كم سنة عشت؟ عشرين؟ ثلاثين؟ حتى لو وصلت الخمسين، فأنت ما تمتلك الخبرة اللي يمتلكونها الجدّات فيما يخص حلويات الضيافة. 

عاشوا الجدّات سنوات كثيرة مليانة عزائم وزيارات ومناسبات اجتماعية.. وجرّبوا حلويات كثيرة وتقديمات متنوعة.

هذي اللي يخلّي إبهارهم شيء صعب، ومنتب جاي ويدّك فاضية.. وش تجيب؟ بنساعدك تختار الحلى هذا بخمسة اقتراحات جرّبناها وتأكدنا منها بنفسنا! 

بس ليش تحتاج تبهر جدّتك في اجتماعاتكم العائلية؟ عشان النقاط الإجتماعية!

تخيّل معنا الحدث: كلّ العائلة مجتمعة وبطل الجلسة هو صحن حلى أنت اللي جايبه... النقاط الاجتماعيّة 🔝

من سنة ١٩٩٠م، جدّاتنا محتفظين بهذا السر اللذيذ: بيتي فور من حلويات برديسي.

هذا المحل ما يحتاج الـ التعريف؛ لأنه معروف ومشهور ومحبوب من الكل. قطعة من الزبدة تناسب كل أحد، وتجيك بنكهات مختلفة ومتنوعة مثل الفستق، والشوكلاطة، والكاجو. 

في البداية، يمكن ما يشدّك شكلها وتتوقع إنّها نوع من المعمول التقليدي.. لكنّ لأنّه جايّ من حلويّات برديسي، نضمن لك إنّك تبي تكسب الجلسة إذا جبت هذا الحلى! زميلنا عمر وَصَفه بأنّه بلح متنكّر.

قِرص عقيلي هو حلى نجدي تقليدي مفضّل عند كبار السن، وبدّعت شركة مطاحن الدقيق والمخابز الكويتية بهذا الحلى وسوّته على طريقة الكب كيك.

ميزة قِرص العقيلي حقّهم إن حلاه موزون ونكهته مثاليّة مع القهوة السعوديّة، ويجي محشوّ بنكهات مختلفة؛ مثل الرهش، وهي النسخة الكويتية من حلاوة الطحينية، أو قِرص عقيلي بالحلوى البحرينية.

كلّها رهيبة، بس إذا تبي تفتح سالفة جديدة ننصحك بالحلوى البحرينية؛ لأن جلستكم بيصير موضوعها الرئيسيّ وشلون حطّوا حلوى بحرينيّة في قِرص عقيلي؟

ما في شيء يضاهي قضمة قرص العقيلي من دقيق كويتي، دقيق ممزوج بحلاوة حلوى بحرينية، وجنبه فنجال قهوة سعودية...

لا شعورياً بتغني خليجنا واحد! 🇰🇼🇧🇭🇸🇦

الفقع له موسم معيّن بالسنة، لكن هذا الحلى موجود طول الوقت!

لا تشيل همّ؛ ما فيه ترفل ولا هوب مالح، هذا خويّ خليّة النحل المحبّبة عند الكل.

فيه كل مقوّمات الحلى اللذيذ: عجينة هشة، جبن كيري، وصوص النستله والقرفة اللي كابينها كب. يسمّونه حلى الفقع عشان شكله اللي يشبه حبّة الفقع، لكنّه فعليًّا خليّة نحل مفجّرة! سعرها مناسب، وكميّتها راهية.

تلقاه في سلسلة ركن الحلويات، عندهم أربعة أفرع منتشرة في أنحاء الرياض، وآخر فرع فتحوه كان في حي السويدي.

يضيع هذا الحلى في طاولة الجدّة المليانة، بس وقت ما تجرّب قرمشة البيكان مع طبقة الكراميل، بتتمنى أن هذا الحلى حفرة؛ كل ما أكلت منه زاد...

لكنّ تطمّن: هذا أكثر خيار صحّي في اللستة؛ لأنه مصدر بروتين نباتي، ودهون صحية، وغني بالمعادن زي المغنيسيوم والزنك. سولف لجدّتك عن فوائد المكسّرات، أو يمكن هي بتسولف لك عن الزيوت المفيدة بدل المقالي والبرجر اللي يأكلها شباب اليوم...

هذي المحمصة مختصّة بالقهوة، والبهارات، والمكسرّات، ولها خمس أفرع في أنحاء مدينة الرياض. إذا ما أعجب جدّتك، فتراهم فاتحين الرسائل الخاصّة على إنستجرام للشكاوى والاقتراحات فقط. وإذا أعجبها، ارسل لنا على حسابات كلماشي!

اجتمعنا في مكتب كلماشي وأرسلنا مندوب أفندي اسمه يوسف، يوسف -مشكورًا- متّر الرياض وجاب الخيارات اللي في اللستة.

جاب أشياء من شمال الرياض، وأشياء من جنوبها، استوعبنا بعد ما مشورناه إن فيه ثلاث محلات لها فروع فاتحة جمب بعض، سوّينا لك هذه القائمة في قوقل مابز بكافة الفروع عشان يكون أسهل لك.

جرّبنا المنتجات مع عيّنة مختلفة من الفريق، واللي ما مانعوا أبدًا يقطعون يوم عملهم بحلويات لذيذة! كلهم اتّفقوا برضو إن حلى الفقع ينفع للشباب 👨

شكرًا لكم، كان هذا المنشور أحد أعداد لستة من كلماشي.

عجبتك اللستة؟ شاركها في قروب العائلة لو سمحت!

‎