ما تقدر، لأنك ما تقدر تصير فيقان وسعيد أصلًا. بس تقدر تحاول، وحنّا بنساعدك تحاول لأننا متعاطفين معك، خصوصًا في عيد الاضحى المبارك. إذا كنت فيقان فهذي المناسبة غالبًا صعبة عليك، عائلتك ما راح تفوّت فرصة انها تتنمّر عليك وعلى خياراتك التغذوية، وكل من حولك يستمتعون بما لذ وطاب من اللحوم.. وأنت تأكل عدس. 

مدينة الرياض تغيّرت، وتطوّرت، وصارت مناسبة أكثر للنباتيين الخضريّين، اذا كنت واحد منهم فحنّا في هذي اللستة بنتعرف مع بعض على ٥ أماكن مختلفة تقدم منتجات تناسب  أسلوب حياتك.

أيّ انك ما تستهلك لحوم الحيوان، أو منتجات الحيوان عمومًا، مو بس للأكل، برضو باللباس والاستخدامات الأخرى، زيّ مثلًا ممنوع تركب حصان للتنقلات، تركب سيكل أو نبتيتن دوّار شمس عملاقة. 🌻

ليه تسوي كذا بنفسك؟ فيه أسباب كثيرة، منها الصحية كوسيلة للتخسيس أو تقليل أمراض القلب. ومنها العقائدية زي أتباع الديانة الهندوسية، ومنها الإنسانية، زيّ أول فيقان مرّ بتاريخنا العربي: أبو العلاء المعرّي اللي كان شاعر ومفكّر عاش بالقرن العاشر ميلادي زاهد في حياته، ما يأكل اللحم ولا يشرّب اللبن ولا يلبس الجلد، ووثّق إيمانه هذا بعدّة قصائد أشهرها القصيدة اللي في الصورة تحت. 

شخباري مطاعم جايتنا من الكويت؟ هذا المطعم واحد منهم، فكرته بسيطة جدًا وهيّ يوميًا يجيب اختيارات جديدة من إبداعات مطبخهم، ودائمًا عندهم اختيارات فيغان لذيذة، إذا تقدر تتجاوز الزحمة اللحظية اللي تتجمّع عنده حاليًا لأنه جديد نسبيًا، فأنت تبي تستمتع بوجبة خالية من الحيوانات. 

هذا المطعم النباتي اللطيف في حيّ الواحة جاء للرياض من جدّة، وهو المصنّف الأول في أطباق الآساي اللي يقدمها في قشور جوز هند حقيقية. أشهر طبق عندهم هو الـ الستار رايز. وحاليًا قاعدين يفتحون فرعهم الثاني في الرياض في حيّ السفارات، برضو بيدشنون خمسة أطباق جديدة في الفترة القريبة ويبدأون يدشنون أطباق مالحة. 

هذا المطعم نضمن لك إياه ٪١٠٠ ان ما عنده أيّ منتجات حيوانية، ليه؟ لأنه يقدم طبق واحد بس: فول. وفول لذيذ جدًا. يمكن اذا سمعت نصيحتنا ورحت له تصير أول واحد فيقان يروح للصناعية القديمة، وهذا شيء يعتبر تاريخي. العم أبو سالم اللي يشغّل المطعم شخص بشوش، ويرحّب بكل أحد سواء كانوا من آكلي اللحوم ولا من الفيقانز. لكن تذكر اذا رحت تأكل هناك انت تأكل تاريخ الرياض، الجرّة هناك غالبًا عمرها أكبر من عمرك. 

هذي أكبر سلسلة مطاعم جنوب هندية في العالم، والمطبخ الهندي هو صديقك الأول كـ فيقان. سلسلة المطاعم هذي فتحت في الرياض سنة ٢٠٠٩، وتقول عن نفسها انها سلسلة مطاعم نباتية جودتها عالية. المطعم نفسه بالرياض له فرعين ودائمًا مزدحم بأبناء الجالية الهندية

هذا المطعم ما قدرنا نجربه، لأنه.. غالي. بس معروف ياوتشا انه من أفضل مطاعم الرياض الفخمة، مكانه وأسلوب تقديمهم للمأكولات وفريقه الاحترافي يشهد له بذلك. عندهم مينو مخصص للفيقان فيه أغلى حزمة خس ممكن تأكلها بالرياض، لكنه بالتأكيد تجربه ممتعة جدًا.