مين المسؤول عن الفول؟

تاريخ النشر 2023-03-30

ليش ما تفطر فول؟ أهل الرياض ما يفطرون فول في رمضان والعادة هذي مؤسفة نوعًا ما، لأن الفول مليان بالبروتين والفيتامينات والأملاح المعدنية، وهو مفيد للقلب ويقاوم التّوتر والإجهاد اللي يصيب الجسم، لكنه يحمل صعوبات مختلفة وإجهاد مختلف، تحسه بعد ساعتين من عملية الهضم. 


في المنطقة الغربية الفول هو سيد المائدة الرمضانية للعائلة الحجازية، ويحق لهم، لأن عندهم بجدّة مطاعم فول أيقونية زيّ الأمير، والوزير، وفتّاح٬ وعبّاس، و البطاطي.. محظوظين فيها أهل جدّة. والرياض بعد محظوظة بفوالينها المميزين اللي الناس يروحون لها من عشرات السنين٬ في هذي اللستة بنذكر ٥ من هذي المحلات


المطعم الأول

مطاعم الأفراح

معالم الرياض: برج المملكة، برج الفيصلية وجرّة الفول عند مطعم الأفراح، هذا المطعم يقلدونه كثير لكن محد يقدر يوصل مستوى صحن الفول عندهم.. رح له وادخل جوّاته وبتشوف قدامك أكثر من صحن فول لذيذ، بتشوف قدامك مطعم وشركة متكاملة: زحمة من أول ما يفتح لين ما يقفل.. و اللي يشتغلون سريعين و ممتازين مستحيل يغلطون بطلبك. و تنظيم درجة أولى. كل هذا وهم مبتسمين في وجهك و يرمون عليك نكتة عالطاير. 


كلنا في كلماشي محبين للقلابة بشكل عام مثل أي شخص تربى على الفول في الرياض لكن الجرة في الأفراح معروفين فيها وتستحق الشهرة بجدارة، وعندهم طلبات أخرى متألقة زي الصنعاني: اللي هو عبارة عن فول مخلوط مع بيض مقلي و تقدر تضيف معاه جبن ابيض أو جبن شيدر.. ننصح بالجبن الأبيض مع تميس البسكوت. 

أصحاب مطعم الأفراح هم عائلة بابصيل المرموقة اللي اسمهم له صلة وطيدة بفطور أهل الرياض. و العائلة تتفرع إلى أكثر من محل فول بالرياض.. لكن لمطعم الأفراح المؤسس هو عمر سعيد أحمد بابصيل. فتح المطعم عام ١٩٦٢م  وأول فرع كان في المربع… توفى في عام ٢٠٠٩ رحمة الله عليه و ترك المطعم لذريته و فخره استلموه عياله/ابنائه سعيد، سالم، احمد، عبدالرحمن و عبدالله. تقريباً كل شخص مستلم إدارة فرع. و ماشاء الله عليهم منافسهم الوحيد هو أنفسهم. 

المطعم الثاني

مطعم النيلين

هذا الفوال كان اسمه فوّال النيلين، ثم تحوّل اسمه لمطعم النيل الأبيض.. هل جف واحد من النيليين؟ ما ندري، لكن ندري عن شيء واحد: جوعك بيجف جفاف تام قدّام صحن فول من هذا المطعم اللي موقعه في المربع. خارج رمضان غالباً تشوف زبونه المعتاد موظف الوزارة هناك يأكل فول يجدد فيه حياته قبل لا يقابل الجمهور في الدوائر الحكومية. 

المحل صغير، وفي وقت الذروة يكون مزدحم. جهّز نفسك توقّف طابور في رمضان، عساه أجر ان شاء الله. 

رغم ان مطعم النيلين هو فوّال سوداني إلا انه يقدّم العيش البلدي المصري اللذيذ و الخفيف مع أطباقه.. اللي مب بس فول! برضو عدس. إذا تعرف أي شخص مسكين ما قد جرب عدس سوداني في حياته: جيبه هنا و غير حياته للأفضل.. صدقنا بيشكرك انك موجود في حياته.

مستقبل الفول، طعام الفقراء

من بداية الزمان، وتحديدًا عصر الفراعنة، والفول هو بديل للحم.. لأنه سهل الاستزراع في المناطق معتدلة الحرارة كثيرة الماء، نلقى الفول متشعب كثير في ثقافة مصر الحبيبة، ويظهر بأدبياتهم بشكل مختلف مثلًا في القصيدة الساخرة لأحمد فؤاد نجم "الفول واللحمة" اللي غنّاها الشيخ إمام حيث قال فيه قصّة الدكتور محسن اللي يحاول يقنع الفقراء بالفول بديلًا عن اللحمة، الأغنية ممتعة وظريفة لكن ما طلّع الفول بصورة جيدة مثل القصيدة هذي لإبن الوردي وهو شاعر عاش في أكناف حكم مصر المملوكية قال عن الفول: فولٌ بفلسE غداءً واللبس سحق قطيفَهْ،  فاشمخْ بأنفِكَ تيهاً وعشْ بنفسٍ شريفَهْ٬ قالوا الزمانُ خسيسٌ فقلتُ نفسي شريفَهْ٬ والموتُ عدلٌ يسوِّي بيني وبينَ الخليفَهْ. تعليق كلماشي: أقول لا يسمعك الخليفة. 

