الرياض في الفجر لها صوت خاص فيها، صوت الهدوء، وصوت الصخب. الأصوات هذي مميّزة لأنك تقدر تسمعها بقلبك. الرياض هادية بالليل، مثل صوت خطوات القطاوة في شارعها وهم يتأهبون لغزواتهم اليومية في حاويات القمامة، والرياض صاخبة بالليل، مثل صوت سمّاعات سيّارة مسرعة في الدايري. 

تبي تسمع جديد عالم الشيلات الموسيقية؟ وقّف على حافة مخرج من مخارج الطرق السريعة في الرياض، بتجيك أنواع مختلفة من المركبات اليابانية الكبيرة اللي تعتبر السرعة القانونية هي مجرد اقتراح، وعشان كذا ما راح تسمع الا اجزاء بسيطة من الاغنية.

لستة اليوم مختلفة نوعًا ما، ما فيها مطاعم كثير، بس فيها جدول لحياة الرياض بعد منتصف الليل، ساعة بساعة.

عشان ما تصير اللستة غريبة عليك مرّه، لازم نبدأ بمطعم. صح؟ 

مطعم "سو" هو مطعم راقي عندهم منيو يصنفونه "تجريبي"، ما يلتزمون بمطبخ معيّن وعندهم كل شيء.. هذا من نوع المطاعم اللي تخلّي امك تشكرك انك عزمتها عليه. 

في يوم الجمعة يمددون وقت إغلاقهم لبعد منتصف الليل لأنهم يقدمون وصلات موسيقية خاصة ومناسبة انك تبدأ رحلة الفجر فيها. بس فضلًا، اذا رحت مطعم سو علّمنا اذا كانوا يشغلون هناك أغنية سو يا سو، حبيبي حبسوه؟

 في وقت ما بالماضي، كان أقرب دور سينما لك في الرياض تبعد عنّك أكثر من ٤٥٠ كيلو، ولازم تتعامل مع زحمة جسر المعلق. اليوم الدنيّا تغيّرت، الرياض فيها أكثر من ٢٥ صالة سينما بالرياض، ومع تزايد الاستثمارات في الأفلام والترفيه بنحتفل قريبًا بإفتتاح ١٠٠ دار سينما. 

الساعة ١، بداية الفجر، وش تشوف فلم؟ 

عينك لازم تصير على أفلام عيالنا. دور السينما اليوم فيها فيلمين لازم تشوفهم:

هل كنت تشوف سكتشات تلفاز على يوتيوب؟ هل كانت تضحكك؟ اذا لا، لا تقلق. الفلم هذا مهب سكيتش تلفاز طويل، هو فلم مكتمل بقصّة ممتعة وبجوّدة إخراج عالية. فلم طالع من واقعنا وقدر يتخيّل عالم يشبهنا، بس نفس الوقت غريب مره عنّا. 

المصارعة الحرّة لها جمهورها، بس الكوميديا النظيفة كل أحد يحبّها، لا يفوتك عبدالعزيز الشهري وهو يطحن أسنانه في كل جملة يقولها، ولا تفوتك مشاعر الحب البريئة بين ابراهيم الحجاج وشهد القفاري. يناسبون بعض. ❤️

وش أكبر عملية إحتيال صارت بالمملكة؟ موية أم ريال اللي يبيعونها المقاهي بخمسة؟ غلط. أكبر عملية إحتيال صارت بالمملكة هي القصّة اللي يتناولها الفلم هذا، قضيّة رجل أعمال سرق مليار و٤٠٠ مليون ريال من ٤٠ ألف مستثمر. 

الفلم مكتوب صح والقصة نفسها مثيرة للإهتمام، لكن في هذا الفلم خيرية أبو لبن وفيّ فؤاد وفاطمة البنوّي يقولون لسعوديين لا تقلقون: بيصير عندنا نجمة طاغية قريبًا مثل ما مصر عندهم فاتن حمامة وسعاد حسني وتحية كاريوكا.  ولازم يتأكدون السعوديين من شيء في هذا الفلم: إسماعيل الحسن رهيب. 

كيف علاقتك مع البودكاست؟ غالبًا اذا كنت تسمعه فأنت تسمعه بطريق الدوام بنص الزحمة. جرّب مره تسمعه بالليل، جرّب مره تسمعه بدون ما تقاطعك أصوات البواري، جرّب تسمعه والدايري فاضي. 

الدايري وهو فاضي مغري بأنك تسوي أشياء تخليك تروق، عشان كذا نقترح لك بودكاست هادئ جدًا وهو بودكاست الفجر من ثمانية. تعرف وشلون اذا فتحت أخبار دايمًا تحس ان نهاية العالم قرّبت؟ فيه ازعاج كثير ودوّامة من الأخبار السلبية؟ بودكاست الفجر يسكّتها. يجيب الأخبار المهمة فعلًا ويحطها لك بسياق واضح. 

ميزة البودكاست ان مدته قصيرة جدًا، عشر دقايق، يقدمون لك محتوى خام يساعدك تبدأ تهوجس عنه. 

جاء وقت العشاء الثاني؟ عادي، معذور. الدنيا شتاء. بنعلمك عن مطعم خندلة في العزيزية، هذا المطعم مشهور جدًا هناك ويقدم شاورما جنوب الرياض (شاورما دجاج بالسلطة)، وش معنى اسمه؟ الخندلة هي امتلاء الجسم بالدهون. وهذا وعدهم مع كل شاورما. جت الساعة ٣؟ جاء وقت الخندلة.

عربات الشواهي في الرياض تتكاثر في حالة مشابهة "للتبرعم" في عالم الأحياء، كل يوم تفتح عربة شاهي جديدة على رصيف في شارع ما. وأول ما تفتح يمرون ناس بجنبه ويقولون والله فكرة! خنفتح بجنبه. وكذا صار عندنا مئات عربات الشاهي في الرياض. 

الهبّة الحين هي شاهي بغداد، وهو شاهي أحمر مدخن بطعم مميز جدًا، اذا كنت سهران فالفعالية المفضلة هي انك تأخذ كوب شاهي عراقي في حيّ حطين وتروح تشربه وأنت تدور حول بيوت الأغنياء تتفرج عليها. دوّر البيت اللي عندهم مسبح بالدور الثاني.

لو قلت لأحد في الرياض تعرف اليوقا عام ٢٠١١؟ بيقولك لا انا ما أحب الاكل الياباني، لكن اليوم ثقافة اليوقا انتشرت في الرياض، للأسف ما تقدر تسوي يوقا في حديقة من حدائق الرياض بالصبح، لأنهم بيتنمرون عليك ولأن أصوات البواري بتزعجك. 

جرّب تروح لحديقة الرحابة بالليل، لأنه مكان معزول عن باقي المدينة، ومليان شجر كأنه رئة لحيّ الوزارات. 

جرّب تقعد تتربع وتشم الهواء، وجرّب كل وضعيات اليوقا الغريبة زيّ وضعية مواجهة الكلب السفلي ووضعية الإكليل، عادي لا تتفشل محد فيه عشان يشوفك. 

مازلنا في حي الوزارت، بس عندنا لك سؤال: الساعة ستة الصبح، تأكل أكل هندي ليه؟ الإجابة: لأنه فاتح. هذا المطعم عنده ثلاث فروع في الرياض، وفرعهم في حيّ الوزارات يفتح ٢٤ ساعة، ليه؟ عشان اذا اشتهى وزير الصحة تشكن تكّا مسالا الساعة ستة الصبح يخدمونه من عيونهم. وعندهم عصاير بهلوانية زي اللي بصورة! (يعني طعمها يناقز بفمّك)

الساعة كم؟ جاء وقت الشروق؟ خلص الفجر؟ اذا اتبعت جدولنا فأنت سويت التالي: شفت فلم، سمعت بودكاست، شربت شاهي، سوّيت يوغا، أكلت طعام هندي، وتخندلت. هذا مب جدول انسان طبيعي، لكنه جدول ممكن في مدينة الرياض. 

كل ليلة من ليالي الرياض تحمل رحلة جديدة، جداول عديدة، وكل ليلة لها ختامية فريدة: شروق الشمس. 

المشهد جميل من كل زاوية، لكن ودّنا في كلماشي نعلّمك عن أزين مكان تقدر تشوفه فيه: مطل أبو هارون في حيّ الرائد. 

هذا المكان العالي في غرب الرياض يوريك مدينة تتغيّر يوميًا وتتشكّل حسب رغبات سكانها، تبي يوغا؟ فيه. تبي شاهي؟ فيه. أنت بس اطلع والرياض بتعطيك اللي تبيه. زي الفطور مثلًا. 

جاء وقت الفطور؟ شيّك لستة ٦ من كلماشي: افطر في بوفيّة ما تسوّي نفسها بوفيّة.