعم محترم وعندهم أصناف لذيذة مختلفة، بس حنّا اللي لازم نعترف فيهم كمطعم وما نسمّيهم حمص.

النقاء عنده ٥ فروع بس مب كلها زي بعض، فرع الصناعية القديمة مثلًا ما يقدمون فلافل، وفرع الملز مختلف عن باقي الفروع ويتميز بمديره الرهيب محمد الفقيه اللي يعتبرونه زباين المحل المعتادين صديقهم.

بتلاحظ في فرع الملز إنه يقدم صحن فلافل فقط وما يقدم صبّة، هم عندهم كل المكونات اللي تحتاجها للصبّة بس ما يسوونها، ليش؟ لأن هذا المطعم دائمًا مزدحم من أول ما يفتح أبوابه بعد الفجر لين ما يسكّر الظهر، يعني ما عندهم وقت يلفون صبّتك.

مطعم الوردة الشامية محل فطور شامي/سوري في حي العزيزية، يميّزهم معلمهم الرهيب اللي له ١٥ سنة يشتغل هناك وفنانين بالفلافل والحمّص والأكلات الشامية، متأكدين لو استخدموا الاسم الإنجليزي للمحل (روز ليفانتين) كان صاروا من أشهر المحلّات في الرياض.

إذا دخلت المحل بتلاحظ الجدار بالزخارف الشامية والطابع القديم للمحل بس أول شي بتلاحظه عينك هي النافورة اللي وسط الجلسات، للأسف إنها نافورة موية مب طحينة، وإذا شفت طلباتهم عندهم شي اسمه صبّة شامية هذي صبّة بنفس المكونات المعتادة بس فيها ٧ حبّات فلافل، لذيذة!

الوردة الشامية مطعم شامي ويقدم فلافل مب طعمية، وفي الفقرة الجاية بنشرح ليش:

أشهر شي عندنا في السعودية هي الفلافل، هي اللي تاكلها دائمًا في المحلات وتطلبها صبّة أو صحن مع الحمّص والطحينة والمخللات وتشبّه فيها شعر خويك، بس في نفس الوقت نعرف كلمة (طعمية) وممكن تعتقد إنها اسم الفلافل في مصر، لكن في الواقع فيه اختلافات ثانية غير الاسم بين الفلافل الشامية والطعمية المصرية:

أكلة شامية وهي من أشهر الأكلات اللي ارتبطت بالشرق الأوسط، لو تسأل برازيلي عن الأكلات الشرق أوسطية غالبًا بيعرف ثنتين: الشاورما والفلافل، الفلافل تكون مصنوعة من الحمّص المطحون مخلوط مع البهارات والخضار المفروم زي الكزبرة والبقدونس والثوم والبصل.

أكلة مصرية وتشبه الفلافل شبه كبير مع اختلافات بسيطة، زي إن الطعمية تكون مصنوعة من الفول المطحون بدال الحمّص، وبينما الفلافل اللي نعرفها يصير شكلها كروي، الطعمية المصرية في العادة تكون على شكل قرص، ومرصّعة من برا بحبّات سمسم. وقد تكون الطعمية هي عيارتك في المتوسط إذا كان لون بشرتك بيضاء.

ركن البشوات مطعم مصري رهيب بتشوف عنده مثال مثالي للطعمية المصرية اللي تكلمنا عنها في الفقرة اللي قبل، 

من ٢٠٠٨ وهذا المطعم يقدّم الفطور الملكي للبشوات المستعجلين عشان يلحقون على بداية دوامهم الحكومي الساعة ٨ الصبح بحي المربّع.

في وسط هذي الزحمة من الموظفين بتشوف الشيف أيمن -ملك البشوات كلهم-  يجهّز طلبك وطلب ١٠ غيرك وهو في قمة الروقان ويقابل الناس بكلام حلو ويرمي نكت هنا وهناك على السريع، تحس وقتها للحظة إنك تفطر في مطعم عند مسجد الحسين في القاهرة.

صحن الطعمية عندهم غير تمامًا، يجيك طعمية مع ١١ طلب جانبي تقريبًا من الأطباق المصرية، زي المِش والعقّة والبدنقان، وكل هذا بـ ١٠ ريال بس.

دام مطعم فلافل مختلف شوي، من مطاعم الفلافل الجديدة وفكرته تكون فروعه مخصصة لطلبات التوصيل أو تقدر تروح له وتطلب سفري، هذا التوجه المختلف مع اهتمامه بالطعم والجودة خلاه يكتسح السوق بشكل سريع وينفع خصوصًا تطلبه في الدوام إذا اشتهيت فلافل.

أفضل طلب عندهم واللي ننصح فيه هو ساندوتش عربي هولندا، تجيك في خبز عربي مخبوز عندهم في المحل وتختار الإضافات اللي تبيها، ميزتهم هي كثرة الإضافات، مافي شي ينفع مع الفلافل إلا وتلقاه عندهم من ضمن الإضافات، أهم شي لا تنسى الشطة الخضراء اللذيذة حقتهم، واطلب الفلافل مع الزهرة المقلية.

ما ندري مين هو عمّو عز، بس نحب نشكره من هذا المنبر على مطعمه الأسطوري، لو شفناه في المحل شكرناه مباشرة بس شفنا معلّم رهيب اسمه العم روني وهو بنجلاديشي الجنسية، والمعلم روني عنده خلطة ساندوتش فلافل اسكندر خطيرة. نص خبزة مفرودة صغيرة و نحيفة، مع بطاطس مقلية لذيذة وبطاطس شبس تقرمش.

الفرق عندهم بين الإسكندر والفلافل العادية هو إنهم يحضرون في سندويتشة الإسكندر قطع بيض مقلي مدورة محضرة بصاجية كهربائية تشبه حقت الميني بانكيك، لا تنسى تطلبها مع طحينة طبعًا. والأهم الأهم، الخلطة الخضراء الحارة اللي تجمع كل شي مع بعض وتخليه من ألذ سندوتشات الفلافل الخفيّة بالرياض. 

هذي كانت نهاية لستة ٥٠: دليل الغافل عن محلات الفلافل، مع العلم إن فيه محلات فلافل رهيبة ومعروفة ما ذكرناها في هذي اللستة لأننا ذكرناها في لستات سابقة، أبرزهم فلافل عرفه تكلمنا عنه في لستة ٢١: كلاسيكيات الرياض. وركن عدنان في لستة ١٣: الرياض تعرف تاكل سندويتشة. إذا ما تعرفها اترك كل شي ورح اعرف عنها الحين.