مطعم هذا الأسبوع خليجي بامتياز، يقدّم مشويات بحرينية تخلّيك تبي تكلّم العمبلوص. 🚑
يا رب يعجبك! علمنا بتجربتك للمطعم ورأيك بالنشرة من هنا!

‎ 

‎ 

‎ ‎ 

‎ 

مطعم صويّخ تكة افتُتِح لهدف واضح: يبون المطاعم الخليجية الشعبية تاخذ حقها بالسوق، سواءً عند أهل الرياض، أو السياح اللي يجونا من حول العالم.
يعتبر من أول المطاعم المختصة في المشاوي البحرينية بالرياض، استلهموا من مطاعم كثير ما بين البحرين والكويت، ومنها مطعم المحرّق العريق صبر أيوب للتكة البحرينية.

صدّق أو لا تصدّق: من أوائل المطاعم اللي أكل فيها القنصل الإيراني بالسعودية هو صويّخ تكة! توقُعنا الشخصي هو لأنهم يقدمون رز إيراني-بحريني (بالزعفران)... يمكن حنّ لأكل يشبههم؟ يمكن.

‎ 

أول مؤشر إيجابي: الطاولات يغطّونها بسفرّ بلاستيك عشان تاخذ راحتك بالأكل، يعني اترك كشختك عند الباب وكلّ وأنت مستمتع.

بمجرّد ما تشوف كرّاث -أو مثل ما يسمونه البحرينيين, بقل- بتعرف إنها بتكون وجبة ممتازة. التكّة البحرينية عادةً تتقدم لك مع طحينية، بقل، وبصل. وأهم شي بالوجبة: اللحم المشوي وخبز توّه طالع من الصاج

المنيو حقهّم يتطوّر بشكل مستمّر، بس ما زالت أشهر أطباقهم هي التكّة بكل أنواعها…وخصوصًا تكّة اللحم.

صبرنا على أيوب متأملين إنه يجي للرياض، بس جاء اللي أحسن منه: لأن في صويّخ تكّة قطع لحمهم أكبر، ولوميّهم حامض أكثر!

للي أولّ مرة يجرّب تكّة اللومي، بس حبينا ننوه إنه طبيعي لون اللحم غامق ولا يعني إنه محروق.

هذا الخيار للي يفضّل حموضة اللحم الموزونة؛ الروب يضيف للطبق نكهة رهيبة وتخلّي اللحم أطرى.

إذا كنت مزكّب، نرشّح تشريبة اللحم. عبارة عن خبز مغطّي قاعِدة الطبق، وفوقه لحم بالمرق والبامية.

دخّلوا هالطبق قبل ٩ شهور، وشهرته في تزايد يوميًّا! إذا اشتهيت تغيّر عن اللحوم، جرّب تطلب تِكّة سمك الفيليه مع الرز.

محتار ولا عرّفت وش تطلب؟ جرّب أفضل الأنواع عندهم مرة وحدة! هذا الطبق يشمل ٣ أنواع لحم: اللومي، والروب، والكباب.

إذا خلصت أكل، برّ بأهلك واطلب حلى إلبه. شكله كأنه كريم كراميل، لكن قوامه أقرب للسان سيباستيان… بس بالهيل والزعفران. ويبيلها معه شاهيّهم الخادر.

كانت هذي لستتنا الرابعة عشر ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب