يقولون الجوع يزيد مع فصل الشتاء، وهذي المعلومة صحيحة لأن جسمك يحتاج طاقة عشان يدفّي نفسه مع انخفاض درجة الحرارة، لذلك المطعم اللي بنوصّي عليه هذا الأسبوع من أفضل مطاعم اللحوم بمدينة الرياض!

‎ 

‎ 

‎ 

‎ 

مطعم كوبر فتح في بداية السنة وهو مطعم فخيخيم (تصغير فخم) مختص باللحوم بكل أنواعها، وهدفهم بكل اختصار: تقديم أعلى جودة بسعر في متناول البطن.

يتميّزون بأن أطباقهم مبتكرة ومختلفة من دول العالم، كلها من ابتكارات شيف المطعم.

الشيف في هذا المطعم هو شاب قصيمي هاوي للأكل بشدّة: عبدالعزيز الغَفيص.
كان يدرس إدارة أعمال في أمريكا، وكان إذا عجبه طبق من مطعم، سجّل المكونات وراح يجرّب يسويها في بيته، مرة ومرتين وثلاثة لين ما أتقن الطبخ وصار متعمّق بجودة أنواع اللحوم والخضار.

في رجعته للرياض، دمج بين تعلّمه للأعمال وحبّه للطبخ بأنه يصمم منيو مختلف ولذيذ يليق بذائقة أهل الرياض المميّزة. 

مطعم كوبر له من اسمه نصيب؛ ديكوره مصمّم بطابع نحاسي برّاق يعطيك تجربة فخمة وأنيقة جدًا.
مواعينهم الكلاسيكية تلفت أنظار الأمهات، الملاعق والشوك لمّاعة ونحاسية، وأغلب أطباقهم يقدمونها لك بصحون خشبية، أما طاولاتهم فهي رخامية جذّابة ما ودك تأكل عليها عشان ما توصّخها.

‎ 

ما يستهينون في تقديم أجود أنواع اللحوم في مختلف أطباقهم، وميزتهم أن خبزهم مخبوز يوميًا وطازج. وأنت تطلب بتسمع معزوفات كلاسيكية من الجاز والساكسفون اللي بتخليك ودك تدفع لهم الحساب بدفتر الشيكات، أو توقّع على الفاتورة كأنها عقد.

ملاحظة: المطعم يتطلّب حجز مسبق، تقدر تحجز من هنا

التندرلوين عندهم نوعين، ولكن هذا النوع جذبنا أكثر: قطعة لحم تندرلوين طريّة ومشويّة على الفحم، تطفو على مسبح من صوص الفطر، وعليها صلصة سموكي لذيذة وحالية.

باتفاق جماعي من زبائن المطعم، هذي من أفضل طلباتهم! أربع أضلاع لحم غنم راهية ومشويّة، وعليها شبت وصوص الطحينة.

من أول ماتشوفه بتحسبه شكشوكة، ولكن هو حمّص كريمي بالزبدة المقمّرة، ومغطّى ببهارات الدقّة والشّبت والزّبدة.

هذا الطبق من المقبّلات، ولكن المفروض يكون من فئة الستيك؛ لأنه حرفيًّا ستيك نباتي! عبارة عن زهرة مشويّة مع طحينة وسبايسي صوص وتشيميتشوري صوص.

‎ 

كانت هذي لستتنا الثانية عشر ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب