قد فكرت برجيم الكيتو؟

تاريخ النشر 2023-05-25

الكيتو هو نظام غذائي اشتهر من فترة وإذا لك تجربة فيه غالباً مريت بهذي المراحل: تبدا وأنت متحمس للنتايج، فجأة تكثر العزايم والأكلات الممنوعة في حياتك، تحس ان خياراتك قليلة إذا بغيت تاكل من برا، تبطل كيتو، وفجأة المطاعم تشد حيلها وتسوي وجبات كيتو.


بس إذا بغيت ترجع هذا الوقت الأنسب انك تسوي كيتو، لأن الحين الرياض صار فيها خيارات ممتازة إذا بغيت تاكل من برا، وقررنا نبحث في ذي المطاعم ونسوي لستة عنها بس ما ندري متى بنبدا يمكن الأحد الجاي، أو اللي بعده، أو اللي ب…الخ.


في هذي اللستة بنذكر ٥ مطاعم بتصير صديقتك في حمية الكيتو بس قبلها بنشرح أكثر عن هذي الحمية، وش الأكل حقها، ليش الناس تسويها، وش الهدف منها.

وش هو الكيتو؟

الكيتو حمية غذائية فكرتها تعتمد على تقليل استهلاك الكربوهيدرات لأقل من ٢٠ جرام في اليوم والإكثار من الدهون في الغذاء، وعدوها اللدود هو السكّر، علاقة الكيتو بالسكّر زي علاقة النباتي بالمقلقل، كلهم يشوفونها جريمة كبرى بحق الإنسانية. بس الفرق ان اللي متبع نظام كيتو مب معلمك كل شوي.


الكيتو سمح ترا، يسمح لك تاكل اللي تبي مهما كان دهني لدرجة غير منطقية: اصبع زبدة، ملعقة مايونيز، ليّة مبشورة.

هذي كلها خيارات ما نقدر نحكم انها صحيّة ولا لا بس دام ما فيها كربوهيدرات أو فيها كربوهيدرات بنسبة قليلة فهي تعتبر صالحة للكيتو.


طيب كيف أكل الدهون بيساعدك؟ وش المشكلة في الكربوهيدرات والسكّر -والعياذ بالله-؟ لماذا نحن هنا؟

هذا كله لأن الهدف الأساسي من حمية الكيتو هو عشان جسمك يدخل في الحالة الكيتوزية اللي فيها الفايدة، وهي زبدة الموضوع. 

وش هي الحالة الكيتوزية؟

جسمك متعود انه ياخذ الكربوهيدرات والسكريات ويحولها لطاقة، بس إذا وقفت عنه هذا المصدر بيبدا جسمك ياخذ الدهون ويحرقها عشان يحولها لطاقة وهذي هي الحالة الكيتوزية، إذا دخلتها بتحس كأنك كنت تعبي ديزل والحين صار معك تيسلا.


الكربوهيدرات وقود فيه طاقة كبيرة بس مشكلته يحترق في وقت قصير، عكس الدهون اللي تحترق بشكل بطيء وتعطيك تدفق مستمر وثابت في الطاقة، والفايدة هنا غير الإحساس بالنشاط طول الوقت هي ان جسمك قاعد يتخلص من الدهون اللي فيه وينشف أكثر.


من مشاكل السكّر انك إذا كلته بكميات كبيرة والأنسولين اللي في دمك ما لحق ينظمه يبدأ جسمك يحوله لشكل دهون و يخزنه الأنسولين في الخلايا، وإذا تمعنت في هذا الموضوع وكيف هو يتعارض مع هدف الكيتو بتفهم ليش هم أعداء لدودين.

وش تاكل في الكيتو؟

أهم نصيحة ممكن نقدمها لك هي: لا تاخذ أي نصايح تغذوية مننا.

