سيارتك في الورشة؟ عب الكرشة

تاريخ النشر 2023-03-02

الحمدلله على سلامتك. صار لك حادث؟ دقّيت على نجم؟ رحت عند شركة التأمين؟ عطوك خمسة آلآف.. مبروك! أنت الحين بتروح تصلّ سيارتك وتأكل أكل لذيذ في الصناعية

الصناعية تحقق توازن عالي لأهم شيئين في حياة السعودي: سيارته و بطنه، في السعودية تقترن السيارة بهوية مالكها، سؤال يشغل اي سعودي يسولف معك وش أسمك؟ ووش سيارتك؟ عشان يقدر يوصفك مستقبلًا: خالد سوناتا، حمد كادنزا، وصالح هايلوكس. 

السيارة للسعوديين هي صندوقه الحديدي المتحرك، رقعة الحرية المتنقلة، يقدر يروح وين ما يبي، يقدر يسوي اللي يبي فيها، يطعّس، يخمّس أو يفحّط، وإذا صار فيها شيء: مردها للصناعية. ليه العلاقة الحصرية مع الصناعية هذي؟ مب لازم تروح لها اذا سيارتك خربانة فقط. رح تمشّ فيها، شف المجسمات الفنيّة من سكراب السيارات أو جرّب مطاعمهم اللذيذة. 

في هذي اللستة ٦ مطاعم لذيذة في صناعيات مختلفة بالرياض 

(اذا ضغطت على اسم المطعم يفتح لك قوقل مابز!)

المطعم الأول

بعد الانتهاء من الوجبّة الهنيّة في مطعم السعيد بتسأل نفسك: هو أنت ولا سيارتك اللي تحتاج قطع الغيار؟ سفرة هذا المطعم هي ختم أصالة على أي وجبّة غداء أو عشاء، قال لنا مؤسس مطاعم ومطابخ السعيد، الأستاذ منيف بن ميزان العطاوي، عن قصة نجاح هذا المطعم العجيبة منذ تأسيسه سنة ١٤٠٢، حيث كانوا يقدمون ٣ تيوس، حاليًا هم يقدمون أكثر من ١٥٠ رأس تيس يوميًا. 

التزامهم العالي بإجراءات النظافة يطمّنك، زيارة هذا المطعم بتأكد لك انك قد تكون في أنظف بقعة في الصناعية، وش اللي أنظف منه؟ نيّة معلم المظبي عندهم، اللي له أكثر من ٣٠ سنة يشوّي اللحم بنفس الوزنية اللذيذة: تسمع قرمشة رغم ان اللحمة طريّة. 

اذا رحت عندهم لازم تجرّب المندي مع العسل والطحينة، والحق على الزربيان اللي يقدمونه بعد الظهيرة. 


المطعم الثاني

في مكان هادئ ليلًا بالصناعية القديمة يعزل هذا المطعم نفسه عن باقي مدينة الرياض، مكان صغير يقدّم الغذاء يوميًا للصنايعية في الصناعية من الجالية الباكستانية، ما عندهم منيو، عندهم اللي يطبخونه هذاك اليوم. ويعاملون مطبخهم بإجراءات نظافة ملائمة لورش السيارات. ليه تروح هناك؟ سمبوسة بطاط.  

ما تقدر توصله من قوقل مابز لأن المطعم مب مسجّل هناك، أو بالأحرى ما يبون يسجلونه هناك: عاجبهم وضعهم بالهدوء اللي هم فيه المكان منعزل ولوحته مب واضحة، عقود النور اللي حوله تساعدك تميّز انه مطعم في الليل، أو الريحة اللي طالعة من زيتهم. 

ما تجرأنا نذوق شيء غير سمبوسة البطاط، وسمبوسة البطاط كانت أصعب شيء تم هضمه من قبل فريق البحث والتقصي في كلماشي، لكنها كانت فعلًا تستحق التجاهل المؤقت لشروط السلامة. 


المطعم الثالث

شيخ الصناعية يعتمد التقارير المرورية يوميًا وعشان يستمد بالطاقة يأكل مخبوزات هذا الفرن اللذيذة، عشان كذا يقدمون الإكلير الفرنسي الفاخر في الصناعية: مخبوز مخصوص لسماحة شيخ الصناعية. 

ممكن الاسم و شكل المبنى من برا يوحي لك انها ورشة تركب فيها شمعات، وبالفعل تقدر تركب شمعات عندهم لو شريت كيكة. 

أو تدخل عشان تعطي خشمك راحة من ريحة الصناعية وتدلعه بريحة الخبز الزاهية.

تحذير للحوامل: لا تتوحمون على حلويات أنوار الصناعية، لأنه اولًا: وش جوّكم؟ ثانيًا: الوحام هذا يحمل صعوبات لوجستية على أبو العيال. 


المطعم الرابع

اللي يفتقدونه أهل حيّ الشفا بالذوق الراقي في الأغاني يكسبونه في ذوقهم بالشاورما، حيّ الشفا ولّاد لمطاعم شاورما لذيذة، زيّ مطعم ركن الوجبة اللذيذة. 

هذا المطعم مميز بتحضير الشاورما بالطريقة السوريّة، وكل سندويتشة شاورما فيها حبّة مخلل سافرت شخصيًا من درعا جنوب سوريا لحيّ الشفا جنوب الرياض. 

إجراءات السلامة مبالغ  فيها في مطعم ركن الوجبة اللذيذة: يلبسون سكربات الممرضين عشان يتعاملون مع الشاورما، ولو تفكّر فيها مفروض كل أحد يلبس سكربات في الصناعية. ليه؟ لأنها مستشفى مركزي للسيارات. 

عندهم شاورما عادية، عندهم شاورما ابعة، وعندهم فطيرة شاورما.. اللي حنّا فضلناه هو صحن الشاورما، لأنه اقتصاديًا هذي ارخص طريقة ممكن تأكل مخلل مستورد فاخر.


المطعم الخامس

وش تعرف عن بنقلاديش؟ غير انهم يتكلمون لغة بنقلاديشية؟ عاصمتهم داكا، وعدد مواطنينهم ١٣٦ مليون نسمة، وهذا عدد نسمات كثير. أكيد الكم الهائل من البشر هذا عنده أطباقه الخاصة، صح؟ غلط. المطبخ البنقلاديشي أطباقة مطابقة لكافة مطابخ شبة القارة الهنديّة، لولا اختلافات التسميات مثلًا اللي في الهند يسمونها "باني بوري" يسمّونها في بنقلاديش: فوتشكا! 

مطعم دينا يقع على شارع الاعتدال، بس ماهم معتدلين ببهاراتهم.. عندهم أكلات بنجلاديشية متنوعه من الشوربات والمرق والمقالي، و"سناكات" الشارع في بانجلاديش، إذا رحت عندهم، لا تفوّت الفوتشكا وهي خبز مقرمش مقلي صغير منتفخ يكسرونه من فوق و يعبونه بعدس و بصل و طماط و ملعقة مرق صغيرة مليانة بهارات لذيذة. 

ولا تنسى تحلّي على راس مالاي أو جلبيبي.. يا بيبي.


المطعم السادس

باكستان زنزباد! هذي اول شيء ينطقه لسانك بعد ما تذوق المشويات من مطعم محمد العتيق اللي يشتغل فيه الطباخ ياسين، الطباخ ياسين يشتغل من زمان في هذا المكان ويوزن لك كباب تشابلي كأنه طالع من من ميزان العضيب.

من مميزات هذا المطعم هو طيبة الموظفين فيه وانك تقدر تشوف المطبخ من ورا القزاز، موب بس عشان الطبخ حقهم ممتع جداً للمشاهدة، عشان تتأكد بعد انه ما يقلي الكباب بزيت المكينة أو يشوي التيكا على فحمات الفرامل بالغلط.

جرب الكباب الباكستاني الدائري والكباب العادي بالسيخ ولا تنسى تغطه بالصلصة الخضرا اللذيذة و تنهيها بحلى الكير الباكستاني.


شارك هذي اللستة

التعليقات


م كثرتو مطاعم صناعية النسيم نبي لستة للصناعيه هذي بما انها هي الاقرب لي😍❤️

قبل عام واحد - نواف الاحمري

الوصفه السريه التي يبحث عنها الجميع سمبوسة البطاطس

قبل عام واحد - Ahmed.

رهيبين كالعاده !بس كأن لستاتكم قاصره؟

قبل عام واحد - Anonymous
عطنا رأيك

تبي تقرأ لستات ثانية؟

تجربة اليابان في الرياض

تجهيزات العروس في الرياض

مطاعم تسافر لها من شمال الرياض