عندنا خبر حزين، وعندنا خبر سعيد. وش تبي نبدأ فيه؟ الخبر الحزين: مطعمنا المفضّل للخبز في الرياض قفّل. الخبر السعيد: مطعمنا المفضل للخبز في الرياض فتح من جديد! جاكم مطعم الأسبوع: دقيق وحطب!

بس عندنا تحديث في نشرة مطعم الأسبوع، صار عندنا أنواع مختلفة من المطاعم: 

‎ 

‎ 

‎ 

مطعم دقيق وحطب اللي متصدر قائمة اقتراحات برنش الرياض سكّر فرعه القديم وفتح فرع جديد أكبر، أجمل، وفي نفس الشارع. 

الفرع الجديد هو عبارة عن قصر من قصور السليمانية العريقة، كان فعلًا بيت مسكون وهجر من سنين ثم دخل في المزاد العام وشراه راعي المطعم الذكي جدًا عشان ينقل له.

هذا المطعم بدأ قبل خمس سنوات تقريباً، مطعم رايق ولطيف ومركّز على وجبات الفطور، خدمتهم وضيافتهم تسعدك وعندهم منيو شهي يحتوي على أكثر من ١٥٠ صنف، عندهم ايضًا جلسات خارجية جميلة جداً في أجواء الشتاء.

‎ 

 بمجرد ما انك تدخل الفرع الجديد بيقابلك وجه بشوش يرحّب فيك، بتسمع أغاني رايقة على ديكور خشبي مريح، أول ما تجلس يضيّفونك بخبزهم الخاص مع زبدة و مربى، وإذا طلعت يعطونك كوكيز تشوكلت تشب هدية! (طبعاً حسب الكمية) أما خدمة صف السيارات.. فهي ببلاش!

رؤية صاحب ومالك المطعم الأستاذ محمد الريان واضحة جدًا في المكان، الرجال هذا مثل ما نسمّيه محليًا: "مذْوِق". الأستاذ محمد كان يحب الخَبز وكان محب للتصميم الداخلي الخشبي مع حبه للطبيعة.. وهذا اللي خلاه يستلهم تصميم هذا المطعم وتعتبر تجربته الأولى في سوق المطاعم. ما عنده خبرة مسبقة فقط حب وشغف… وذوق رفيع.

زبائن المطعم هم رواد دائمين عندهم ولاء خاص للمكان، وكثير من الموظفين موجودين من نشأة المطعم ولهم ولاء عالي له، زي مدير التشغيل عبدالله، ومدير الضيافة عبدالملك.

مثل ما ذكرنا أن أصناف المطعم كثيرة جداً. فصعب أننا نقترح لكم فقط ٣ منها. لكن حسينا ان هذي الطلبات تفوقت بالنسبة لنا:

من قائمة التارتين، وهي قائمة مخصصة للساندويتشات المفتوحة، الطبق عبارة عن حلوم مشوي مع مسحة لبنة بالثوم.. مع الطماطم الكرزي والريحان على شريحة خبز ساوردوه. هذا الطبق هو من الأطباق اللي تعتبر أساسية في المطعم والكل لازم يجرّبها.

هذا البانكيك أكثر سماكة من البانكيك العادي حقهم، اللي يخلي هذا الطلب فعلاً متميز هو خليط صوص الطحينية ودبس التمر. خلطة عليها الكلام.

من أطباق الفطور المميزة في المطعم هو بيض متوسط الإستواء مع الزيت التركي الحار على خبز الفلاتبريد اللذيذ، لقمة وحدة من هذا الطبق يأخذك الى مدينة أنطاليا كأنك جالس تفطر على بحر المتوسط. 

قد أكلت مكدوس على بيقل؟ هذا الشي اللذيذ تلاقيه فقط عند دقيق وحطب.

ساندويشاتهم بشكل عام لذيذة. سواء على خبز ساوردوه أو فوكاشا أو شاباتا. هذا المفضل عندنا إلى الآن. مع إضافة الهلابينو.

تارتين لذيذ على خبز ساوردوه مقمّر مع صلصة طماطم ولبنة وأعشاب.. يعني دلع.

‎ 

كانت هذي عاشر لستاتنا في لستة "مطعم الأسبوع".

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب