السعوديين يتقهوون أكثر من اللازم

تاريخ النشر 2023-02-15

كلنا ندري انّك ما تحتاج تتقهوى، تحتاج تتمشى، تتميلح، تشوف وتنشاف، تضيف وتنضاف، تغمز، تقمز، تحتاج تسوي كل شيء.. إلا انك تتقهوى بس برضه تروح وتتقهوى. وش اللي حادك؟

مافيه شيء حادك، بس مافيه مكان ثاني ممكن تروح له. تفتح السالفة هذي مع أخوياك يوميًا، كلكم تدورون الجدول المنشود، نمر هذا وبعدين نروح لهذا وما ندري اذا هذا بيجي معنا اليوم ولا وحوار طويل جدًا ينتهي بتنسيق طلعتكم عشان تروحون لـ مقهى.. “تشربون قهوة”.. ما تحتاجونها.

روّاد الأعمال لاحظوا الفراغ هذا، وقرروا يملونه بكمّية هائلة من المقاهي لدرجة ان الرياض أصابها تخمة من المقاهي، ما بقى أسامي للمقاهي، ما بقى كلمة من ثلاث حروف ما صارت مقهى ولا بقى مراية في السوق ما شَرَوها أصحاب المقاهي عشان تأخذ صورة لنفسك وأنت تشرب قهوة.. ما تحتاجها.

ليه نقول انك ما تحتاج القهوة؟

لأن القهوة إدمان، ‏يوميًا يقدم الكافيين نفسه كأنه الحل الوحيد للمشكلة التي يخلقها الكافيين.. وأنت فعليًا ما تحتاج كافيين، البشرية ما اكتشفت القهوة الا حديثًا، قامت كل الحضارات بدون ما نصب كوب قهوة واحد. طيب وش تحتاج؟ تحتاج تطلع تتنزه وتنبسط وتشوف الناس، لأن هذا اللي تعطينا إياه المقاهي: فضاء عام.. ولا مافيه مكان ثاني بالعالم يفتح فيه المقهى ٥ المغرب ويقفّل ثلاثة الفجر. 

في هذي اللستة فيه ستة مقاهي ننصحك فيها، تذكّر ان هذا رأي محايد وما نقبل المقاهي هذي تعطينا ولا ريال. 

صورة اللستة من عدسة تسنيم سلطان 

المقهى الأول

مقهى وكف

تبي تجرّب سماحة أهل الأحساء بكوب قهوة؟ جرّب المقهى هذا اللي اسمه مكوّن من ثلاث حروف.. داخليته بديعة واللي يجمله أكثر وأكثر هي الإختراعات الغريبة اللي يخلقونها زيّ الكوكيز الحساوي. 

جاء للرياض من الأحساء وتقدر تلاحظ هذا الشيء بتصميم المكان بتلقى زخارف شرقاوية أو عواميد تشبه عواميد ميناء العقير عندهم، عنده عدة فروع في الرياض الآن ويمكن يصير مزدحم بالليل شويّ بس للبعض هذا السبب الوحيد اللي يخليهم يروحون.


المقهى الثاني

مقهى نمق

برضو من ثلاث حروف، فتح مقهى نمق فرعه الأول في السويدي والآن فرعه في أنس بن مالك هو الأهم له، هذا الفرع الكبير يشتغل أربعة وعشرين ساعة ودائمًا مزدحم مساءًا لدرجة انك لازم تحجز طاولتك قبلها بساعة. ليه مزدحم؟ نتوقع الناس يجون عشان يتفرجون على الكائنات الغريبة اللي موجودة هناك: في مقهى نمق بتلقى سلاحف وسمك في النافورة، وعصافير تغرّد وتجمّل المكان. 

ايضًا مقهى نمق عندهم فعاليات موسمية ومطبخ يقدم وجبات فطور لذيذة. 


المقهى الثالث

مد ساج

في هذا المقهى فيه حرب حقيقية تقوم على المقاعد، لأن المقهى هذا صغير نسبيّا وإطلالة رائعة كليًا بالأماكن المحدودة فيه هي للمحظوظ اللي يجي بدري، يطل على ممشى الغدير اللي بيزدحم أول ما يتحسن الجو في الرياض، أو بعد ما يبدأ موسم الرياض اللي أعلن عنه معالي المستشار تركي ال الشيخ أمس. 

المكان رائع، مريح للأعين ومن جمال الديكور ايّ صورة تأخذها فيه بتطلع فيها حلو.. ويشغلون موسيقى جاز جميلة جدًا تغنيك عن لبس سمّاعات والإستماع للموسيقى الخاصة بك، الا لو تبي تسمع بشير شنان. 


المقهى الرابع

الوعل البري

مقهى الوعل البري هو مقهى جاء لنا من حوطة بني تميم ومن هنا جاء الإسم.. في المقهى عندهم فريق متخصص بإنشاء منتجات جديدة مثل مشروب الكركديه اللذيذ عندهم، اللي يسمّونه "أروى"

يزيّن المكان باب نجدي قديم، من حجمه الكبير يبدو انه باب قصر وليس بيت طيني عادي، يقدمون فلات وايت لذيذ وعندهم قهوة سعودية! 


المقهى الخامس

اكسير البن

هذا المقهى هو أبو المقاهي في الرياض، هو اللي بدأ الشكل الجديد للمقاهي: مقاهي تروح لها عشان تقابل ناس رهيبة فيها! 

لكن فرعهم في حي الحمراء هو اللي شد انتباهنا، بتصميم مكتب شهد العزاز للعمارة هذا ما يعتبر مقهى، هذا يعتبر تحفة معمارية تزيّن الرياض كاملة، ما تصدقنا؟ الفرع ترشّح لعدة جوائز عالمية وحاز على جائزة تصميم المقاهي والمطاعم بالمركز الأول على المقاهي العالمية. 


المقهى السادس

جافا تايم

بتستغرب وجود جافا تايم في القائمة، جافا تايم معروف وقديم وما تغيّر أبدًا، الكلام هذا صحيح ما عدا آخر فقرة.. جافاتايم تغيّر كثير في السنتين الأخيرة طوّر من منتجاته وحسّن من جلساته، كل فروعه الآن تشتغل ٢٤، وكل الفروع تقدر تطلب منها من خلال الموقع والتطبيق. 


فرعهم في حيّ التعاون هو أجمل فروعهم في الرياض، لأن الفرع هذا يقدر يصير مجلسك الخاص، تقدر تجلس فيه مع أهلك، مع نفسك، مع أحبابك، مع المحامي، مع أيّ أحد، لأنه مكان مريح فعلًا.. وإذا جعت فعندهم مخبز يقدم لك الساندويتشات الخفيفة والأكلات المنوعة. 


هكّر مرسول.. اللي يقول ويطول! 

أطلب قهوتك اللي ما تحتاجه من مرسول، وبعدين فاجئ مرسول وخلها يشربها وقل له: هذي هديّة مني! 

شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

الرياض مدينة المخابز

العشر الأواخر وقت السلطة

تجربة اليابان في الرياض