أهلًا وسهلًا، هذي أوّل لستة من كَلَماشي.. موقع يهتم ببطنك أكثر من أمك وأيّ دكتور باطنية تراجع معه.

في اللستة الأولى قررنا نتكلم عن الشاورما، وللتحديد: شاورما الدجاج. 🥰

ما راح نذكر أفضل شاورما بالرياض، لأن الموضوع حسّاس للبعض. إرتباط السعودي أو السعودية مع شاورمتهم المفضلة قوي جدًا وما نبي ندخل بينهم.. عشان كذا قررنا اننا نتكلم عن ثاني أفضل شاورما بالرياض وما نحدد الأولى..

ماما نورة هو مؤسسة عريقة من مؤسسات الرياض، زيّه زيّ معهد الإدارة بالضبط. شاورمتهم الدجاج لذيذة وتوارثناها بين الأجيال واذا جينا بنسوي قائمة لشاورما اللحم فحنّا ايضًا بنحط ماما نورة. مطعم متكامل وشامل.

زيّ ما قلنا شاورمتهم لذيذة، وتربّينا عليه، نفهم عليه، أكثر مشهد يتكرر الآن هو حيرة السيّاح داخل أي فرع من فروع ماما نورة. ماما نورة عنده نظام محدد لاستلام الطلبات، يمين الكاشير هو قسم الشاورما، يسار الكاشير هو قسم العصائر، وكل شيء ثاني بالنص.

مؤسس هذا الصرح العريق هو نفسه الرئيس التنفيذي الحالي لماما نورة: المذكور بالخير دومًا الأستاذ خالد بن سويدان
الأستاذ خالد بن سويدان هو من رجال الأعمال البارين بوطنهم، المشاريع المجتمعية لماما نورة عديدة وأهمها هيّ تنمية الغطاء النباتي وحماية بيئة وطننا الحبيب.

في ٢٠٢٠ رعت سلسلة مطاعم ماما نورة مبادرة لزراعة أكثر من ١٥٠ ألف شجرة في محافظة مرات بإقليم الوشم.

قد سمعت عن الشاورما اللي تنزرط زرط؟ هذي هيّ شاورما غصن السنبلة.
شاورما كلاسيكية وأصلية تحضّر بكميّات كبيرة في مطعم صغيّر على شارع موسى بن نصير.
لو تدخل المطعم أنت تدخل في ٢٠٠٤، عادي جدًا تسمع أغنية لجواد العلي أو تسمع اثنين يسولفون عن مباريات الملحق الذهبي.

غير حجمها القابل للزرط عندهم أنواع مختلفة من الشاورما.. بس سريّة. محد يعرفها كثير. زيّ شاورما العسل، وشاورما التبولة.

هذا المطعم العريق له فرعين، واحد بالملز والثاني بالروضة، فتح في السبعينات ومن يومها وهو يعتبر الوجهة المفضلة بعد حضورك لأي مباراة في ملعب الملز.

ثومهم. ثومهم حاد جدًا لدجة انه يجرح مشاعر جوعك. وعادي تجرح مشاعر جوعك لأن جوعك هو عدوّك.
ومقصود ما يبخل عليك بالثوم ابدًَا.. مع كل طلب تسليمه من الفرع بيعطونك مجانًا بطاط يسبح في ملعب صابوني بس بالثوم.

تدري ان الشاورما سعودية؟ شاورما اللحم هيّ تركية لكن الشاورما الدجاج اللي حنّا متعودين عليها طلعت للعالم كله من السعودية.

في كتاب مذاق الزعتر ٢٠٠١ لريتشارد تابر وسامي زبيدة تم ذكر معلومة مهمة جدًا وبشهادة الأتراك: شاورما الدجاج طلعت على العالم من السعودية. وشاورما اللحم هيّ الشاورما التركية.

ختامًا للفاصل الوطني هذا: نشكر الشعب السعودي على قدرته الهائلة بالتأثير على الثقافة العالمية من بطونهم، كل الأمم العظيمة أثرت على العالم كذا: البرغر يحمل معه هويّة أمريكية بحت، والكروسون يشيل فرنسا معه، اللي بيحفظ ثقافتنا هو خبزة مفرودة يجمعها مع الثوم والمخلل والدجاج حضن دافئ جدًا.

أشهر مطوّع بحي الريّان هو برغر. ايه نعم برغر. كذا يسمي مطعم فهد للوجبات السريعة وجباته

هذا المطعم اللطيف موجود في حيّ الريان، الحيّ اللي نحب نسميه بريدة الصغيرة.

برغر المطوّع ما فيه شيء مميز الا اسمه.. لكن شاورما فهد هي اللي خلته يدخل القائمة.

إبداعهم بشاورمتهم بدون ما يبعدون عن كلاسيكيتها.
جرّب شاورما القرعاوي، شاورما يحطون فيها شرائح من الجبنة تذوب داخل الشاورما.
جرّب شاورما بلاطة، وهي شاورما صاج عادية.. بس حجمها حجم بلاطة.

هذا المطعم له نكهة خاصة جدًا ما تذوقها الا عندهم، ما نعرف السر وين لكن نتوقع السر هو بمعاناتك وأنت تدوّر موقف قبل ما تطلب من عندهم.

السلطة سلطة، والشاورما شاورما. الموضوع بسيط، فخلونا نبعدهم عن بعض.

لا تأكل شاورما فيها سلطة الا في حالة كانت من مطعم ذوق المذاق. هم اللي يضبطونها، وهم برأينا اللي ابتدعوا مشكورين الشاورما البوريتو اللي خلّت شاورمر يطلع منتجات عديدة من هذي الفئة.

ماجد عبدالله يأكل من الصاج الذهبي، المطعم اللي يشاع انه يملكه.. لكن محنب متأكدين، عشان كذا استثنيناه من القائمة، مو عشان جودة الشاورما حقته منخفضة.

‍

خلصنا.. آسفين اذا طولنا عليكم، وآسفين اذا ما ذكرنا مطعم الشاورما المفضل لكم. الرياض مدينة حيّة، وفيها مطاعم شاورما مميزة كثير، هذي كانت أبرز الاستثناءات للستة —>

- اللؤلؤة، لأن فريق البحث والتقصي ما قدر يحدد فرعه الأصلي.. أو انه راح جرّبه في فرعه الأصلي واكتشف ان طعمه مو زي الأصلي. وحده من الثنتين.
- شاورما جليلة، مع اعجابنا التام بشاورمته لكنه للأسف يكتب بخط رقعة، وحنّا عندنا موقف شخصي من أي مطعم شاورما يكتب بخط الرقعة.
- شاورما جنيه، لأن محد يعرف ينطق اسمه ويوم اتصلنا عليهم نسألهم هاوشنا الكاشير.