وين تأكل برنش في الرياض؟

تاريخ النشر 2023-02-15

هل عندك قروض؟ ما تنفع لك اللستة هذي. لأن هذي اللستة مخصصة لوجبة البرنش، اللي هي وجبة للناس اللي ما يلاحقهم هم، ما عندهم مسؤوليات ولا مشاكل لدرجة أنهم قرروا يأكلون وجبة قبل الغداء وبعد الفطور.. 


تتوقع انه وجبة هامشية يأكلونها ناس قليل في الرياض؟ غلط عليك، اطلع نهار يوم السبت وشف بعينك المنافسة الكبيرة على طاولات البرنش، في يوم السبت يتحولون بعض الأمهات اللطيفات الودودات لجنرالات حرب يحاولون يحصلون على حجزهم في المطعم الفلاني أو طاولتهم في المطعم العلّاني. 


وشو البرنش؟ مب فطور متأخر، ولا غداء مبكّر. البرنش هو وجبة جديدة تتوسطهم ولها قاعدة وحدة: مافيه أيّ قواعد، تقدر تأكل اللي تبيه، تشرب اللي تبيه، مع اللي تبيهم في المكان اللي تبيه. 


بس باللستة هذي حدّدنا أربعة أماكن، وخامسهم فعالية! قبل لا نبدأ فيهم نبدأ بالكاركتير، الرسّام أحمد باوزير في إجازة مدتها أسبوعان، ويشارك معنا اليوم عمر الماضي.


المطعم الأول

أوپلا

هذا المكان صغير و ملموم لكن مليان بروح  الضيافة. جلساته الداخلية كأنها مراية كبيرة تعكس أشعة الشمس بكل مكان، 

مطبخهم الصغير يطلع أطباق كبيرة في عيوننا،  مثل الكاتشيپوري الي هي أكلة فطور قوقازية من جورجيا مكونة من فطيرة خبز مع الجبن والبيض والـ كروك مادام، اللي هي حرم الساندويتشة المشهورة كروك مسيو، لكن فرقها عنه ان فوقها بيضة. 


أطباقهم مبتكرة ولذيذة، لكن الطبق اللي أعجبنا أكثر شيء عندهم هو ساندويتش الستيك مع البيض، اللي بالنسبة لنا هو واحد من أفضل سندويتشات الفطور في الرياض. 

المطعم الثاني

الجازي

هذا المطعم يقدّم تجربة مميزة: إطلالته! جلساتهم العلوية المكيفة توريك مشهد بانورامي على طريق أبو بكر الصديق رضي الله عنه، أكثر طرق الرياض ازدحامًا مؤخرًا. مهما كانت تجربة الأكل هناك الإطلالة هذي بلحالها تكفّي انها تثري وقتك، ما فيه شيء ممتع قد إنك تشوف ناس مستعجلين ومتقروشين وأنت قاعد تشرب قهوتك. 


صاحب مطعم الجازي صالح الحداد من عائلة ذويقة محبة للطبخ السعودي و العربي و العالمي، عشان كذا تلقاهم يبدعون في مطبخهم أطباق تخليك تنبهر مثل: السوشي أومليت وجبنة الفيتا بريوش بالعسل، 


من وين جاء البرنش؟

البرنش وجبة ما ندري من وين جتنا، فيه بعض مؤرخي الطعام يتوقعون انها جايّة لنا من ثقافة الصيد البريطانية، لأنه كانت وجبة خفيفة يتناولها الصيادين وعائلاتهم قبل الصيد، وبعض المؤرخين ينسبونها لعادة كاثوليكية حيث كانوا المسيحيين يصومون يوم الأحد ويكسرون صيامهم بعد القدّاس مباشرة عليها، محد يدري لكن بالتأكيد انها عادة ما جت مننا لأنه عرف عن العرب انهم يأكلون في طرفي النهار*. 

