مساء البيتزا صديقنا!

هذه مب تحيّة سامجة، هذا اسم مطعم صدقي في المنطقة الشرقيّة. و دليل مادّي إننا من كثر ما نحب البيتزا خلصت أسامي المطاعم. والصدق ما ننلام، وش فيها ما ينحب؟
إذا كنت تعتقد إن البيتزا إيطالية فأنت غلطان؛ البيتزا أكلة إنسانية عالمية، ما تجي بشكل واحد: فيه طريقة خاصة بنيويورك وطريقة خاصة بنابولي، وميلان، وشيكاغو، وهاواي..  والحين صار فيه طريقة سعودية بعد.

 في هذي اللستة بنذكر لك 4 مطاعم بيتزا جديدة في مدينة الرياض تنافس مدن عالمية مثل نابولي ونيويورك.

‎ 

أجدد مطاعم البيتزا حالياً بالرياض، أول ما تدخله بتحس إنك في عمل فني: مطعم صغير، بس أجوائه رايقه ورومنسية، وكل مشاعرهم حطوها في البيتزا حقتهم. .. حتى دورة المياه زميلنا فارس قال عنها: "حمامهم أجمل حمام قد شفته في حياتي.. وأنتم بكرامة."

صاحب المكان هو الشيف بنفسه: عبدالرحمن الطنيجي، أسس المطعم أول مرة في دبي عام 2021، هو اللي مسوي المنيو وجميع الوصفات. 

قبل ما نزورهم اجتمعنا مع مدير المطعم (مارك) عبر زوم، إنسان جداً رائع سألناه ليش ما عندكم طلبات جانبية أو بطاطس مقلية؟ وجوابه كان بسيط: إذا ما صاروا أفضل مكان يسوي بطاطس مقلية ما راح يضيفونه للمنيو.

فريق بلو دقيقين في عملهم، بالضبط زي دقيقهم، عشان يوصلون لنفس نتيجة العجينة اللي في دبي، غيروا شوي في وصفة العجينة في الرياض لأن الرطوبة تفرق! لكن الدقة هذي ما خلتهم بطيئين، سرعتهم وصلت لمرحلة توتّر.. إذا جاك طلبك بأقل من خمسة دقايق بتسأل نفسك: هل فعلًا خبزوا البيتزا هذي لي؟

المنيو بسيط وما يحيرك، ستة أنواع بيتزا: بيبروني، جبن، بوراتا، ترفل، شورت ريب، ومسخّن.

ممكن تخمن أيهم عجبتنا أكثر؟ بتتفاجئ من الجواب لأنها بيتزا المسخّن! الدجاج فيها ينطبخ 6 ساعات قبل ما يوصل لطبقك. بعدها يجي الشورت ريب: أضلاع تذوب في فمك وتخليك ما توقف تأخذ لك حبة ثانية بعدها مباشرة. أما بيتزا البيبروني، ممكن تكون زي أي بيبروني تاكلها، لولا المكوّن السحري اللي على كل طاولة: العسل الحار الخاص بالمطعم! بعد أول لقمة بتحس إن التجربة مختلفة.

من المطاعم الجديدة بالرياض، عمره 5 شهور بس. الوصول له سهل جدًا لأنه يبعد دقيقة مشي من محطة الربيع، إذا شفته من بعيد بتتوقع أنه قهوة مختصة عشان اسمه أو تصميمه الداخلي، يزيّن المحل حجر يحاكي الصحراء وجلساته رايقة مثالية لطلعة ويكند مع الربع.

صاحب المطعم بدايته كانت في المخبوزات الفرنسية، وافتتحه مع إخوانه الثلاثة: واحد مسؤول عن الوصفات، واحد عن التشغيل، والثالث عن التجارة. 

المحل مبتكر ويستخدم مكونات محلية مختلفة زيّ اللومي، الحاشي، وحبحر شقراء.

منيو المطعم بدأ بثلاث أنواع بيتزا: بيبروني، بوراتا، ولومي، والحين صاروا ستة. الغريب إن عندهم تغاميس خاصة فترة العيد ورمضان فقط تُقدم بخبز البيتزا، شيء مختلف ما تشوفه عادة في مطاعم البيتزا.

ومن الأصناف اللي شدت انتباهنا: بيتزا دجاج اللومي المبتكرة، لكن النجم الحقيقي بالنسبة لنا كان بيتزا لحم الحاشي، تجربة جديدة ولذيذة. غير البيتزا عندهم أشياء ثانية تستاهل التجربة: الفرايز اللي صار حديثنا بعد ما جربناه، وآيس تي الخوخ بجهاز النايترو منعش جدًا.

أخيراً! فتح عندنا مطعم فعلاً يقدم لنا بيتزا نيويورك.. ويبيعها بالحبة بعد، وسعرها نفس سعر الشاورما الصاروخ. بس هل تشبعك زيّ الشاورما الصاروخ؟ انزل بنفسك وجرّب.

رغم أن المطعم يبيع البيتزا بأسلوب نيويورك إلا أن داخليته تعطيك إحساس انهم يبيعون كافيار مغطس بالترفل. المكان أفخم من اللازم.

