مطاعم الرياض تكشخ فيها

تاريخ النشر 2023-06-15

في العشر سنوات الماضية تحوّلت الرياض لوجهة عالمية للمطاعم، استوعبوا مطاعم لندن وماربيا وباريس إنهم بدال ما ينتظرون أهل مدينة الرياض يجونهم في إجازاتهم: يقدرون يفتحون في الرياض مباشرة، وهذا فعلًا حصل كثير بالسنتين الماضية. 


عشان كذا، ليه تسافر؟ اقعد. جمّع رصيد إجازات. حسب نظام العمل السعودي الشركة لازم تعوضك بأيام الإجازات غير المستخدمة بفلوس.. وأنت تحتاج هذي الفلوس إذا بتروح للمطاعم اللي بنذكرها في هذي اللستة. 


بتلاحظون شيء بمطاعم الرياض الجديدة: بعض الأطباق ما فيها اختلاف كبير بين السعرات الحرارية وسعر الطبق نفسه، اللي فيه ٢٠٠ كالوري، بيصير بميتين ريال.

ليه كذا؟ لأن الناس يروحون لمطاعم زي كذا، يكشخون ويلبسون ويطلعون ينبسطون، وإذا بيحاسبون: يعضّون على الليمون. 


زيّ ما الطيارات عندهم مطار، والسفن عندهم ميناء، المطاعم الفخمة في الرياض صار عندهم ڤيا رياض. 

بنذكر خمسة مطاعم، ثلاثة في ڤيا الرياض واثنين موزّعين حول الرياض. 

وشو ڤيا رياض؟

ڤيا رياض هي منطقة تجمّع لأفخم الماركات العالمية في كل المجالات: فنادق، أزياء، مطاعم. 

الماركات هذي ما تفتح في أي مكان، ما تفتح إلا في أفخم منطقة في المدينة، عشان كذا فتحت منطقة ڤيا رياض جدار بجدار مع الريتز كارلتون.


اللي يجمّل المنطقة تصميمها المستوحى من نمط العمارة السلماني والمستخدم في بنائه الأحجار القديمة اللي شكلت جبل طويق، تفاصيل ڤيا رياض لحالها تفيض بالفخامة، ما تحتاج الماركات والمطاعم عشان تعرف إن هذا مكان مبهر تتنزّه فيه. 


ڤيا رياض فيها فندق خمس نجوم، سينما جلسات أرضية، وسوق طعام فخم جدًا، رغم إنه مكان فخم ومبهر إلا أن مافيه دخولية. ڤيا رياض ١، ملاهي الحكير صفر. 

المطعم الأول

هل أنت قاعد تقرأ هذي اللستة في ١٥ يونيو ٢٠٢٣؟ إذًا عندنا لك خبر سعيد: واقيومافيا رسميًا فتح في السعودية. 

وشو واقيومافيا؟ هي، زي ما يقولون، عصابة جريمة منظمة تتاجر بلحمة الواقيو اليابانية حول العالم بمطاعم مختلفة. قد جربتوا لحمة الواقيو اليابانية الحقيقية؟ ماننصحكم لأنها تسبب إدمان، ثم ديون، ثم بعدين المافيا يطقون عليك الباب.


مطاعم واقيومافيا من الشيف هامادا مشهورين بأكلة الواقيو ساندو: اللي هو عبارة عن ساندوتش توست ياباني مع لحمة ستيك واقيو مقلية. من بعدهم هذا الطلب صار هبة وكثير من المطاعم استوحوا نفس الطبق، بس جرّب الأصل واشكرنا بالياباني: أريقاتو. 


واقيومافيا مب مطعم واحد بس، عندهم مطعمين في ڤيا رياض. مطعمهم المعروف واقيومافيا. و ياكينيكو مافيا. 

وهم حاليًا في جولة عالمية وتواجدهم بالرياض يدل على شيء واحد: أننا عالميين. 

المطعم الثاني

فيردي هي قصة عائلية من الفرنسيين أليثيا و جاك و ابنهم فيردناند، كانت هذي العائلة الجميلة يشغلون حانة في ضواحي باريس، وكانت هذي الحانة هيّ تجمّع مشهور للعاملين في مجال الأزياء، أكشخ فئة في العالم. 