اليوم الفول في خطر. هو المصدر الرئيسي لغذاء أكثر من ٤٠٠ مليون نسمة في دول العالم النامي، لكن المساحات الصالحة لزراعته يتوقعون الخبراء انها في تراجع بنسبة ٪٥٠ لعام ٢٠٥٠. لكن: يا سعدنا بالعلم الحديث! العلماء حاليًا يطورون ٣٠ صنف جديد للفول مقاوم لارتفاع درجات الحرارة حتى انه قد يزرع في الصحراء، وهذي الأصناف تم استنباطها من خلال التزاوج التقليدي بين أصناف الفول المختلفة، بقيّة الأصناف تتزوّج عن حب. 

المطعم الثالث

وقت الفول والفلافل

المقولة الشهيرة في جدار كل محل فول.. "إذا خلص الفول الزول ما مسؤول" أو في هذي الحالة: العدس. إذا ما كنت من عشاق العدس أو تقول لنفسك ليش أطلب عدس في محل فول؟ فغالباً ما جربت العدس السوداني. لأنهم أحسن من يطبخ العدس. في هذا المكان البسيط الملموم و الكراسي الخضراء. و وردة بلاستيكية على كل طاولة يجهزونك لوجبة محليّة رومنسية مع العدس.


مجرد ما تدخل تلاقي مع الزحمة سواليف و ضحك من الموظفين السودانيين مع الزباين السودانيين وأنت بس قاعد بينهم غيران تتمنى تفهم نكتهم وتخش معهم بالسواليف… إذا سألك الكاشير متى تبي العدس قلّ له: والله الأهل ضربلوي هسّا. 

وإذا تبي شي أكثر من العدس أو القلابة.. جرب "مشكل" بالطريقة السودانية. يزودون مع الفول بيض مقلي و جبن ابيض مبشور مع بصل و طماطم مقطع و جرجير. البعض يقول انه شي غثيث و زايد عن حده. المحنكين يقولون هذا فطور الأبطال. واذا ناقصك حنكة، اطلب منهم يفتفتون فوقه فلافل كمان. وبالعافية عليك الوجبة المليئة بالسعرات الحرارية الفاخرة.

المطعم الرابع

فوال الإخلاص

في شارع الجبيل بحي الخليج يقع هذا المطعم اللي يخلصون اخلاص تام بجرّة فولهم. كيف تعرف ان محلات الفول والتميس غالباً ممتازة؟ اذا لقيت فيهم سرا طويل. زي هذا المطعم.


 اللي تميسهم يشهد عليه الافغاني والسوداني و اليمني و المصري والسعودي وأي شخص فعلاً يحب الفول والتميس. المحل قديم واللي يشتغلون فيه محترمين و محبة الناس لهم كبيرة جداً بالذات أهل الحارة اللي ما يفكرون ياكلون فول غير فوال الإخلاص من ٢٥ سنة.

يميّز هذا المحل انه يخلط مكونات الفول في قدر كبير عكس بقيّة الفوالين اللي يسوون الخلطة في صحن التقديم الصغير. ننصح أيضًا بفول الطاوة حقهم. ولا تنسى تاخذ لك عرمة فلفل قبل لا تغمس الفول وعصرة ليمونة و تقرمش على بصل عشان يحسن من تجربة الفول.. ويعدل بطنك. وتاخذ وراهم شاي كبوس سكر مضبوط.

المطعم الخامس

أبو سالم

فوال عبدالله الحاتم واللي كل الناس تمون عليه وتعرفه بإسم الكنية: فوال أبو سالم . 

متخصص في الفول من ٥٠ سنة تقريباً٬ ما تلقى عنده إلا فول وشاهي بس٬ ولو رحت له بعد الساعة ١١ في أي شهر غير رمضان بتلقى عنده شاهي بس لأن من لذاذة الفول حقه نادر ما يقعد بعد هذي الساعة إلا في نهاية الشهر٬ فوال أبو سالم معروف بفول الجرة حقه٬ وبنعطيك نصيحة مهمة: صحن واحد يمكن ما يكفيك من لذاذته٬ إذا طلبت صحن واحد ومسكت السرا الطويل مرة ثانية عشان تاخذ الصحن الثاني لا تقول ما قلتوا لي، لأن السرا حقه فيه ناس ينتظرون دورهم عشان ياخذون كميات كبيرة بالأكياس ويفرزنونها في البيت.


خلًّصت اللستة، ومازالت عندنا اسئلة كثير زي: الفول المدمّس، مين اللي دمّسه؟ هل فيه فول سوداني بالفول السوداني؟ وش نسمّي اللي يشغّل جرّة الفول؟ ارسلوا لنا أجوبة هذي الاسئلة أو سولفوا معنا على الايميل التالي hala@kalamashii.com

شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

الرياض تحب البروست

لستة التجهيزات الرمضانية

وشلون تتقهوى بأقل من ٨ ريال؟