الرياض مدينة سريعة، تتغيّر على سكّانها كل يوم، خصوصًا مطاعمها: الهبّة أو الطفّة أو الترند عمره قصير جدًا عندنا، اليوم حنّا طايحين في برقر القصدير وحلى كيكة سان سبيستيان، أمس كنّا طايحين في الـ سماش برقر والكب - كيكس، بكرا بنطيح بشيء ثاني وبنحبّه ونشتريه ونجيبه لجمعاتنا مدّة أقصاها ٤٥ يوم وبعدين نسحب عليه. 

في هذي اللستة بنتكلم عن الأشياء اللي ما نقدر نسحب عليها، لأنها مهب هبّة عمرها قصير، هيّ شيء كلاسيكي في منيو مدينة الرياض. 

عندنا باللستة خمسة أصناف، وتذكروا أن الترتيب ما يعني الأفضلية، بس قبل اللستة.. الكاركتير. 

ليه هذا الصنف توّه قايم من النوم؟ لأنه كل شوي يتمغّط. فطيرة الجبن من ماما نورة هي التعريف الحقيقي لكلمة تماغيط، تقدر تحوّله من أكلة للعبة أولمبية زيّ: أطول تمغيطة جبن بالتاريخ. 

فيه طريقة مختلفة لأكل فطيرة الجبن من ماما نورة وهي: ساندويتش شاورما داخل فطيرة الجبن، هذي السندويتشة يسمّيها أبو منيرة: ساندويتشة اختلاط أنساب. هو عبارة عن حبّة شاورما دجاج ابعة مضمومة داخل فطيرة الجبن. جرّبها ولا تفوتك. 

هذا الصنف الكلاسيكي في واحد من أكثر المطاعم الكلاسيكية في الرياض.. مافيه شيء أكثر كلاسيكية في الرياض من عماير السيركون في العليّا، مطعم روما فتح سنة ١٩٩١ ويقول لنا المضيف فيه، الأستاذ أسامة، ان ماجد عبدالله وسامي الجابر من الزوّار الدائمين للمطعم. 

المطعم متكامل، اللازانيا حقتهم لذيذة، الباستا بكل أنواعها لذيذة، وحتى الخبز اللي يقدمونه ضيافةً لذيذ. 

في لستة سابقة قد تكلمنا عن هذا الصنف، وقد اقتبسنا عن الأستاذ منصور العساف تاريخ ظهوره، وعلاقة موظفين شركة الكهرباء فيه، عشان تعرف عنّه أكثر اضغط هنا.

بس اليوم بنتكلم عن تاريخ المطعم نفسه، في سنة ١٩٧٩ افتتح مصطفى عرفة هذا المطعم بعدما لاحظ نقص في المطاعم في حيّ الملز، اليوم هذا المطعم يعتبر من ركائز حي الملز ومعلم فيه. 

ساندويتشة صبّة عرفة لها قدرة خارقة انها تخليك تحس بالشبع طول اليوم، ومن العادات المشهورة عنها إنها تنوكل مع بيرة هولستن رمّان عشان تهضمها. 

في عزّه كان لصدى التحلية خمسة فروع في الرياض لكن اليوم بقى فرع واحد فقط في الضباب، صدى التحلية عنده سوفليه من ألذ ما يكون وهو الحلى الرسمي لمواليد الثمانينات في الرياض، ليه نقول كذا؟ لأن صدى التحلية عنده ثلاثة أنواع من الكابتشينو، كابتشينو روسي، وفرنسي وإيطالي.. وبرضو عندهم كابتشينو البندق. 

تقدر تطلب السوفليه عندهم مع آيسكريم أو بدون.. تقدر تطلبه بأربعة أحجام مختلفة: صغير أو وسط أو كبير، أو الحجم العائلي اللي نتحدّاك تأكله لوحدك. 

صدى التحلية هو مكان من تاريخ الرياض، واليوم هو يعاني مع الهبّات والترندات، عشان يوقّف على قوامه الطري والهشّ فضلًا حلّوا عليه في هذا الويكند. 

ما يخفى عليكم اننا نحب جافاتايم جدًا، بس الصنف هذا حطّيناه آخر شيء لأنه يمكن مهب وقته الحين، تحتاج يدخل شهر اكتوبر ويبرد الجوّ عشان تبدأ تشربه.

 مشروب النرفانا من جافا تايم هو بلا شك واحد من أشهر مشروبات الرياض، وهو ابتكار من فريق جافاتايم: قرفة، زنجبيل، فانيلا، عسل وحبوب المدغشقر. الأخيرة ما نعرف وشّي لكننا نعرف انه هذا المشروب لذيذ. 

هكّر مرسول!

الرياض تتغيّر بسرعة، كل الناس قاعدين ينقلون سكنهم لشمال الرياض. تدري مع خدمة نقل العفش من مرسول تقدر تشتري راحتك؟ حرفيًا تدفع فلوس ويعطون راحة البال.