فيه أشياء، مثل الفشار، صعب الواحد يقاومها... بس وش اللي يخلي الفشار صعب المقاومة؟
هل هي ريحته الفواحة اللي تخلي طعمه على لسانك قبل أول لقمة؟
أو حجمه الصغير اللي يخليك تستسهل أكله حبة ورا الثانية، لأن مستحيل أكل بهالحجم تكون سعراته عالية، ولا؟
ولا يمكنّه المزيج المثالي من البهارات والقرمشة اللي يخليه وجبة لا تقاوم؟

كثير يتفقون إن الفشار وجبة خفيفة ممتازة إذا جيت تشوف فلم، بس فيه مطعم ذكي قرر يخليه فاتح شهيّة لزوار المطعم، وهو مطعم هذا الأسبوع.

‎ 

‎ 

‎ 

مطعم كول (Coal) هو مطعم ساندوتشات داخل حي العليا، وراء فندق نارسيس.
موقعه صعب الوصول، ودايم بتواجه زحمة ناس ومواقف، لكن هل يستاهل العنوة من أجل لقمة؟ حنا نقول: إيه!

المطعم صغير وملموم وأجواءه رايقة، وبالذات بالليل. ودام إنه شتاء، استغل الجلسات الخارجية الجميلة.

داخل المطعم، بتلقى قدامكم لوحة مكتوب عليها "لا بيتزا، لا باستا، لا شاورما، لا تاكو"...
كول يبون يشنّون الحرب على الأكلات المفضلة عند الشعب ويعلنون ثقتهم بانتصار الساندوتشات! لعلهم نسوا "لا للبرقر"، بس بنمشيها...
وقف في مكان بعيد، أو تعال من المترو (انزل عند محطة بنك البلاد)  وامشي مشي مريح واستمتع بهالأجواء الجميلة.

‎ 

‎ 

مجرد ما تقعد على طاولتك بيضيّفونك فشار! هذي دومًا إشارة جيّدة للمطعم بالنسبة لنا، وعمومًا، ففيه قاعدة في الحياة تقول: الأكل البلاش هو الألذ.

أجواء المطعم بشكل عام ملمومة. أول ما تدخل المطعم بتحس إنك بعالم ثاني خاص بصنع الساندويتشات اللذيذة غير المعتادة.

شف طريقتهم بطبخ اللحم والدجاج على الفحم قدامك! فيه جلسات عادية، ولكن نقترح لك الجلسات اللي قدام الطباخين؛ عشان تشوف فنّهم.

‎ 

إذا بتأكل من هذا المطعم، فيستحسن إنك تأكل عندهم عشان تحصّل التجربة الأمثل لقرمشة الساندوتشات.

كلّ الساندوتشات تقدّم بخبز الباقيت من النوع الراستك (الريفي) الخاص بالمطعم، مع بطاطس مقلية مبهّرة ببهاراتهم الخاصة.

دجاج متبّل مشوي على الفحم، وفوقه جبن شيدر ذائب مع صلصة التابيناد، واللي هي عبارة عن خليط الزيتون، والأنشوفة، ونبات الكبر (أو القبار)، ممزوجة بصلصة البيستو الأخضر مع جرجير وطماطم مجففة.

طعم المكونات الطازجة وتجانسها مع طراوة الدجاج وطعم الفحم فعلاً يعطيك ساندويتش جديد ولذيذ.

ستيك من نوع التندرلوين، منقّع بصلصة التشيميتشوري والجرجير مع جبن شيدر يذوبونه داخل فرنهم الخاص، وممكن تطلب الستيك بأي درجة استواء تعجبك، سواءً من رير، وحتّى وِل دُن مفحّم.

خلطة ذرة وأفوكادو مشوية، مع بودرة الشيتوس والكريمة.
ندري إن فيه ساندويتش ثالث جديد - موجود لآخر الشهر - ولكن تفوّق عليه طبق ذرة الدَيْنِاميت! من أول لقمة جت لذعة الشيتوس الحار، مع برودة الكريمة وحلاوة الذرة. صحن واحد صغير لا يكفي!

كانت هذي لستتنا العشرين ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب