الساندويتشة.. أكثر طريقة عملية لتناول الطعام، وبما ان الرياض هي مدينة عملية جدًا فبلا شك الساندويتشة ازدهرت عندنا بكافة أشكالها سواء كانت شرقية أو غربية، غالية أو رخيصة. الساندويتشة اختراع حديث للبشرية لكنها غيّرت وشلون يأكل العالم أكلاته، خلت الموضوع أسهل وبمتناول اليد، حرفيًا. 

في لستة اليوم بنتكلم عن ست ساندويتشات متميّزة بالرياض، وهذا رأي فريق البحث والتقصي من كلماشي، هذا الفريق اللي يأكل ويشرب عشانكم، وعشان ما تأكلون شيء رديء. تبي تساعده؟ انشر هذا المحتوى على تويتر وقروبات الواتساب 🥙

اضغط هنا عشان تساعدنا في واتساب

اضغط هنا عشان تساعدنا في تويتر

أكبر تحدي لنا كان وشلون نقول ساندويتشة بالعربي؟ 🥙🥪

يقال ان مجمع اللغة العربية بالقاهرة ترجم كلمة ساندويتشة إلى: "شاطر ومشطور وما بينهما كامخ" والكامخ هو ما يؤتدم عليه، يعني ينحط على المائدة.

الترجمة هذي ضيّقت صدورنا، لأنها طويلة ولأنها ما عجبت الشيخ العلّامة ابن عثيمين حيث من نوادره الطريفة رحمه الله عليه انه قد قال: "لو اتيت محل الساندويشت -هكذا نطقها الشيخ-  وقلت له عطني شاطر ومشطور وما بينهما كامخ.. يمكن يكمخك صاحب المحل لأنك تكلمت معه بكلام لا يستوعبه" ¹

تعريف معجم أكسفورد للكلمة الإنجليزية، ساندويتش، هو شريحتين من الخبز تتوسطهم شريحة من اللحم. التعريف هذا نرفضه وبشدّة لأنه يعني ان الصامولي مب ساندويتشة. الوضع فوضى؟ 🗿

تعريف الساندويتشة بالنسبة لنا هو تعريف فضفاض: الصامولي ساندويتشة، الشاورما ساندويتشة، حضن أمك وأبوك يومك طفل: ساندويتشة. أيّ شيء يقدر يصير ساندويتشة إذا اشتهى أو بالأحرى: إذا اشتهيت أنت. 

بدينا بشيء معروف ومشهور، صبّة. 

حسب المؤرخ الاجتماعي منصور العسّاف، الصبّة هي أكله طلعت لنا بعد ما تجاوب مطعم عرفة للفلافل الشامية في ثمانينات القرن العشرين مع مطالب موظفي شركة الكهرباء بوضع البطاطس والباذنجان في الساندويتشة، يعني الوجبة هذي اختراع سعودي بإمتياز. 🇸🇦

لكن ليه ما اخترنا عرفة وحطينا ركن عدنان؟ سهلة: خبز الصاج هو أهم شكل من أشكال الصبّة السعودية، هو اللي يعطيها القوام الطري واللقمة الهنيّة. بسبعة ريال تقدر تأكل وليمة على شكل ساندويتش تكفيك يومك كامل، ثم اشرب بيرة رمان عشان تهضمها، وبالعافية عليك. 🥙

هذي السانديوتشة نضمن لك انها تستاهل السفر لبلاد ما وراء الجسر المعلق، حي السويدي. 

المميز في اماسي الديوان هو شاورما على الفحم تشوي طول اليوم، ويحطونها بخلطتهم الخاصة اللي تشبه تقريبًا كل محلات الشاورما في السويدي، ويجنبون معها صوصات مختلفة من الثوم الحرّاق والعادي ويقدمون الساندويتشة بسبعة أنواع مختلفة من الخبز. يعني طب وتخيّر ساندويشتك: تبي سانديوتشة قرصان؟ عندهم. صامولي؟ عندهم. صامولي جمبو؟ عندهم. شف الأنواع المتبقية ⬅️

هذا المطعم يمكن يصير أغلى من المطاعم الثانية، بس صدقونا: ساندويتشة البيكانتي من عندهم تستاهل. 

مطعم لوليفو مطعم قديم جدًا بالرياض، بدأ في سنة ٩٦ في التحلية وتوسّع وفتح فروع كثيرة، اللي يميزه هو اهتماهم بالجودة، أنواع الاجبان المختلفة المستوردة من ايطاليا وهولندا وأنواع اللحوم الباردة اللي يبيعونها بشكل منفرد بجانب استخدامهم لها بساندويتشات الخفيفة واللذيذة جدًا. 

بفريق عمل فلبيني عالي الاحترافية هذا المطعم هو المطعم المثالي اللي ممكن تروح تأكل فيه بعد يوم عمل طويل، يسكّر الساعة ٣ الفجر ويقدّم برقر لحم ودجاج، دبل أو سنجل. 

اللي شد انتباهنا عن هذا المطعم أكثر هو فرانشيسكو ماززي أحد أهم الطباخين العالميين، الطبّاخ هذا يملك مجموعة من أهم المطاعم الإيطالية في لندن والعجيب انه في سنة 2020 صرّح لمجلة بلومبيرج عن افضل برجر عالمي له: مطعم ون أو ون في حي المحمدية! بس ما تحتاج طبّاخ عالمي عشان يمدح لك المطعم، تحتاج بس تجربه مرّه وحده. 

فروج الكروان هو مطعم عريق في الرياض، له أكثر من ٤٠ سنة وهو يشبّعنا، رغم انه مطعم تركي الا انه عنده هذي الساندويتشة السعودية: عروس البحر.

ليه يسمّونها عروس البحر؟ لأنها خلطة جدة لشاورما اللحمة، وزيّ ما تدري عزيزي القارئ ان جدّة غير، وشاورما جدّة غير. 

تحذير: الساندويتشة هذي ألذ من اللازم، يمكن تمضغ لسانك مع اللقمة من طعامتها. 

مليت من الشجاعة؟ جرّب الجبن. وخصيصًا ساندويتشة الحلوم من خير الاجياد للاجبان، مصنع الاجبان اللي ما وقف يبدع ويثري المشهد الطعامي بالسعودية.  

عندهم ساندويتشات كثيرة ومختلفة وغريبة، زي كعكة الكنافة أو كعكة عيش البلبل، لكن اللي فاز بلقب الساندويتشة السادسة هو كعكة الحلوم، بس ضروري مع تشديد لكل حرف بهذي الكلمة انك تطلبها بحلّوم زيادة، لازم الساندويتشة تصير زي الصورة فوق، ثلثين منها جبن، وثلث الأشياء الأخرى. 

علّمنا مطاعم الرياض المفضلة لك، وجباتك اللي تحبّها، أو أيّ شيء ودك تقوله لنا، عبر هذا الرابط. 

 وإذا ودك تروح للمطاعم اللي تكلمنا عنها هذي القائمة في قوقل مابز.

وكالعادة نختم بتهكيرة لتطبيق مرسول، مرسول مب بس تطبيق عادي، مرسول هو سوبر تطبيق: مثلًا: من خلال تطبيق مرسول تقدر تشتري بطاقات شحن كل شركات الإتصالات أو ينقل عفش بيتكم! ما نمزح، كل هذي مزايا بأقوى تطبيق بالسعودية: مرسول.