أكثر شيء ممكن يتحكم بيومك هو غداك؛ لو كان يومك خفيف، تغد ثقيل. اضرب بالخمس، اطلب حجم كبير، ولا تلتزم بالإتيكيت وأنت تأكل.

بس مطعمنا اليوم هو للأيام الثقيلة.. مطعمنا اليوم للغداء الخفيف.

مطعمنا لهذا الأسبوع هو نوهو ديلي.

‎ 

‎ 

‎ 

‎ 

نوهو ديلي هو مطعم سعودي يقدّم ساندوشات الديلي بجودة عالية.

هذا المطعم كان فكرة تدور في بالِ المهندسَيْن معن العتيبي وشريكه صالح المبْرد من بداية دخولهم لسوق المطاعم، حيث كانت فكرتهم ينقلون تجربة مطاعم الديلي إلى السعودية. الثنائي عندهم مطعم مشهور آخر اسمه ٧ أضلاع.

بعد ما طبخت فكرة معن وصالح على نار هادية، بدأوا بتأسيس المطعم في عام ٢٠١٣ وسمّوه نوهو ديلي، وحرصوا إنهم ينقلون التجربة النيويوركية بطابع عصري.

كلمة Deli مأخوذة من Delicate، ومعناها أنيق أو مرتب. مطاعم الديلي هي عبارة عن بقّالات مرتّبة تبيع أجبان فاخرة، ولحوم معتّقة، ويحضّرون ساندوتشات خفيفة بجودة عالية تأخذها على الماشي.

تأصلت هذي المطاعم في ألمانيا في القرن الثامن عشر، وخلال منتصف القرن التاسع عشر، زادت شعبية الديلي في الثقافة الأمريكية من المهاجرين الأوروبيين اليهود القادمين للولايات المتحدة.

‎ 

‎ 

اللي تحترمه في نوهو ديلي إنه يسوون اللحوم المبرّدة عندهم، يخلّلون لحمهم ويتعتّق لمدة أسبوعين ثم يتدخّن بالفرن ويقطّع على حسب الطلب. وكل صوصاتهم ومخللاتهم مثل مخلل الملفوف والخيار يسوونها بنفسهم. حتى الخردل ابتكروا فيه وصفتهم الخاصة وتقدر تشتري منتجاتهم لو عجبتك، هذا غير إنهم يقدمون سلطات وعصيرات طازجة وصحّية.

نوهو ديلي حريصين على القيمة الغذائية لوجباتهم، يبونك تأكل وجبة لذيذة بدون ما تحس بأي ذنب، ما تثقّل على بطنك ولا تسبب لك غفوة اضطرارية.

ديكور المطعم رايق وملموم؛ عناصر أنيقة مثل الرخام والخشب استلهموها من محلات الديلي المشهورة في نيويورك. على عكس طابع هذي المطاعم بأنك تاخذ أكلك على الماشي، وما فيه كراسي، هذا المطعم يبيك تأكل عندهم عشان يضمنون خدمتك بأفضل شكل، وتجربتك لأطباقهم وهي حارّة وطازة.

الشيء الرهيب عندهم إنهم متعاونين مع هيلمت بيكري، مخبز سعودي يشتغلون بذمة وضمير في صنع المخبوزات، مثل خبز الساوردو اللي يسوونه بدون أي محسنّات؛ كونهم مركّزين بأن تكون الفوائد الغذائية فيه أعلى.

‎ 

الطلب الأشهر عندهم!
لحمة بسطرمة مخللّة مدخّنة على الحطب، وعليها صوص البرجر والرانش الخاص فيهم، مع مخلل ملفوف وجبن سويس داخل خبزة راي ساوردو.

وجبة الغداء المشبعة!
روست بيف مع صوص نوهو والمايونيز والثوم، مع بصل مكرمل وجبن تشدر معتّق، وإذا ميّت جوع ضف شريحة روست بيف ثانية!

كانت هذي لستتنا الثامنة عشر ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب