الرياض عاصمة الحلويّات الشرقية

تاريخ النشر 2023-02-15

وش رايكم بطبقة الأوزون؟ قد جرّبتوها؟ بكرا الجمعة ١٦ سيبتمبر هو اليوم العالمي للحفاظ على طبقة الأوزون وهذي مناسبة تستاهل صحن حلويّات شرقية.. للأمانة حنّا ندوّر أي مناسبة تخلينا نطلب صحن حلويات، زيّ اليوم الوطني الماليزي أو يوم المهندس الهندي،  كل هذي مناسبات بتصير في الويكند هذا وتستاهل تحتفل فيها إذا كنت مشتهي حلى.. وأنت دايمًا مشتهي حلى. 


ولأنك دايمًا مشتهي حلى فمبروك! أنت عايش بالرياض، عاصمة الحلويّات الشرقية. ليه نسمّيها عاصمة الحلويات الشرقية؟ لأنها وجهة حتمية لكل طبق بقلاوة أو كنافة لذيذ في الوطن العربي، ينتهي هنا في الرياض. 


تركيزنا اليوم بيكون على الحلويات الشرقية الشامية، في اللستة بتعرف عن ألذ كنافة، وأطيّب مفروكة، وأزكى شفايف ست، وأحلى مدلوقة وأشهى حلاوة جبن في الرياض، وبتعرف عن صحون البقلاوة اللي تقطع آلاف الكيلومترات عشانك بس قبلها، كاركتير لستة اليوم من الرسّام أحمد باوزير


نبدأ بالسهل الممتنع: حلاوة جبن، هذى الحلى المكوّن من السميد والجبن يعتبر سهل التحضير لكن صعب الإتقان، وش أفضل مكان يقدّم حلاوة جبن في الرياض؟ 


أفضل حلاوة جبن في الرياض

الدبلوماسي

هذا المكان العريق موجود من سنة ١٩٨٧، تسأل نفسك ليه سمّوه الدبلوماسي؟ واضحة: مافي أيّ مشكلة دبلوماسية بين الدول العظمى ما يحلها طبق حلوى شرقيّة، لو تشامبرلين رئيس وزراء بريطانيا جاب معه صحن حلاوة جبن للبوندستاغ الألماني كان ما احتل هتلر بولندا، كل الأزمات الدبلوماسية العالمية كان ممكن تنحل بزيارة لطيفة لهذا المحل. 

يمكن تعرف الدبلوماسي من فطايره اللذيذة، ولا من كيكة الفراولة الشهيرة اللي جابوها لك أهلك يوم ختمت القرآن الكريم أو تخرجت من المتوسطة.. لكننا ننصحك تجرّب حلاوة الجبن من عندهم لأنها وحدة من ألذ الحلويّات الشرقية الموجودة في الرياض. 


أفضل كنافة في الرياض

كنافة حبيبة

من القدس، لعمّان ثم للعالم أجمع فتح الحاج محمود حبيبة محل الحلو هذا اللي فعلًا حلو. كنافة حبيبة هي الأفضل على الإطلاق بالرياض، وصارت طقس من طقوس سكّان مدينة الرياض. كل الولائم الكبيرة لازم لها ختامية كبيرة زيّ قدر الكنافة من كنافة حبيبة. 

كنافة حبيبة الناعمة بالجبن هي إثبات واضح وفاضح ان البشرية ضعيفة، مهما كان خطتك الصحية وحميتك الغذائية بتنكسر قدام أول صبّة شيرة على هذي الكنافة، وبشرى لك ياللي ساكن شمال الرياض: كنافة حبيبة الآن موجودة في حيّ قرطبة. 


أفضل شفايف الست في الرياض

حلويات مشهود

خذ البشارة يا شريم.. الحين تقدر تنفخ. 

شفايف الست هيّ حلى دمشقي يتميّز به محل حلويات مشهود، ومشهود هو محل لحلواني سوري ما بدأ من دمشق، بدأ من هنا في الرياض، ومب بس شفايف الست هي المميزة هناك، عندهم أطباق منوّعة ولذيذه حلاها موزون زيّ أسعارها مثل: الفيصليات والكُل وشكُر، والبرمات، والصرّات. محلهم في حي القدس هو الوحيد وإذا ملّيت من الحلى الشامي جرّب من عندهم الغريّبة الكويتية. 


أفضل مفروكة في الرياض

حلويات جرير القباني

حلويات القبّاني هو حلواني قديم جدًا في الرياض، وزي مكتبة جرير بدأ هذا المحل في شارع جرير ومنه يأخذ اسمه، طبقهم الأميّز بشهادة أم اللي كتب هذا النص هو مفروكة الفستق والقشطة الطازجة من عندهم. ليه سمّوها مفروكة؟ لأنها تفرك بنكرياسك بالسعادة. 

 برضو عندهم كنافة خشنة لذيذ وأنواع مختلفة من الكيك والحلويات الفرنسية، لكن هذي بنخلّيها للستة ثانية. 


أفضل مدلوقة في الرياض

حلويّات نبيل نفيسة

وشّي المدلوقة؟ ما ندري. وش فرقها عن المفروكة؟ ما ندري. هل هي لذيذة؟ ايه ندري. هي لذيذة، لذيذة جدًا. خاصة اذا شريتها من حلويّات نبيل نفيسة.. هذا المحل اللي افتتح في خمسينيات القرن العشرين في حواري دمشق القديمة. ما يحتاج تسافر الشام عشان تجرّب المدلوقة حقتهم تحتاج فقط تروح لحيّ السليمانية وتذوقها مع كوب قهوة تركي. 


وين تلقى الحلويّات الشرقية المستوردة؟

دار جدودنا

صحون البقلاوة تسافر آلاف الكيلومترات عشان تلقى نفسها من جديد في الرياض، عاصمة الحلويات الشرقية، فيه محل لطيف بحيّ السليمانية اسمه دار جدودنا يستوّرد أطيب صحون الحلويات الشرقية من أشهر الحلوانيين في الوطن العربي، مثل الأخوين زلاطيمو وحلويّات الصدّيق. تواجد هذي الصحون موسمي وتراها تخلّص بسرعة، الحق عليها عشان تحتفل بكرا باليوم العالمي للحفاظ على طبقة الأوزون.  


هكّر مرسول! أرسل مرسول لتجمّع محلات الحلويات الشرقية في السليمانية وخلّه يجيب صحن حلى من كل محل! مفروكة من هنا مبرومة من هناك ومدلوقة ومبرومة وكل الأجهزة الوظيفية في جسد الست. 
شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

فجريّات الرياض

اللستة المتكتكة

وشلون تأكل وليمة بأقل من ٣٠ ريال؟