التضخم وارتفاع الأسعار هو واقع حقيقي يواجه الكرة الأرضية كاملة، سعر الحليب الطازج زاد ١٥٪ في الولايات المتحدة، وسعر الدجاجة في نيوزيلندا زادت ١٠٪، وفي دولة جنوب أفريقيا.. اللي تقع في جنوب أفريقيا، زاد سعر اللحوم ٩.٥٪. 

 ورغم أن الرياض ما هي مدينة ساحلية، إلا انه موجة الغلاء هذي بلا شك وصلتها. عشان كذا جهزنالكم هذي اللستة، فيها خمس مطاعم تقدر تقدم لك وجبة مشبعة ولذيذة. 

قبل لا نبدأ اللستة، تدري وش سوينا في إجازة عيد الاضحى؟ رحنا سألنا الناس في حديقة عامة بحيّ المروج عن معلومات عامة، اسئلة زيّ: ليه الحمار وحشي حيوان قديم ووش يصير بالبيضة إذا طاحت بالموية. تبي تشوفها؟ تابعنا على تكتوك!

في بلاد ما وراء النهر تقع مدينة سمرقند اللي يقول عنها الأديب أمين معلوف انها "أجمل وجه أدارته الأرض يومًا نحو الشمس"، وحنا نقول ان أزين صحن بخاري ادارته الأرض يومًا نحو الشمس هو صحن بخاري من مطعم سمرقندي.  له أكثر من ٥٠ سنة يقدم وجبة البخاري لأهالي الرياض، هذا المطعم تغيّرت اسعارة كثير، لكن مازال رغم الارتفاع الأخير الغداء في سمرقندي يعتبر صفقة مربحة للجميع، لك، ولهم. بـ ١٨ ريال تأخذ: نص دجاجة، حبّة خبز أفغاني، جرجير، ليمونة، حمص، ورز بخاري. أنت كسبان، سمرقندي كسبان، وبطنك شبعان. 

لمطعم الزلال ثلاثة فروع في الرياض، وأكثر من ٣٠ سنة وهو يقدم وجبة غداء رخيصة نسبيًا لرواده من محبين المأكولات الهندية والباكستانية، يقدمون عندهم خيارات متنوعة من أكلات شبه القارة الهندية زي الكراهي، والقورما، والدجاج الجلفريزي.. أسامي الأطباق هذي يمكن تكون غريبة عليك بس أول ما تذوقها بتحس بحنين اتجاها، وكأن جدتك كان تطبخها لك يوميًا.

تقدر تطلب رز برياني بـ ٨ ريال مع ربع دجاجة تكّا بـ ٩ ريال أو لحم كراهي بـ ٢٢ ريال، وإذا تبي تحلّى جرب الكهير وهو مهلبية بنسختها الهندية. 

في اقتراحنا الثالث بنثقّل عليك شوي بالمشاوير، نبيك تروح أولًا لمطعم تشيليز وغالبًا انت تتسائل: وش فيه شيء بتشيليز قيمته أقل من ٣٠ ريال؟ الإجابة بسيطة: شوربة! تشيليز يبيعون طبق اسمه طبق الشيلي أو تيرلنجوا تشيلي، وهو لحم مفروم مع طماط وبصل وجبنة،  هذا الطبق تشيليز يعتبرونه شوربة ويبيعونه بـ ٢٨ ريال.. لكن بالنسبة لأي شخص طبيعي، بحجم معده طبيعي، يقدر يصير طبق متكامل اذا جاء معه خبزة تميس بريال. نوعدك المطعم الجاي يصير مشوار واحد بس. 

أهل المدينة المنورة اضافوا لنا كثير في حياتنا، غير الطمأنينة وراحة البال اللي تجي لنا بعد ما نزور مدينتهم المباركة، فهم أثروا المشهد الغذائي بالرياض ايضًا، مب بس بالشاهي المنعنع، برضو باللي نأكله مع الشاهي المنعنع: المطبق! سلسلة مطاعم ألفت حلواني بدأت من المدينة المنورة وانتشرت حوالين المملكة، في الرياض عندهم فرع واحد في الشفا يقدم من أفضل أطباق المطبق بالرياض. هذا المطعم سعر المطبق عنده أغلى من المعتاد، بس لو تطلب منه بتعرف مباشره ليه، المطبق عنده راهي وكبير. مثال: بالعادة صحن المطبق الواحد يقسّم لتسع قطع، هذا المطعم يقسّم المطبق حقّه لـ ١٦ قطعة. 

بثلاثين ريال تقدر تطلب مطبق لحم، مطبق خضار، ومطبق قشطة مع الموز تحلّي عليها بعد الوليمة هذي. 

السيريه هي أكلة أفريقية ما كانت منتشره بالرياض مثل جدّة مثلًا، لكن مع التطور والكبير اللي تشهده الرياض والتوسع الديمغرافي صارت واحد من المأكولات اللي ممكن تحصل عليها بسهولة، والعجيب ان واحد من أميز المطاعم للسيريه وهيّ أكلة شعبية بإمتياز ماهو موجود بالجرادية، أو بغبيرة، أو بالناصرية.. المطعم الاميز بالنسبة لنا موجود بشمال الرياض! افري كيو هو مطعم حديث ما كمّل سنته الأولى، موجود في حي العارض ويشرف عليه صاحب المطعم بنفسه، رغم ان المطعم موجود بشمال الرياض الا انه ما يبيع السيريه عنده بأسعار شمال الرياض. بـ ١٣ ريال فقط تقدر تأخذ طبق سيريه سواء كان لحم، دجاج، أو سمك.

هل أنت مسافر هذا الصيف؟ اذا كنت بتروح تصيّف في مصر فتقدر تطلب مرسول هناك برضو، بس تحذير: ما راح يجيك مرسول سنايدي.. بيجيك مرسول جدع!