‎ 

المطعم صغير وملموم وعندهم جلسات حلوة على البار. قابلنا الشيف التونسي فاروق وكان رهيب، وواضح تأثيره على باقي الطاقم، فاروق دائماً بشوش، والموظفين كلهم رهيبين وشخصياتهم حلوة، فرنهم رهيب وريحته عَطرة. لا تروح هناك متعطر، ببساطة اجدع قميصك جوا فرنهم.

‎ 

أعجبتنا البيتزا الأصلية اللي كانت لذيذة  لكن اللي خطفت قلوبنا فعلًا هي بيتزا الببروني، لأن نوع الببروني اللي يستخدمونه خاص ومميز. وشلون؟ ما ندري، بس ما قد ذقنا مثله في مدينة الرياض.

‎ 

روزيلا مطعم تابع لرجل الأعمال خالد السعيد (ابن مؤسس مطعم هرفي). لهم سنتين فاتحين، وأول ٨ شهور كانت فترة تجريبية كاملة.

اللي ماسك المطبخ ويقوده شيف جزائري (سفيان) مع فريقه الودود واللطيف يحرصون على تقديم تجربة إيطالية مميزة في الرياض.

‎ 

أشهر البيتزات عندهم: الترفل والمسخّن، بس حنا جربنا  بيتزا البريسكت الجديدة وكانت ممتازة جدًا. 

وعندهم أصابع الباستا بالجبن تستحق إنها تنزل لك بالطاولة تجربها. وبعد الأكل، لا تفكر تطلع كوفي..  لأن عندهم واحد من ألذ التيراميسو بالرياض، واللي يخلي كثير من الناس يرجعون له مخصوص بعد بيتزا المسخن المعروفين فيها.

من الأحد إلى الأربعاء عندهم عرض غداء رهيب: صنفين من اختيارك + مشروب بـ ٥٩ ريال — سعر مغري جدًا بالنسبة للمطاعم الإيطالية اللي غالبًا ما تكون الخيار المتاح إلا مع نزول الراتب أو في مناسبة خاصة.

الفيلم يتكلم عن أربع سلاحف نينجا يتربّون في المجاري مع معلمهم الفأر "سبلينتر"، ويصيرون أبطال يقاتلون الشر في نيويورك. وسط كل الأكشن والمغامرات… مع ذلك مهووسين بالبيتزا! أي مشهد يجلسون فيه مع بعض ينتهي بصندوق بيتزا قدامهم، والجزء الثاني كمل مغامرات السلاحف ضد الأشرار، لكن هالجزء ممتع جدًا وأقرب للكوميديا. القتال مع العصابات شيء… وحب مايكل أنجلو للبيتزا شيء ثاني تمامًا، ومشاهد البيتزا هنا لها طابع خاص.

رحلة أبوية بين بندق وابنه ماكس، فيها لحظات كوميدية ومؤثرة وأغاني علقت في ذاكرة جيل كامل. ومن المشاهد اللي ما تنسى لقطة البيتزا الذايبة اللي صارت حلم كل طفل يشوف الفيلم،  وحتى في مقاطع كثيرة باليوتيوب يقلدون البيتزا اللي ظهرت بالفيلم.

قصة إليزابيث اللي تسافر حول العالم تبحث عن نفسها بعد تجربة صعبة مرت فيها؛ في الهند للروحانيات، في بالي للحب، وفي إيطاليا للأكل. والمشهد الأشهر لما تاكل بيتزا في نابولي بابتسامة مليانة رضا.

فيلم أيقوني عن توني مانيرو (جون ترافولتا) الشاب البسيط من بروكلين اللي يعيش حياته بين الشغل الممل وحلبة الرقص اللي تخليه نجم من اللقطات العالقة في الفيلم، مشهد ترافولتا وهو ياخذ شريحة بيتزا ويمشي ياكلها بثقة… مشهد بسيط بس خلا البيتزا جزء لا يتجزأ من الصورة الأيقونية للفيلم. بعيداً عن أنه مرتبط بالبيتزا الفيلم بيفاجئك!

في هذي اللستة اخترنا ثلاثة أشخاص يستكشفون مطاعم البيتزا المبتكرة بالرياض، لكن لسبب متعلق بالرأسمالية تغيّب واحد منهم، وصارت المسؤولية على شخصين: نواف وفارس.

بدينا من الظهر، وجلسنا نجرّب ونتنقّل من مطعم للثاني لين المغرب. بعد ست ساعات، فارس أعلن استسلامه رسميًا.. أما نواف، فظل متمسك بالبيتزا لين آخر لحظة.

خلال الجولة لاحظنا نقلة نوعية صارت في مطاعم البيتزا بالرياض. صرنا نلقى مطاعم تعطيك نفس التجربة اللي ممكن تعيشها في نابولي أو بروكلن.

شكرًا لكم، كان هذا عدد جديد من منتج لستة من كلماشي.

ودّك تذوق اقتراحاتنا؟ شيّك هذه القائمة على جوجل مابز! ولا تنسى تشارك اللستة في قروب العائلة.من هنا!