هانت. اليوم الثلاثاء، والخبراء يأكدون لنا إن بكرا الأربعاء، انتصف الأسبوع وما بقى شيء على الويكند، في أسبوع العمل أنت تحت ضغوطات مديرك وأعمالك، في الويكند أنت تحت ضغط مختلف: إنك لازم تستانس. 

وشلون تستانس؟ الرياض فيها خيارات كثير، لكن الخيارات هذي يمكن ما تصير مناسبة لحسابك البنكي، بدال ما تسوّي دراسة جدوى مالية للفعاليات الحالية جبنا لك لستة من جدولين قيمة اثنينهم أقل من ١٠٠ ريال،

حاولنا في كلماشي إننا نعرّف جدول مثالي ليوم الخميس، واتفقنا بأن الجدول هذا مفروض يكون للطبقة الكادحة، اللي تشتغل طول الأسبوع وتنتظر الويكند عشان تنبسط، بس وشلون تنبسط والقهوة بـ ٣٠ ريال؟ أولًا، تقدر تشيّك لستة من كلماشي: وشلون تتقهوى بأقل من ٨ ريال؟

ثانيًا، الجدول المثالي ليوم الخميس بتعريف خبير ترفيهي تواصلنا معه هو: كافيين، عشاء، فعالية. تقدر تسوّي الثلاث أشياء هذي بـ ١٠٠ ريال؟ إيه.

عنوان القهوة هو اللي تشوفه دائمًا في الشارع بفروعه المخصصة لطلبات السيارات، بس هذي الفروع خلّها وسط الأسبوع وأنت رايح الدوام، الخميس غير، الخميس رح مع أخوياك لواحد من فروعهم الكبيرة اللي مجهزة بجلسات للطلبات المحليّة زي فرع طريق الملك فهد، جرّب الحلا من عندهم خصوصًا الكَب كوكيز.

سعر كوب القهوة: ٥ ريال.

أفضل مكان تبدأ فيه الويكند، كل خميس عندهم ليلة اسمها "كوميدي نايت" وهي عرض ستاند أب كوميدي يقدّمه مجموعة كوميديانز محليين رهيبين، من ضمنهم ابن حيّ المروج كريم الصومالي اللي دايمًا يشاركنا مصائب عائلته الكريمة بشكل ساخر، وأسامة اليحيى من شرق الرياض اللي طلع في لقاء مع داوود الشريان في برنامجه الجديد "الثانية" يتكلم فيه أسامة اليحيى عن فن صنعة الكوميديا، وأخيرًا أظرف شنب في الرياض، سري الخالد، اللي تقدر تشوف برنامجه في كلماشي: اختبار الآيسكريم كل يوم أربعاء. 

ليلة الكوميدي نايت يكون فيها لاين أب لكوميديانز يطلعون على المسرح ورا بعض كل واحد له ٥ - ١٥ دقيقة يضحّك فيها الجماهير وفي العادة يكون الكوميديان الأخير ضيف قوي من نجوم الكوميديا في السعودية أو الخليج ، يسمّونها الـ هيدلاينر. 

عندنا لك معلومة حصرية وتحذير: نجم الخميس هذا هو شاكر الشريف، انتبه لا تموت من الضحك.

إذا فاتتك ليلة الخميس لا تفوتك ليلة السبت، كوميدي بود عندهم أنواع مختلفة من الليالي في يوم السبت، مثل: ليلة قراطيس وهي اللي تشوف فيها كوميديانز جديدين وتسمع نكت جديدة بقراطيسها، وليلة وش السالفة وهي ليلة تعتمد على الارتجال فيها الكوميديان بيأخذ مواضيع النكت من الجماهير.

سعر الفعالية: ٧٥ ريال الخميس | ٤٥ ريال السبت. 

وصلنا لآخر محطة في هذا الجدول، وهذا الجدول الرايق يبيله ختامية رايقة، عشان كذا ننصحك في هذا المطعم اللي مهدد بالانقراض. ليه؟ لأنه نتوقع هذا آخر مطعم على وجه الأرض يبيع الشاورما بـ ٤ ريال، وهذا دليل إن أي شي ممكن يصير بالروقان. هناك كل أحد رايق، المحاسب رايق، ومعلم الشاورما رايق. 

اطلب من عندهم شاورما ابعة ولا تنسى تكثّر الثوم الكريمي الممّيز عندهم، عشان تذوق رايقة في الريق. 

سعر شاورما ابعة: ٤ ريال.

إذا كنت تاجر وما همتك للفلوس ننصحك باللستة هذي: مطاعم الرياض تكشخ فيها.

الاستراحات الشبابية في الرياض قلّت، بس زادت معها بيوت الشاهي، شاهي عزيز هو بيت شاهي مميّز في حى النفل، إذا رحت للمكان هذا بتلاحظ إن الجلسات كلّها مليانة عيال وإذا كنت ولد بتكتشف منطقة راحتك الجديدة في الرياض، ما يحتاج تشفط كرشتك كل شوي، ما يحتاج تزيّن جلستك، و ما تشم ريحة جل الشعر في الأجواء، الكل هناك جاي لهدف واحد: يستكن ويروق على شاهي عزيز الخادر. 

سعر كوب الشاهي: ٦ ريال.

السقيفة مقهى يجمع لك كل الألعاب اللوحية والورقية اللي تعرفها واللي ما تعرفها، زي مونوبولي، أكفش، وكلمجة. 

والأهم من هذا عندهم أحسن وظيفة بالعالم: حَكَم ألعاب. واحد يدور بين الطاولات ووظيفته يشرح لك قوانين اللعبة و يفصل بينك وبين خويك إذا تهاوشتوا وسط اللعب. عندهم منيو فيه مشروبات وأصناف حلا تشهّي، اطلب منهم قهوتك وأنت تلعب بس انتبه يشوفون أخوياك الكروت وأنت رايح تستلمها. 

سعر الساعتين: ٤٠ ريال.

خلّصت لعب في السقيفة؟ تعال كمّل لعب في سويش برجر، عندهم ألعاب أركيد زي پاكمان و مورتال كومبات بترجعك لأيام الطفولة يوم كان أقوى جدول عندك إذا رحت لبرقر كنق وكان السوني حقهم ما عنده أحد، لا يفوتك من عندهم برقر الكلاسيك اللي يذوب في الفم من طراوته. 

سعر البرقر: ٩ ريال.

هذا جدول من عناصر مختلفة كلها أقل من ميّة ريال، تقدر تجمّع، تمكّس، تألف، تدبّل، وتبدّل بينهم: بس أهم شيء لا تنسى الوناسة، ولا تصرف راتبك كله بداية الشهر.

هذي كانت لستة من كلماشي، وإذا كنت من المحظوظين اللي قروها من النشرة البريدية، فجتك هديّة! 

لا تنسى تشترك.