افطر في مطعم فطور متصالح مع ذاته وأسعاره متصالحه مع جيبك. آخر هبّات مدينة الرياض الحبيبة كانت مطاعم فطور غالية تسوّي نفسها بوفيّات رخيصة، ليه؟ لأننا ناس بسيطين ندوّر على تجربة صدقية.. بس عجّازين نروح لأم الحمام رغم انها تبعد ١٥ دقيقة من شمال الرياض. التجّار الأذكياء استغلوا عجزنا هذا، وجابوا منتج بجودة عادية يعطيك إحساس الجودة العالية.. والشيء الوحيد العالي عندهم هو أسعارهم. ما نلوم التجّار، لأنهم أذكياء، عرفوا من وين تؤكل الكتف..بس هل أنت بعد ذكي، تعرف من وين تؤكل الكبدة؟

هذي لستة لبوفيّات الرياض اللي تقدّم ساندويتشات وصحون الفطور المحليّة، بس لكثرتهم وتنوعهم قرّرنا نحدّها على ساندويتشات الكبدة، مع ذكر واحد للشكشوكة. 

أفضل ساندوتش كبدة بالتاريخ. 

أغرب معلومة بتمر عليك اليوم هيّ أن سكّان حي أم الحمام كلهم يفطرون زين. ليه؟ لأن عندهم هذي البوفيّة اللي تقدم ألذ ساندويتش كبدة بالعالم، هذي البوفيّة الصغيرة موجودة في أم الحمام الشرقي تفتح بعد الفجر وحتى الظهر، وتقدم صاروخ كبدة بالجبن وصحون الكبدة مع شوربة مجّانية إذا بتأكل عندهم. جرّب السفير الصيني هذي الكبدة، وعلّق عليها وقال انها لذيذة جدًا.

تبي تصوّر مع اللي صوّر مع كل أحد؟ أفطر في بوفية فهد

 إبراهيم الفريّان أسطورة سعودية عبر التاريخ، صوّر مع أشهر لاعبي العالم، وغالبًا فطر في أماكن كثيرة حول العالم. بس وين يفطر إبراهيم الفريّان في الرياض؟ عند فهد، أشهر كبدة حاشي بشرق الرياض من ٢٥ سنة ما تغيّرت كبدة الحاشي عندهم، والعم فهد، أو أبو خالد، صاحب المطعم موجود ويساعد الزبائن بنفسه ويحرص كل الحرص على رضاهم. تلقاه هناك من الفجر حتى الظهر يوميًا يشرف على المطعم. 

بعض الأشياء زي الذهب ما تصدّي، زيّ بوفيّة الشباب اللي موجودة في شارع العصارات التاريخي بالملز. لهذا المطعم ثقافة خاصة ومناظر حصرية زي المنظر الجميل لكومة ساندويتشات صامولي الجاهزة للحشو في الصباح، تتزايد وتتناقص بالاضعاف في كل دقيقة، وسرب من الموظفين يشتغلون بكفاءة مصنع ألماني أو خليه نحل وراء طاولة الطبخ اللي تشبه السجن بعواميدها المعدنية، لكن نتحمل منظر السجن هذا لساندويتشاتهم اللذيذة، لأي درجة لذيذة؟ مجموعة من الجالية السودانية في الرياض بعدما رجعت للخرطوم فتحوا نسخة مطابقة من بوفية الشباب هناك، واستخدموا فيه كلمة عادية في السعودية، لكن خليعة في السودان: شكشوكة.

فيه أشياء من سهولتها ما تقدر تميّز بين الجيد والردئ منها، زي الشكشوكة، كل أحد يقدر يسوي شكشوكة لذيذة لكن مو كل أحد يقدر يتميز فيها، بوفيّة سلة الموائد هي بوفيّة بدأت بفرع واحد ثم توزعت حوالين شمال الرياض.. وعندنا تعليق واحد عن شكشوكتهم: ذايبة.  يعاملون البيض زيّ ما يعاملون الزبدة: يذوبونها. وشكشوكتهم هيّ بلا شك الأفضل في الرياض. 

هكّر مرسول! 

كل المطاعم اللي فوق غالبًا زحمة، بس أفضل نوع من الزحمة: زحمة ناس جايين يفطرون، مب يصورون فطورهم. 

في تطبيق واحد بس يقدر يجيب لك المطاعم هذي، وشّو؟ مرسول. راعي هذي اللستة اللي عنده ميزة حقيقية: اذا طلبت منه يقدر يصف بأي طابور وبأي زحمة! 

بس لو سمحت، إذا كان المحل زحمة مره، أحسب حساب مرسولك بالطلب.