صح اننا نكتب لستات عن المطاعم ونحب الأكل بس ما نقدر نقدم نصائح احترافية مرخّصة عن التغذية، كل اللي قاعدين نقوله هي معلومات تثقيفية عن رجيم الكيتو ولو فكرت تسويه استشر مختص، الحين بعد ما وضحنا هذي النقطة خنتكلم شوي عن الأكل المسموح في رجيم الكيتو.


عكس اعتقاد الكثير، أكل الكيتو مب بس خبز فيه عنقز و خس، تقدر تاكل حرفياً اللي تبي طالما انك تستهلك ٢٠ جرام كربوهيدرات أو أقل في اليوم، وأفضل لو استهلكتها في الخضار والورقيات والمكسرات لأنها تحتوي على ألياف، بعض الأشخاص اللي أكلهم عبارة عن لحوم وبيض ياخذون فيتامينات للتعويض.


بالنسبة للمشروبات عندك القهوة والشاهي بدون سكّر أو حليب طبعاً، فيه بدائل للحليب مثل حليب اللوز أو جوز الهند، والمشروبات الغازية الدايت مسموحة دام انها بدون سكر وكربوهيدرات، بس أهم شي في الكيتو شرب المويه، لازم تصير تحب المويه أكثر من السمك، وعلى طاري السمك تراه زين للكيتو بعد.


الشيء الغير مناسب للكيتو أبدًا هو للأسف: الفواكة، اللي يسمّونها أخصائيين التغذية: حلويات الطبيعة.


المطعم الأول

رير قريل هو مطعم تابع لملحمة قريل المختصة بلحوم الستيكات الفخمة، ونحب نشكر ملحمة قريل من هذا المنبر على هذي الفكرة الرهيبة بعد ما حسوا اننا بنحوق الدعوة بالطبخ.

مطعم رير قريل يثبت لك ان أكل الكيتو مب بس خس وخبز يابس، تقدر تستمتع بوجبة لذيذة بدون ما تطلع من إطار الكيتو بعد.

لا يفوتك منيوهم المتنوع بالستيكات والدجاج المشوي، من كل ستيك عندك خيارين في الطلب، واقيو أو لحم أنجوس، بيحدد خيارك غالباً أي يوم في الشهر زرت المطعم.

الزبدة ان هذا المطعم خيار رهيب، وبيخليك تحمد ربك ان نظامك الغذائي كيتو، على الأقل مب فيقان.

المطعم الثاني

مقهى و مخبز صحي، عندهم أنواع كثيرة من المنتجات زي السندويتشات، والكروسونات، وخبز التوست، والخبز العربي، بعضها كيتو وبعضها تحتوي على كمية قليلة من -اعذرونا على هذي اللفظة- : الكربوهيدرات.

بايو اكس فاهمين الكيتو عشان كذا لا تشيل هم الحليب في قهوتك، عندهم خيار قهوة مع حليب اللوز أو جوز الهند. و عندهم حلى كيتو لذيذ بعد.. إذا كان متوفر.

 لكن ايش اللي يميز هذا المكان بالنسبة لنا غير وجيه و معاملة عاملينها البشوشين اللي كلهم حيوية و طاقة من نظامهم الكيتوني أكيد؟ الموقع نفسه من أروق و أجمل و أريح ما يكون. داخل مجمع اسمه باكيارد من أجمل المجمعات كأنها غابة اسمنتية صغيرة تنسيك شوي حر الرياض لأن درجة حرارتها أقل من صيف الرياض الحارق خارجاً. غير ان كنبهم مريح كان ودنا نشيله وناخذه معنا للمكتب. يعني باختصار: أجمل مكان تاكل فيه سناك كيتوني. 

المطعم الثالث

عادل الشبل الشيف و مبتكر الوصفات في هذا المطعم الصحي هو طباخ فعلاً ماهر و فنان. قرر يتبع شغفه بانه يبدا أول مشروع مطعم له. طبعاً عادل محترف في الأكلات الايطالية و البحرية و أكل البيت اللي تعلمه من والدته اللي هي أصلاً طباخة رائعة بحد ذاتها. لكن لأنه يتمنى لنا الخير قرر يفتح مطعم صحي. اقروا معي "صحي" مب شرط مطعم دايت و رجيم. عندهم ساندوتشات لذيذة زي التونة مع الشمندر. و أطباق رز لذيذة مثل اللحم الكوري مع الرز و البتر تشكن مع الحمص المحمّص!

لكن.. بما ان هذي لستة عن الكيتو، بنتكلم فقط عن طبق واحد عندهم في المنيو فقط، وهو لحم ستروقانوف الكيتو. مع القرنبيط بديل للرز. و صوص خاص للكيتو. عندك وجبة كاملة و مشبعة للي ودهم ياكلون كيتو من غير ما يحسون انهم ياكلون كيتو، ايه و لا تنسى عصرة الليمون المشوي اللي يجي مع الصحن. بس يعني لا تكثر منه لأن الليمون فيه كاربز ولك حد محدود للكاربوهيدرات أيُّها الشخص الكيتوني.

المطعم الرابع

إذا نزلت في منطقة الوادي بتلاحظ ان أغلب سكانها أصحاء. و يمشون بسرعة لأن فيهم طاقة زايدة. ولو دققت في الأماكن بتلاقي في نادي الحارة في موقع استراتيجي وحوله مطاعم صحية كثير. و أغلبها فيها اختيارات كيتونية. عرفنا سر صحة أهل حي الوادي! 

اخترنا من ضمن المطاعم هناك مطعم رجل الكهف لأنه مطعم عنده اختيارات وجبات صحية سريعة للناس المستعجلة اللي عندهم دوامات و شغل كثير. يقدمون لك الاكل زي المقصف و يقيسونه لك بالوزن. و عندهم بعض الأكلات اللي تنفع للكيتو، اقتراحنا لك كالآتي:  خذ لك صحن و عبه سلطة خس و جرجير و خضار مشكل عالبخار. و اختار واحد من  البروتينات الموجودة. دجاج حار، دجاج فاهيتا، سمك سالمون عالبخار أو دجاج بكريمة الليمون. ايه الكريمة تنفع للكيتو. 

المطعم الخامس

بيت الشاورما مطعم مبهر، مافي مطعم تطور عبر السنين زي بيت الشاورما، بدا سنة ٢٠٠٠ في أول فرع له بالسليمانية في موقع زاوية استراتيجي وكان مطعم شاورما ناجح بس الحين بيت الشاورما فعلياً مب بيت الشاورما، صار بيت الأكل كله.

عندهم ٨ أقسام طعام من البرجر إلى الدجاج المقلي ويضبطونها كلها غير الفطور اللي موجود فيه كل شي حتى الشاورما.

بس في هذي اللستة نبي نركز على منيو الكيتو حقهم، ايه عندهم منيو كامل مخصص للكيتو، وعندهم أنواع وأشكال من خبز الكيتو صاج، برجر، شاورما، صامولي، وخبز الكيتو الأشهر طبعاً: الخس.

تابع حسابهم على انستقرام عشان تشوف جدول خاص لإقتراحات الكيتو اليومية زي إذا بس تبغى بيض و أفوكادو مثلاً. ايه بيت الشاورما عندهم افوكادو مب غريبة عليهم. حرفياً عندهم كل شي.. إلا بيتزا

شارك هذي اللستة

التعليقات


اشكرك دخلت جو بس المطاعم بعيده عني

قبل ٧ أشهر - يحيى المالكي

اشكر كل من هو قائم على هذا الفريق القوي والطموح فوق لخيال احترافيه عاليه و متعه اعلى

قبل ٩ أشهر - ابو سابي 8uqo

رهيبييينن صدق مواضيعكم تهبل

قبل ٩ أشهر - سوسو
عطنا رأيك

تبي تقرأ لستات ثانية؟

فجريّات الرياض

وش ثاني أفضل شاورما بالرياض؟

وشلون تتقهوى بأقل من ٨ ريال؟