رغم أن عارضات الأزياء مب مشهورين بالأكل، إلا أنهم طالبوا الزوجين بتقديم الطعام في حانتهم الشهيرة ومن هنا جاء لنا

مطعم فيردي، اللي بدأ يسوّي أطباق بسيطة تناسب مقاسات فساتين عارضات الأزياء زي برقرهم الشهير.


من يوم ما بدأوا بتقديم الطعام والناس الكشّوخة صاروا يروحون للمطعم بشكل دائم ويجيبون معهم الزباين الي تلحق وراهم و إذا ذاقوا البرقر صاروا زبائن دائمين. البرقر طبعًا هو نفسه اللي يحبه طفلهم فيردناند اللي على اسمه سمّوا المطعم وحوّلوا داخلية المطعم لغرفة ألعاب طفل صغير. 


هذا واحد من أشهر مطاعم العالم، تشوف فيه كل مشاهير هوليوود وبوليوود، كيم كارداشين وكاني ويست بينهم مشاكل كثير واختلاف آراء بس يتفقون على برقر فيردي.. وبيلا حديد قالت إن برقر وبطاطس فيردي هو حبها الحقيقي في حياتها، وقالت عن التشوروز اللي يقدمونه إنه هو روحها وقلبها. جرّبت فرع الرياض؟ 

المطعم الثالث

وش أحسن سوشي بالرياض؟ إذا إجابتك تيروزوشي صح عليك تستاهل آيس كريم من سري الخالد. (حلقات جديدة كل أسبوع)


السوشي أكلة يابانية إذا راحت لمدينة عالمية تتغير وتتكيف عشان تناسب ذائقتهم، ومن أوائل التحورات للسوشي هو الكاليفورنيا رول اللي صارت طلب مشهور في كل مطاعم السوشي في العالم، ولو تشوف مطاعم السوشي عندنا بتشوف إنهم يحطون قطعة ربيان مقلية كاملة ويكثرون من الصوصات عشان يصير طعمها زي الداينمايت شريمب اللي نحبه. معلومة حصرية: هذا مب سوشي أصلي.


تيروزوشي مطعم ياباني اختار إنه يفتح أول فرع له خارج اليابان في الرياض بسبب سرعة التطور الحضاري اللي تمر فيه السعودية، وهو المطعم الوحيد اللي بينقل لك تجربة السوشي الأصلية زي اللي في اليابان وأنت في الحقيقة داخل سوق طعام فخم في ڤيا رياض. ومن تجربة نقدر نقولكم إنه ألذ بكثير من السوشي المعتاد في السعودية، والخليج. 


المطعم يشتغل فيه اثنين من الطباخين اليابانيين وجميع مكوناته من اليابان، اختيار الأسماك في المطعم يكون حسب الموسم؛ لأن السوشي حقهم يعتمد على جودة الرز والمكونات، ورغم بساطة التحضير قدامك لكنه يأخذ سنين من الخبرة عشان يوصل للطعم العالي هذا.. لدرجة أن أحد الطباخين في المطعم اشتغل ١٠ سنوات في المطبخ الداخلي يكتسب خبرة لين ما وصل لمرحلة إنه يسوي السوشي بنفسه. في الفقرة الجاية: وشلون تأكل سوشي؟ 

وشلون تاكل سوشي؟

السوشي أكلة عصرية، بس تقدر تأكلها بأي وقت، مغرب، عشاء، فجر. 


هي فخر الثقافة اليابانية، أكله كشخة بالنسبة لنا، لكن لليابانيين هي أكلة شعبية.. زي المفطح عندنا. 

مبدئيًا اليابانيين سمحين، الإشاعة الكبيرة إن السوشي لازم ينوكل بأعواد الطعام، غلط.. 

الطريقة اليابانية الأصيلة هي إنك تأكلها بيدّك.


 بس للتحذير قبل ما نبدأ الشرح: إذا أنت كشخة ما يحتاج تقرأ اللي تحت، هذي معلومات مناسبة للقراوه فقط، الناس اللي للحين يقولون "دخولية" ويحسبون أن السوشي كشخة، زيّنا! 


أنواع السوشي كثير بس أشهر نوعين بتصادفهم لما تروح مطعم ياباني هم:

ماكي (السوشي الملفوف)

إذا جيت تغطس هذا النوع من السوشي في صوص الصويا المفروض تسوي غطسة وحدة سريعة على وحدة من الجهات اللي فيها رز، ولا تهزه بعد التغطيس. والأهم من هذا إنك ما تغطس شرايح الزنجبيل المخللة في الصويا أو تاكلها مع السوشي عشان ما يزعلون عليك اليابانيين، هذي الشرايح مخصصة إنك تاكلها بعد كل قطعة عشان تغسل النكهة وتذوق طعم القطعة اللي بعدها زين.


نيقيري (سوشي مضغوط باليد)

هذا النوع من السوشي من ألذ الأكلات إذا جربته من طباخ ماهر يعرف كيف يتعامل معه، أحيانًا يحط لك الطباخ الكمية المناسبة من الواسابي اللي هو الصوص الأخضر الحار ويحط لك الكمية المناسبة من صوص الصويا، في هذي الحالة تاكلها على طول. لو ترك لك الخيار تحط زي ما تحب في هذي الحالة لا تزيد كمية الواسابي عن حبة الذرة، وبالنسبة لصوص الصويا غطسة سريعة للسوشي مع الجهة اللي فيها سمك تكفي.


بس بالنهاية تقدر تأكل السوشي زيّ ما تبي، لأن مافيه شرطة أكل. للأسف.

المطعم الرابع

أجدد المطاعم المكسيكية في الرياض حاليًا،  فتح من أسبوعين في مركز الملك عبدالله المالي، 

وهو مطعم ناشئ محلّي مطبخه بقيادة الشيف ليزيت المكسيكية، الشيف ليزيت اللي تربّت في بيت من خلفية دبلوماسية 

عاشت طول عمرها تحت مهمة الترويج للثقافة المكسيكية حول العالم، وتقدر تلاحظ هذا الشيء بالمنيو الأصيل الخاص بهم: 


عندهم بوريتو، كاسديا، وأهم شيء: البيريا تاكوز. هذا الطبق اللي شفته أنت في تكتوك واشتهيته، تاكو يتغمّس بصلصة. 

وعندهم صلصة "مولي" وهو صوص شوكولاتة غير حالي مخلوط مع بعض البهارات والفلفل المكسيكي المجفف. 


المحل بحد ذاته جميل، يتجمّع حوالي طاولات التقديم نبات الصبّار والمضيف الخدوم سينيور كارلوس اللي بيجيك بابتسامة كبيرة وقميص صيفي. 

المطعم الخامس

مطعم ڤيلا ماماز جاء من البحرين وفتح في مطل البجيري بالدرعية. مطل البجيري صار تجمّع ثاني لمطاعم المطبخ العالمي، واللي يكمّل التجربة هو إنك إذا رحت لحيّ طريف التاريخي أنت تتجوّل في تاريخ السعودية. المنطقة كانت مغلقة للتحسينات وبعد افتتاحه صار وجهة جذّابة للمطاعم العالمية. 


زيّ ڤيلا ماماز، هو مطعم عالمي، بس جاي من البحرين. 


اللي فتح المطعم الشيف البحرينية رؤيا صالح، ومن ٢٠١٢ وهي تطبخ لنا من مطعمها اللي كأنه جزء من بيتها وتعامل زباينها زي عائلتها و كل يوم كأنه يوم وليمة عيد. أطباقها ووصفاتها جزء ممتد من أكلات بيتها الخاص و ذكريات وليمة الأهل و جلساتها.


جرب من عندهم الصيادية بمعبوجها الأخضر والأحمر، بتصيد جوك. 

شارك هذي اللستة

التعليقات


عبدالكريم هو -أبو ربيعة- الصدقي ❤️

قبل ٨ أشهر - Mo7ammedrumai7

احلى حساب بتويتر .. شكرا لكم وتوسعون الصدر بتعليقاتكم الخفيفه ومعلوماتكم المثريه 💛

قبل ٨ أشهر - حصه

Very helpful Thanks

قبل عام واحد - معلق سري

وين راح سان كارلو و سنيور ساسي ؟

قبل عام واحد - سليمان

من احلا الحسابات الموجوده في السوشل ميديا استمرووووووو الله يوفقكم يا رب

قبل عام واحد - Dana

انا فعلاً مستمتع بالمحتوى تعبكم وبستني بفارق الصبر البوست اللي بعده .. شكراً لذوقكم واختياراتكم الي زي الفل🤍

قبل عام واحد - Arbab
عطنا رأيك

تبي تقرأ لستات ثانية؟

القهوة تقول للشاهي: يا عمّي

كيف تصير فيقان وسعيد بالرياض؟

مطاعم الرياض تكشخ فيها