السحور قرار صعب، بس لازم تتخذه. تتسحر خفيف؟ وارد. تستحر ثقيل؟ ممكن. بس الأكيد: لازم تتسحّر. وش تتسحّر؟ 

في هذي اللستة خمس مطاعم نقترحها سحورك الجاي في مدينة الرياض، ومعلومات عنهم ومعلومات عامة غير مفيدة. 

هذي لستة ٤١ ، وهي آخر لستة قبل ما تتوقّف لستة من كلماشي مؤقتًا حتى عيد الفطر، اللي على طاريه ودنا نأخذ ميدالية ذهبية في سباق التهاني ونتمنى لكم عيد فطر مبارك. وترانا بنجهّزكم للكم الهائل من المناسبات الإجتماعية القادمة بعودة سلسلتنا السنوية سوالف معلبة. كملت سنة! 

وبما اننا كمّلنا سنة: إذا تبي تعرف تحديثات أكثر عن أعمالنا الأخرى، وتكتب رسالة تهنئة عيد في شريط المحادثة أعلى الصفحة زور صفحتنا في باتريون، عشان نبدأ نستعملها ونحط فيها حصريات من برامجنا الجديدة زي اختبار سري الخالد، مطبخ فريس الطباخ غير الماهر وأكلات شعبية مع أم عبدالعزيز. 

احصائيًا تنولد كل دجاجة قلقانة في هذا العالم الجميل، ليه؟ لأن فيه احتمالية تتحوّل لساندويتش دجاج مظبي من هذا المطعم. 

وشو ساندويتش المظبي؟ هذا اختراع جديد في مطعم مظبيكم، وهو مطعم مظبي غير تقليدي بدأ في مدينة أبها سنة ٢٠٠٦ وتوسّع لكامل أنحاء المملكة تحت مهمة انه يقدّم شيء مختلف زيّ ساندويتشات المظبي. 

ساندويتشات المظبي تقدّم عندهم بخبزة صمونة عربية مع الجرجير والرمان وصلصة الطحينة، أو بخبز الباغيت الفرنسي مع خلطة فرنسية.. وغير الساندويتشات وأطباق المظبي اللذيذة اللي تقدم مع رز المندي أو رز الشعبي عندهم طبق المصقعة الجانبي اللي عليه طلب كثير.

حريصين على شعارهم التسويقي: شيء مختلف، ويحبون يكررونه في كل مكان، برأينا ان طريقة معاملتهم للشعار شيء مختلف بحد ذاته. 

في شمال الرياض الجديد وتحديدًا بحي العارض هذا المقهى يتميز بجوّ خاص فيه، صاحبة المقهى هيّ هدى عافش اللي فتحت مقهى جدن لتقديم المشروبات سنة ٢٠٢٠ بعد الكورونا مباشرة، صاحبة المقهى هي نفسها عاملة المقهى الوحيدة، تحضّرأنواع مختلفة من المشروبات والعصاير وتوفّر منتجات عضوية وتحوّل زبائن المطعم لأصدقاء ابديين لها بطاقتها الجميلة. 

عندهم قهوة هولندية لذيذة عبارة عن حليب مع ثلج القهوة.. ايه نعم، ثلج القهوة. 

طيب وشو السحور؟ غيّر يوم من الأيام وتسحّر سموذي، بس مب سموذي تشربه سموذي تأكله. صحون السموذي في مقهى جدن منوّعة ومختلفة واللي عجبنا منها هو سموذي الشوفان مع التمر وزبدة الفول السوداني مع العسل، طبق فيه كمّية طاقة حرارية تكفّيك شهر رمضان كامل وطاقة إيجابية من المحل تكفيك سنة هجرية كاملة. 

تتسحّر سموذي؟ انقلبت الدنيا، عشان كذا نقترح لك تتسحّر مقلوبة. هذا المطعم المتكامل بدأ من فكرة علبة تغليف طعام للوجبة الشعبية الشهيرة المقلوبة وتحوّل لمطعم يقدّم كل أنواع الرز، بس لازم يقلبهم. عنده مربّين، وعنده برياني، ومجبوس وأنواع مختلفة من المقبلات. بس لا تفوتك المقلوبة. ليه؟ لأن يحيا الباذنجان. 

مقلوبة هم أول من أبدع في طريقة تقديم أطباق الرز وخلّاه ينفع للأكل في أي وقت وأي زمان لأنه يجيك بعبوة مرتبة فيها صحن الأكل مع صحن ثاني تقلبه عليه وكل شي ثاني تحتاجه من ملاعق وسفرة وغيرها بس إذا فتحته لا تصير ظريف زي واحد من موظفينا وتشيله بالمقلوب، هذا موب آيسكريم ديري كوين، ترا بتاكل سحورك على الزفلت.

الاستمرارية جيّدة، لو كنّا نعامل باقي أمور حياتنا مثل انضباطنا في أننا نتسحّر بخاري في كل رمضان قد مرّ كان تحققت أشياء كثير. بس في رمضان السنة هذي من أي بخاري تتسحر؟ 

عندنا لك خيار صالح، صالحة للبخاري.. في فرعه الأول عندهم نص دجاجة على الفحم مع لبن القرية تخليك تفكر كثيرًا أنت ليه ما تأكل بخاري كل يوم؟ ثم إذا خلّصت حلّي على حلا جندول، بما إنه قاط معه باللوحة. 

المطعم هو مطعم تقليدي قديم عندهم أنواع مختلفة من المشويات والإيدامات واللحوم والسلطات، لكن ما ننصحك تأكل لحم هناك، ننصحك تأكل لحم من المطعم الخامس.

هذا المطعم من المطاعم اللي يفتخر فيها شرق الرياض، مطعم كبير له فرعين كلها شرق مدينتنا الحبيبة، ويقدّم الأكلة الوطنية الكبسة الحمراء مع لحم الحاشي، لحم الحاشي مفيد على سحور لأنه غني بالألياف اللي تزيد الشعور بالشبع بدون زيادة الوزن. 

الكبسة مفروض تنطبخ بالبيت، بس إذا ما تعرف تطبخها، والوالدة مب فاضية لك، وش الوضع؟ رح كبسات، أو خله هو يجيك مع برامج التوصيل وإذا كنت تعرف مطعم كبسات من قبل تراه تطوّر! صار عنده كبسة بيضاء تقدر تطلبها فقط قبل استلامك لها بساعة.

اضغط هنا ارسل لنا إيميل!