لكن حنّا نعرف من وين جتنا كلمة برنش**، وهو تلاعب طريف بالأحرف دمجت فيها كلمتين فطور وغداء بالإنجليزية، طلعت لنا الكلمة هذي أول مره في قطعة كوميدية في مجلة الصيّاد الأسبوعية سنة ١٨٩٥، تحت عنوان: (البرنش - الحجة والبراهين) وصف فيها الكاتب البريطاني قاي براينقر البرنش على انها "وجبة سعيدة، واجتماعية، ومثرية. تحفّز السواليف وتعدّل مزاج الإنسان. تخليك راضي عن ذاتك وذوات الآخرين."  حاولنا ننحت مثل كلمة برنش للعربي، غدور، فطرغ، فداء.. ما ضبط معنا واقترح طبّاخ كلماشي عبدالرحمن العريفج: وجبة الضحى كترجمة مجازية لها. 

* الحين العرب يأكلون طول الوقت. 

** المصدر 
 

المطعم الثالث

دقيق وحطب

اسم المحل دقيق وحطب، وهذا يبرر الخشب الكثير اللي مستعملينه في ديكور المطعم الداخلي، عندهم جلسات داخلية وجلسات خارجية في بلكونتهم اللي تطل على أشجار حي السليمانية المعروفة. المكان له رائحة مميزة جدًا من المخبوزات اللي توها طالعة من الفرن، لأن هذا المكان مب مطعم، هذا مخبز. 

عندهم أطباق منوعة ولذيذة جدًا مثل الشرقية منها المناقيش والبيض الشرقي، والغربية زي صواني الجبن، اللي مفروض نبدأ نسميها نواشف، ومثل ساندويتش البيكون مع الجبنة المشوية والبصل المكرمل وشرائح رقيقة جدًا من التفاح الأخضر. لا تطلع من هذا المطعم إلا وأنت محلّي على كيكة الريحان وزيت الزيتون.


المطعم الرابع

بريكي

البس قميص هاواي ورح لهذا المطعم الجديد في الرياض، المكان مشرق وبيذكرك بآخر إجازة رحت لها استمتع، وكذا يقولون الشباب السعودي اللي فتح المطعم، يقولونهم انهم حاولوا يجيبون شعور جزيرة "بالي" الاندونيسية لمدينة الرياض. 


احجز طاولتك هناك واستمتع بقهوتهم الممتازة أو تصفّح المنيو حقهم قبل لا تقرر انت تطلب البريكي توستاداس، وهي وجبتنا المفضلة هناك، عبارة عن رقائق تورتيلا هشّة محشوّة بالأفوكادو على سطحها بيضة مشمسة سعيدة. 

هذا مب إعلان! كلماشي هي منصة محتوى مستقلة، أعرف عنا أكثر في صفحتنا التعريفية، اضغط هنا.

حنا وعدناكم بخمسة برنشات صحيح، بس ما وعدناكم بخمسة مطاعم، الخيار الخامس هو الوجبة المستحيلة، وهي وجبة ممكنة فقط خلال نصف ساعة باليوم، الوجبة من ابتكارات فريس، بطل برنامجنا الجديد: مطبخ فريس، أول حلقة من حلقات هذا البرنامج بتنزل يوم الإثنين الجاي! 

دجاج مع وافل

الدجاج مع الوافلز هي أكلة طلعت لنا بالقرن السابع عشر في أمريكا من اللاجئين الهولنديين في بينسلفينيا، ولها نسخة ثانية في مطبخ السول جنوب الولايات المتحدة، يستخدمون فيها الدجاج المقلي. لكن نسخة الوافل الهولندية أقدم منها وازدادت شهرتها بعد ما تقضّى توماس جيفرسون ٤ مكائن وافل في زيارته لأمستردام عام ١٧٨٩. 


الوجبة المستحيلة

اذا تحب الحالي والمالح جرب تخلط فروج الطازج المشوي مع وافل كودو.  بس عندك نص ساعة فقط عشان تسوي كذا. 

فطور كودو ينتهي الساعة ١١:٣٠، مطاعم الطازج تفتح الساعة ١١:٠٠ يعني عندك نص ساعة بس عشان تقدر تسوي الوجبة هذي. 


تقدر تجدول مع مرسول أحد يجيب لك الوجبة المستحيلة، بس لازم تذوقه اياها! 


شارك هذي اللستة

التعليقات


بعتمد لستاتكم اذا نزلت الرياض وبيجي اقوى ماراثون اكل

قبل عام واحد - عبدالله
عطنا رأيك

تبي تقرأ لستات ثانية؟

لستة البيتزا

من وين تاكل كيكة؟

وش تأكل بعد الواحدة فجرًا؟