نهاية أسبوع في الخبر

تاريخ النشر 2024-05-09

الخبر: الشخص الهادي اللي يستقبلك بكل حب مهما أبطيت عنه، مهما رحت وجيت هي دايم بتحتريك.

هذي اللستة للجميع، لأهل الرياض، ولأي أحد زار الرياض عشان موسمها، لأن الخبر تعتبر جدول داخل أي جدول بالرياض، فتعال نعلمك كيف تروح الخبر، وكيف تجرّب الخبر.


كيف تروح الخبر؟

لأنها نهاية أسبوع، عندك خيارين لا ثالث لهما، وكلهم لهم ميزاتهم وتجربتهم المختلفة المميزة:

- القطار تجربة تستحق لو ما قد جربته، ولو كنت تحب القراءة بتكون ٤ ساعات ودك تعيدها في كل سفرة.

- السيارة هي تجربة الأخوياء لو تبي تخلي السفرة فيها سوالف ومتعة ما توقف.

وفي كل الخيارين لاااااا تروح لحالك، عشان تصير التجربة أمتع نفسيًا وماليًا.


دشّن الملك عبدالعزيز في عام ١٩٥١م أول خط حديدي بين الدمام والرياض، اللي يبلغ طوله أكثر من ٤٠٠ كيلو مرورًا بالأحساء وبقيق، وكانت السكة الحديدية تحت إشراف أرامكو لين جاء مرسوم ملكي بتأسيس المؤسسة العامة للخطوط الحديدية في عام ١٩٦٦م، ثم تحول الإشراف كليًا على شركة (سار) في ٢٠٢١م، وهي اللي الحين تشغّل كل السكك الحديدية من الرياض لباقي المدن والمحافظات المحيطة فيها.. وهذي صورة لأول رحلة تجريبية للملك عبدالعزيز في قطار الرياض-الدمام..

المصدر: دارة الملك عبدالعزيز.

الخبر صعبة، مطاعمها كثيرة وتنافس بعضها، لذلك في هذي اللستة بنركز على المطاعم اللي تعطيك تجربة. ولأن معك صديق أو أكثر، بنعطيك ترشيحات مطاعم ما بين المتوسطة للغالية دام الوضع مشاركة، وبتلاحظ إن كلها بواجهات زجاجية عشان تستمتع بالأكل والإطلالات على شوارع وبحر الخبر.


واحد من أشهر مطاعم الخبر، أطباقهم ما تقل عن روعة إطلالتهم اللي تقربك من الأمواج وتقرب الأمواج منك.

من المطاعم اللي تناسب كل وقت، لأن قائمة الطعام متنوعة وفيها جميع أنواع الأطباق. يفتحون من ٨ الصبح إلى ١١:٣٠ الليل، يعني تقدر تفطر فيه، وتحلّي فيه، وتتغدى، وتتعشى بدون ملل. يعتبر من بديهيات جداول الخبر، فخله ببالك في كل سفرة.


من المطاعم السعودية المميزة المختصة بالبيتزا، يقدمون كل أنواع البيتزا النابولية على الفحم، ونوعدك إن حتى أطرافها بتأكلها، موب زي باقي أنواع البيتزا.

عندهم بيتزا اسمها البيبيروني المفقودة، بتحصلها لما تأكلها.

مطعم يقدم لك تجربة ٣ مطابخ في مطعم واحد، مشويات، باكستاني، صيني. المطعم على زاوية بواجهة زجاجية دار ما دار، وهذا اللي تحتاجه في ظهرية شتوية في الخبر، اطلب لك برياني وتيكا مسالا، وطالع كيف الخبر تبتسم بوجهك. ولو جاء مطر، اشك له همك.


ولما تشبع، يبيلك شاهي.. ولا؟


لو طلعت ورفعت راسك تحسبها غيوم، لا.. هذا بخار بريق بيمطر عليك شاهي. الخبر صارت عاصمة الشاهي في الشرقية، يَكاد ما يخلو مربع سكني منها، ولأن ما يكفي نرشّح واحد، بنعطيك ٣ احتار واختار منهم.


شاي وضح هو جار مطعم تركا، ديكوره بديع وجلساته الخارجية تخليه من أفضل الخيارات في القائمة هذي، لأن الشاهي موب بس طعم، الشاهي صُحبة ومكان.


محل شاهي فيه حياة، المعروف إن أهل الخبر ينامون بدري، بس لما ينامون شبابهم يكونون في "بخار" لين الساعة ١ بعدين يرجعون بيوتهم.

أغرب موقع لمحل شاهي، فاتح داخل محطة، بس موب بخط سفر، مقابل الكورنيش. لا يغرّك إنه دايم فاضي من داخل، لأن طلبات السيارة هي الغالبة. يقدمون خدمة الطلب من السيارة على الأسلوب القديم: تناديه برا المحل ويجيك للسيارة، ويعبون لك كوب القزاز مرة ثانية بنصف السعر.


الشاهي في المنطقة الشرقية مرتبط بالشارع والحواري بشكل كبير، وللآن ممكن تصادف كل عصر في زوايا بعض تقاطعات حواري الخبر الشمالية تكية شيّاب يشربون شاهي ويلعبون لعبة الدامة أو الضومنة ويسولفون لين صلاة المغرب ويدخلون بيوتهم. المنطقة الشرقية مهما تغيّرت، سلوك أهلها الاجتماعي ثابت.. شف مثلًا في هذي صورة من عام ١٩٦٣م قبل مباراة رسمية في الخبر وقدام اللاعبين ضومنة ودامة رغم إن المباراة مباراة كرة قدم.. المصدر.


لأن الأكل والشرب موب فعالية الخبر الوحيدة، بنعطيك ٤ تجارب فريدة.


كيف تروح الشرقية وتفوّت الشروق؟ البحث عن مكان مميز للشروق مهمة صعبة، بس عندنا لك مكان يعطيك تجربة حلوة، خذلك فطور من فوال الحراج، والباقي من خبزك فتته، وراك روحة لبحيرة البط عشان تِوكّله.


أكيد بتروح أجدان زي عُرف كل السائحين إذا جو الخبر، بس ذي المرة ما بنقول لك اجلس فيها وتأمل البشر، نبيك تتأمل البحر.. اطلب من مطعمك اللي تحبه في أجدان وخذه سفري. منتب رايح بعيد، بتروح مشي لمكان سري، مطل الكورنيش خلف أجدان اللي كأنه ميناء، المكان ينفع للشروق، بس بالليل له جوه الخاص، لا تخاف من إنه مظلم بزيادة، هذا السر. بتشوف ناس يصيدون حتى في الليول، اِقرم أكلك من هنا، واسمع صوت الأمواج تتصافق من هناك.


الشباب، روحوا للمكان اللي بعده في اللستة

البنات، ما ينفع تجين الخبر وما تطلعين بعباية جديدة تاخذينها معك!.. شارع السويكت زي أسواق طيبة بالرياض، ملجأ كل بنت اتعبتها عبايات المتاجر في انستقرام، الأماكن هذي موب بس تجربة العبايات فيها ممتعة، لكن يجي معها كود خصم اسمه: كاسري. ممكن يخصم لك ٥٠٪ من سعر العباية. نصيحة لا تقولين له جاية من الرياض، بيسوقها عليك.


شارع السويكت قدمه من قدم الخبر، كان عبارة عن شارع في وسط البر، وتم سفلتّه قبل أكثر من ٦٠ عام. كان بالبداية شارع سكني قبل يكون شارع تجاري، يسكنون فيه أبناء بعض القبائل والصيادين، وأول محل تجاري فيه كان محل لشخص اسمه عيدان الدوسري اللي يستورد بضاعته من تايلاند ويبيعها في شارع السويكت، وهذا اللي زاد من شهرته وتشجع بعدها تجار الشرقية وفتحوا محلاتهم في هذا الشارع. اسمه الرسمي في بلدية الخبر: شارع الأمير بندر بن عبدالعزيز، لكن مع الوقت وبسبب بناء مسجد السويكت بذاك الوقت -الموجود حتى الأن-، استخدموا أهل الشرقية اسم المسجد عشان يوصفون مكان الشارع، لين تغير الاسم تدريجيًا عند كل أهالي المنطقة الشرقية.


وهذي صورة من عام ١٩٦٥م لواحد من أوائل المحلات في شارع السويكت واللي كان اسمه (محل سالم المشعال للملابس).. المصدر.



وأنت بالمطل.. التفت يمين، بتشوف أول ملعب بادل بالسعودية يطل على البحر، وغالبًا راح تستمر تنهزم من كثر ما بالك مشغول بجمال اللحظة. لحظة بادليّة، بحرية، شاعرية، مع كل ضربة تسمع موسيقى الأمواج بالخلفية.


الخاتمة

هذي كانت ثاني لستاتنا عن الخبر، نتمنى عجبك جدول نهاية الأسبوع بأكله وشاهيه وتجاربه ومعلوماته.

ولو ما قريت لستتنا الأولى عن الخبر، تحصلها هنا، لستة بتعلمك من هي الخبر الحقيقية، عن ماضيها وأماكنها اللي وراها قصص تستحق تعرفها.

شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

مطلات أودية الرياض

حان وقت المشاوي

رمضان شهر ما تطلب فيه من المطاعم