تعرف ترجمة كلمة أهلًا بالصيني؟ نيهاو! إذا كنت من سكان مدينة الرياض فلازم تتعلم هذي الكلمة؛ لأنك بتصير تقولها كثير.

في ظل غياب الأرقام الرسميّة، يقول لنا ChatGPT أن ثلث الوافدين اللي انتقلوا للعمل بالرياض صينيّين؛ وذلك نظرًا للاستثمارات المشتركة والمشاريع الكبرى.. وإذا ما صدقت أبو جبت، صدّق عيونك: رح لمطار الملك خالد أو مركز المملكة التجاري، وشف اللوح الإرشادية المكتوبة باللغة الصينية!

الصينيّين متمسّكين بثقافتهم، طعامهم، وطريقة معيشتهم.. لذلك تلقاهم إذا راحوا لدولة تجي معهم مطاعمهم.

في هذا العدد من لستة من كلماشي، بنعلّمكم عن مطاعم صينيّة أصليّة فتحت في الرياض هدفها تخدم الوافد الصيني، مب المستهلك المحلي.

كنّا محاطين بكثير من المطاعم الصينيّة الكذبيّة اللي تقدم أطباقها بأسلوب أمريكي... هذا المطعم -الله يكثّر خيره- استغلّ موقع أحدها وجدده، ثم فتح فيه مطعم صيني صدقي، حقيقي، أصلي!

شركاء هذا المطعم صينيّان مسلمان تعرفوا على بعض في معهد اللغة العربية في جامعة الإمام، واثنينهم تخرّجوا من كليّة الشريعة.

بعد ما تخرّجوا، قرّر أحمد وأبو نورة يفتحون مطعم لربعهم بعد ما زادت أعدادهم في العاصمة. أصحاب المطعم جدًّا لطيفين ويستقبلون جميع الأسئلة عن قائمتهم لين ما تتطمّن من اختياراتك.

ننصحك تطلب سلطة خيار بالخلّ، واللّي بالعادة يجيبونها لك قبل باقي الأطباق. الأفضل تستمتع فيها مع الأطباق؛ لأنها بتكسر ملوحة باقي الوجبة.

نوصّي بإيدام لحم العجل اللي تقدّم مع أطول مكرونة بتاكلها بحياتك؛ لأن باعتقادهم "كل ما طالت المكرونة طال عمرك".

اتفق فريقنا اللي زار المطعم أن الرز المقلي باللّحم عندهم كان ممتاز، وهذا أول دليل يثبت لك أنه محل مب أي كلام! وإذا ثقّلت بالأكل لا تشيل هم؛ لأنّهم ينهون كل وجبة بشاهي أخضر مجاني 🫖

هذا المطعم كان سرّ عند الجالية الصينيّة لسنوات عديدة؛ لأنه كان مخفي داخل بيت في شارع التخصصي، وكنت تحتاج تدخل له بالدس؛ لأنه كان مطعم غير قانوني بدون تصريح. اليوم، صار مطعم سهل الوصول ولا تحسّ أنك داخل في خصوصيات العائلة اللي تشغّله.

بديعة الشرق يحبّون الأشياء الضخمة: مساحات واسعة، ومنيو يمتّد لصفحات عديدة، والخبر الحلو: حتى أطباقهم كبيرة!

‎ 

إذا ما تحبّ البهارات الثقيلة ويهمّك ديكور المطعم، فيمكن هذا الخيار مب لك. إذا جوّك التجارب التقليديّة، ننصحك بهذه الأطباق:

أجنحة الدجاج الحارّة، وجذور زهرة اللّوتس المقليّة اللي طعمها زيّ البطاطس، وحلى مصنوع من عجينة مطبوخة بالبخار أرنبيّة الشكل ومحشوّة بالحليب المكثّف المحلّى. من قال أننا طلبناه عشان شكله؟

صاحب المطعم شاب صيني يتكلم العربيّة واسمه أنس، إذا شفته سلّم عليه وقل له أنك جاي من طرف كلماشي، وبيضيّفك من ثلاجة الآيس كريمات الصينية!

هذا مب مطعم؛ هذا أكبر تجمّع للمنتجات الآسيويّة بالرياض! بدأ في الإمارات، ثم فتح في مدينة الرياض، وضجة افتتاحه سببت انتشار عالي تخطى الأجيال والجنسيات.

إذا رحت لجلسات المطاعم، بتلقى عوائل صينيّة، وفلبينيّة، وكوريّة، وبرضو سعوديّة. كلّهم جايّين يدوّرون تجربة آسيويّة تقليديّة.

