تقهويت؟ سؤال تسأله لنفسك ثلاث مرات باليوم، في الصبح، وفي المغرب، وإذا صدّعت. في هذي اللستة ما عندنا جواب لهذا السؤال، بس عندنا جواب للسؤال اللي بعده: وين تتقهوى؟ 

أهل الرياض يحبون ثلاث أشياء: المركز المالي، مستشفى سليمان الحبيب، والمقاهي المختصة. بس مشكلة المقاهي المختصة انها تفتح بسرعة، ما يمديك تلحّق عليها، مين بيوصل لها أولًا؟ أنت ولا الطابور؟ 

اسبق الطابور واستخدم اللستة هذي، فيها خمسة مقاهي مختصة جديدة في الرياض. رحنا زرناهم وجرّبناهم وأعجبونا، فيه منهم مقهى خشبي، ومقهى معدني، ومقاهي على غير العادة، كراسيهم مصممة للإستخدام البشري. 

أول شيء تلاحظه في هذا المقهى: انه مخشّب. فيه خشب بكل مكان بشكل يخليك تدوّر طفاية الحريق أول ما تدخله، احتياطًا يعني.

أهم لوحة في صدر المقهى مكتوب عليها بالخط الكبير كلمة فرنسية معناتها لا أهتم، بس فعلياً صاحب المقهى يهتم، يهتم بأدق التفاصيل. وش المميز في مقهى تشينو؟ 

المقهى مليان دمى وقطع فنّية فريدة وتحف، لكن التحفة الحقيقية هيّ قهوتهم، ومب بس قهوتهم: حتى فطايرهم. بتلاحظ في هذا المقهى الجديد فرن ضخم يتوسّط المساحة ويجمّل المكان، فعليًا هو يجمّل لأنهم ما يستخدمونه، يستخدمون فرن ثاني في مطبخهم الضخم الخفيّ خلف الجدران الخشبية. 

المقهى هذا ما نستغرب اذا تحوّل لمطعم بشكل مفاجئ، لأن عندهم مطبخ مركزي و فرن جاهز للاستعمال. بس وش بيسوّون؟ بيتزا؟ ولا باستا؟ محد يدري، لكن اهتمام مالكي المطعم بالتفاصيل يخلينا نضمن انه بينجح. 

فهرس من مد ساج في حي الملك فهد هو الفرع الثاني لمقهى مد ساج المعروف بمكانه المميز في ممشى الغدير، الحين تقدر تروح تشرب قهوتهم اللذيذة بعيد عن أصوات الدبابات والتجمعات البشرية. 

بس في حيّ الملك فهد فيه تجمّع من نوع ثاني وهو: تجمع مقاهي مختصة جديدة. اللستة هذي بس فيها اثنين من هذي المقاهي، واحصائياتنا تقول ان كل ٥ مقاهي مختصة جديدة بالرياض ٦ منها في حي الملك فهد. 

اللي يميّز فهرس من مد ساج غير قهوتهم اللذيذة هو أماكنهم المريحة للعمل، وجلسة البار على منطقة تحضير القهوة، إذا جلست فيها ودك تسولف وتفضفض للباريستا لا شعورياً.. نصيحتنا لك: اسأله عن القهوة الهندية. 

هذا المقهى برضو في حي الملك فهد، والمميز فيه هو استخداماته المتعددة: تقدر تجي مع خطيبتك هنا، مع أصدقائك هنا، مع أمك هنا، أو حتى مع لابتوبك: مع إنترنت عالي السرعة ووفرة من الأفياش مافيه قائمة مهام ما تهزمها جلسة في هذا المقهى. 

مقهى حصيلة يتميز بالراحة، المكان مريح للجلوس، التصميم الداخلي والحديقة اللي بين الجلسات مريحة للعين، حتى ريحة المكان تجيب الراحة، مين كان يتوقع ان ريحة القهوة مع الأشجار حلوة؟

زيّ مافيه مقهى خشبي باللستة، فيه هذا المقهى المعدني.. مقهى فوم فرع العليا هو ثاني فرع لهذا المقهى اللي بدأ كمقهى حيّ صغير في حيّ الندى شمال الرياض، ثم افتتح هذا الفرع الجميل، معدنهم؟ فرنش توست لذيذ وقهوة. 

اطلالة المقهى الجميلة على فندق نارسيس الجذّاب بتكمّل جلستك، وقائمة الحلويّات المختلفة عندهم بتزعّل دكتور اسنانك، بس بترضّي الطفل اللي في داخلك. 

للمقهى جلسات داخلية محدودة وخارجية رهيبة، لكن سرعان ما يزدحم: عشان كذا امش على نصيحة اللستة: اسبق الطابور، لا يسبقك. 

وين تشرب قهوتك في العصرية؟ في مقهى عصري، زي مودرن في حي الملقا، تصميمه الداخلي يعطيك شعور انك في معرض فني مع اللوحات الكبيرة والأثاث اللي باللون البرتقالي المميز أو على قولتهم الأسود الجديد.

على عكس بعض القطع الفنية في المعارض، جلسات مودرن مريحة جداً للجلوس عليها، ولونهم البرتقالي مريح للعين. 

بفريق احترافي خلف بار القهوة، وعدد محدود من الحلويات اللذيذة، وفلات وايت بدون أي غلطة. عندهم برضو ماتشا، مع وجوب ذكر ان رسميًا صيف ٢٠٢٣ هو انتهاء لهبّة الماتشا وبداية لهبّة جديدة، وشّي؟ طوابير الرياض بتعلّمنا.