الأسبوع الجاي يهلّ علينا هلال رمضان، ويجيب معه بركته وسماحته وسمبوسته ولقيماته..

هنا شوارع الرياض ما تستوعب بالعادة أن رمضان دخل، لكنه بلا شك يدخل بيوتنا عبر زينته وسفرته ومسلسلاته.

نظرة وحدة في فريزركم تقول لكم انكم بتطبخون.. يعني: رمضان شهر ما تطلب فيه من المطاعم. 

بس إذا تحتاج تطلب، إذا مالك خلق تطبخ، أو إذا بتدعم المطاعم في شهرهم الصعب فهذي

خمسة أطباق تطلبها تكمّل سفرتكم الرمضانية من مطاعم الرياض

رمضان مب شهر كريم بس، شهر كريم وحلو بعد.
مصنع المذاق العربي للحلويّات بدأ من ثمانينات القرن العشرين، واليوم من رحم المصنع هذا طلع لنا 

براند غالبًا كل خالاتك يعرفونه: فهده سويت. 

صحون فهده سويت كملوا على إبداع مصنع المذاق العربي، أطباق حلاهم الموزون يزيد من مرارة قهوتكم، وكأنه الحلى والقهوة يتسابقون على رضاك. البديل العصري الحصري للتمر. على طاري التمر.. لستة التمر من كلماشي جايّة بعد العيد. 

الطبق الثاني طبق أهل الرياض مهوسين فيه بطريقة غريبة.. سمبوسة غوّار، اللي تنباع عجينتها في كل مكان وجاهزة في مطعمهم في شارع جرير في حي الملز. 

رغم ان المطعم موجود على شارع باتجاه سير واحد، إلا ان الناس يمشون بكل اتجاه قدام هذا المطعم، غالبًا يبحثون عن بداية الطابور.

تزامنًا مع زحمة المطعم الموسمية تلقى بياعين السوبيا والهريسة موجودين على الرصيف المقابل لطابور غوّار الطويل اللي يتوقف عن إدخال الزبائن في شهر رمضان ويكتفي انه يخدمهم عبر الشبابيك الكبيرة.

لكن هل عجينته فعلًا مميزة؟ وسمبوسته لذيذة؟ الجواب سهل: رح له وشغّل ثلاث حواس عندك: اسمع قرمشته، ذق طعمه، وشف لمعته. 

رأينا حنا: 

ما قرمشت سمبوسة في رمضان قد ما تقرمشت سمبوسة غوّار.

المنتو طبق ما كان شائع بالرياض، لكنه اليوم متوفر في محلات عديدة أبرزها هو مطعمنا الحجازي المفضل عمدة المنتو.

وللطبق هذا تؤام طبق ثاني دايمًا يقعد جنبه: طبق اليغمش والفرموزا والبُف ـات بكافة أنواعها.

هذا المطعم مثل كل المطاعم الثانية يطبخ المنتو على البخار، لكن اللي يميزه صدق انه بعد أول لقمة من المنتو حقه فمّك بيتحوّل لزحليقة وبتزحلق كل ما يليك. 

ابو سالم صاحب ومدير المطعم يشرف على المطعم يوميًا

ويوم كلمناه عرفنا وعده لزباين المطعم:  

كل شي في هذا المطعم طازج، وبيفضل طول عمره طازج. 

اللي يعرف أيّ شيء عن اللي كتب هذي اللستة، بيعرف انه يتحدى كل أمهات السعودية بالقيمات أمه، لكنه تفاجئ في رمضان الماضي انه امه ما سوّت لقيمات في كل فطور. كيف؟ 

بسيطة، أمه اكتشفت لقيمات أم تركي فود ترك لطيف موجود شمال الرياض

لقيمات أم تركي هي فود ترك موسمي تلقاه بالعادة في شمال الرياض، واللقيمات نفسها هي وحده من ألذ لقيمات الرياض، عقود من اللؤلؤ المذهب مغطسة بشيرة أم تركي مسويتها بنفسها، إذا ذقت منها بتقول في قلبك: 

يا أم تركي، ليتني تركي.

الطبق الخامس والأخير ينباع في مطعم ميرلاند في الملز

مطعم مشويات ومأكولات شرقية طبيعي لكن الغريب فيه انك اوّل ما تدخل عليه بتتصل على نجم. ليه؟ 

لأنه بيصدمك بالـ كبّة حقته. 

كبّة اللحم عندهم هي إثبات على ان المقالي في رمضان هي سيّدة الموقف، وكبّتهم هذي ما تنوكل وبس: تنبلع، تنشفط، تسنتشق، وتندفن في معدة سعيدة جدًا بموسم رمضان. 

عسى معدتكم تدوم سعيدة، في رمضان وغيره، وعسى الشهر الفضيل زيّ ما يليّن قلوبكم يليّن فطايركم ومخداتكم، بدون تخمة وأرق. 

إذا عجبتكم اللستة لو سمحتوا شاركوها للناس اللي حولكم، وانتظروا لستتنا الجاية: سحور ما يعطش في رمضان.