ويمارت يخلّيك تعيش أصدق تجربة تعيّشك أجواء الصين؛ الكثافة السكانيّة في السوبرماركت تحاكي أسواق الصين. هذا ما يعني أنه مب نظيف، المكان نظيف ومنظّم بطريقته الفوضوية.

ويمارت عبارة عن مجمّع من دورين:

الدور الأرضي عبارة عن سوبّر ماركت كبير، فيه قليل من اللّي تعرفه، وكثير من اللّي ما تعرفه بس تتحمّس تجرّبه. في نفس الدور، فيه ساحة مطاعم تتكون من ٧ محلّات للأكلات والمشروبات الآسيويّة المتنوّعة.

‎ 

ليه نرشّح ويمارت في لستة كلّها مطاعم؟ لأنها فرصة تكتشف الأكل الصيني بطريقة تناسبك؛ إذا ما تحب الحرارة، خفّفها... إذا ما تأكل أكل بحري، استبدله باللحم... وإذا كنت نباتي، فأنت لقيت المكان المثالي لخدمتك 🥕

هذي بعض الطلبات اللّي أعجبتنا:

دجاج صيني باللّيمون والعسل والسمسم، والنودلز الصيني من هوت بوت، والبان كيك الصيني بكل أنواعه. أما المشروبات، ننصحك بشاي البوبا.

في الدور العلوي فيه مطعمين آسيويّين يوفّرون تجربة غير ساحة المطاعم. التجربة عندهم مختلفة ماديًّا ونفسيًّا؛ لأنك بعيد عن الزحام.

فيه تغشيشة بويمارت ما يدري عنها الكل -مع أنها مكتوبة بلوحة كبيرة-:

إذا أخذت أيّ وجبة من ساحة المطاعم ب ٢٨ ريال أو أكثر، تقدر تأخذ مشروب كبير بارد بريال! العرض يشمل مشروبات محددة، لكنّها تسوى، وتقدر تستفيد من العرض من يوم الأحد إلى يوم الثلاثاء.

هذا المطعم الصغير انمدح لنا كثير. أول ما تدخله تتفاجأ أنّه -بعكس المطاعم الصينيّة الثانية- جميع طاقمه هندي! بس اللي يطمّن: الشيف الرئيسي وصاحبة المطعم صينيّين. الصدق شكّينا أنّنا بالمطعم الخطأ، لين ما دخلوا حشود من الزبائن الصينيّين. بعدها، وضح لنا أنه مكان تجمّع رجال الأعمال الصينيّين لاستراحة الغداء.

مدى التميّز ما شدّوا حيلهم بالاسم العربي، لكنّهم شدّوا حيلهم في ديكور الغرف الخاصّة؛ غرفهم الخاصّة هي المكان المناسب لمناسبة مميّزة.

‎ 

بالنسبة لفريقنا، كان المنتو المشويّ على المقلاة بالدجاج والروبيان أفضل طبق في جولة المطاعم الصينيّة! يجيك مع خليط من الخلّ الصيني، وصلصة الزيت بالفلفل. ينصحون بعد باللّحم الستير فراي مع الكمّون.

تحسّ بالضيقة؟ هذا المطعم يشرح صدرك!

وش السرّ؟ ديكور مب متكلّف، وصاحبة المطعم خديجة كريمة جدًّا بلطفها. إذا سألتها عن ترشيحاتها للطلبات، بتخدمك بخيارات متنوّعة وبتعطيك قصص تاريخيّة وثقافيّة عنها.

الطبق اللي نصحت فريقنا فيه كان شوربة مرقة لحم الضأن مع الفطر الصيني والمكرونة. هذا الطبق تشكّلت قصّته قديمًا كجسر بين الصينيّين والتجّار المسلمين من طريق الحرير.

‎ 

غير أن المحل بكبره قصة، أجدادها أسّسوا هذا المطعم في عام 1844م، واليوم عندهم فرع في شياونانمن بالصين -ويديره أخوها- وفرع بالرياض.

نوصّي بعد بالنودلز الباردة باللّحم، خصوصًا في أيام الصيف الحارّة.

‎ 

في يوم عمل اعتيادي، خطط زميلنا فارس للعمل في مطاعم صينيّة مختلفة ما قد سمعنا عنها عشان نجرّب أطباق ما عمرنا جرّبناها. راحوا عمر ومحمد مع فارس في يوم كان مليان ثلاث كلمات: أكل أنمي، ولابوبو، وتشي-تشي.

بالمناسبة، تقدر تشيّك على قائمة المطاعم اللي تكلّمنا عنها في هذه اللستة من خلال هذا الرابط!

شكرًا لكم، كان هذا المنشور أحد أعداد لستة من كلماشي.

عجبتك اللستة؟ شاركها في قروب العائلة لو سمحت!