شهر رمضان قرّب، نص العالم بالمقاضي متقروشين، والنص الثاني بالسفر مشعبِنين.
وبين هذا وذاك، فيه أشخاص يحللّون وجبات الفطور والغداء ويبون يخربونها قبل الحمية الرمضانية المؤقتة (واللي غالبًا، بينتهي العمل فيها بثالث رمضان).

في هذا العدد من نشرة مطعم الأسبوع، بنستهدف بطون اللي يبون يخربونها قبل شهر رمضان الكريم!

مطعمنا لهذا الأسبوع: بوفية مشتاق.

‎ 

‎ 

‎ 

‎ 

بوفية مشتاق من أشهر البوفيّات الشعبية في محافظة محايل عسير في جنوب المملكة العربية السعودية، واشتهر بساندويتش ابتدأ بنصف خبز عربي محشي بطاطس مقلي وبعدها أضافوا لها الفلافل مع شطة أو كاتشب على حسب الطلب.

هذا الساندوتش المشهور استقطبوه مجموعة سعوديين بالشراكة مع مالك المطعم في عسير، وفتحوا أول فرع لهم قبل ٨ شهور تقريبًا في حي طويق بغرب الرياض. لكن الساندوتش ما انتقل بنفس شكله، مشتاق تطوّر وتمدّن بطبيعة هبّات لغاويص مدينة الرياض.
ابتكروا ملّاك المطعم وصفتهم المميزة والمشبعة، وكسروا مفهوم إن الفلافل فقط للفطور، الفلافل مناسبة لجميع الأوقات اللي تكون فيها جايع، وعشان كذا فرعهم الأول في حي طويق فاتح ٢٤ ساعة.

المطعم نجح واكتسب شهرة عالية على تيك توك، وعنده زبائن أوفياء يجون باستمرار، بعدها مالك المطعم في عسير تواصل مع مالك المطعم في الرياض عشان يدخل شريك معه. 

عشان تكون بالصورة، ترى المطعم قلّدوه ناس كثير. في حي طويق على الشارع نفسه فيه مطعمين بنفس الإسم: مذاق مشتاق، وذوق مشتاق. حنا نقصد ذوق مشتاق.

ليه اسمه مشتاق؟ لإن مالك المطعم في محايل عسير سمّى المطعم على عامل هندي اسمه مشتاق، اللي علّمه على وصفة الساندوتش الأصلي، طبعًا العامل سافر ويبدو إن مالك المطعم مشتاق له للحين.

‎ 

البوفيّات ملاذ المطفّرين وقت الجوع الشديد، وبوفيّة مشتاق يقدمون لك وجبة مشبعة بـ٩ ريال بس -هذا أغلى طلب بالمنيو- والوجبة هي نفس الساندوتش اللي ماتقدر تاكله بيد وحدة.
بوفية مشتاق تميّز عن أي بوفيّة تسوي فلافل أنه خلطته مميزة، وأنك تقدر تشكّل الساندوتش على كيفك، تبيه زيادة بطاطس، زيادة فلافل، زيادة كتشب أو شطة أو طحينة، أو بدون صوصات إطلاقًا.

وميزة المطعم إنه مايتفلسف، عندهم طبقين: مشكل مشتاق ومخلوط مشتاق.
نفس الخلطة بس السر في الطبخة، وكلهم يتنافسون على إسعاد بطنك.

المطعم طابعه سفري، ماعنده جلسات بس تقدر تاكل على الرصيف وتتذكر نفسك مع أخوياك أيام الاختبارات النهائية.

حاليًا افتتحوا فرع جديد في حي الدار البيضاء واللي يفرقه عن فرعهم بطويق إن عندهم مخبزهم الخاص داخل المطعم.

عادةً نقترح مجموعة أصناف في كل مطعم نكتب عنه بنشرة مطعم الأسبوع من باب تنويع سفرتك، بس هالمرّة ما نحتاج نقترج عدّة أصناف؛ لأن فيه صنف واحد بيشبّعك لنهاية اليوم!

وجبة راهية بالمعنى الحرفي!
تتكون من خبز عربي محشي فلافل وبطاطس مقلي وبيض مع اختيارك من الصوصات، مع نوعين جبن: شيدر وكيري. ونوعين بطاطس: شيبسي عيدان والبطل.

كانت هذي لستتنا الثالثة والعشرين ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب