السعوديين يحبون شاهيهم، البنك الدولي يقول اننا نشرب ٧ مليار كوب شاهي سنويًا، يعني إذا كان فيه سائل أحمر يمشي بعروقنا فهو مب الدم، هو شاهي أحمر مع نعناع وسكر أو بدونه إذا كنت غني، زي ما انتشر عن بن جدلان رحمة الله عليه: أهل الفلوس تفضل الشاهي المر.. عشان دنياهم حلاها زياده، ولا الطفارى تدبغ الكاس سكر.. تبي تخفف به مرار النكاده.

لكن الشاهي في خطر، القهوة المختصة جتّ وبدأت تستبدله كالمشروب اليومي المفضّل للسعوديين، الشاهي كمشروب متجذّر في ثقافتنا، ولا يمكن نسمح لنفسنا ننساه، عشان كذا واجهنا الانتشار الهائل للمقاهي المختصة ببيوت الشاهي اللي ازدهرت حديثًا في الرياض. 

في هذي اللستة بنتعاون مع فاهم، واحد من أشهر الناس اللي يشربون شاهي، فاهم يغطّي بيوت الشاهي الجديدة بشكل مستمر بحسابه على تويتر.

صورة الخلفية من إبداع عدسة راشد السبيعي

بيت الشاهي هذا ما كان بيت شاهي، في سنة ١٤٠٧ كانت كافتريا للوجبات السريعة اسمها بوفيه الشاطئ في خميس مشيط يتجمعون فيها مجموعة من العمال الأتراك ويلعبون فيها النرد لليالي طويلة. 

بعدها تم تطوير المكان مع الحفاظ على الشاهي البخار المميز حقهم وفتح في الشرقية في ١٤٣٠ وغيّروا أسمهم لشاي بخار. 

ما زالوا يحافظون على طريقة الشاهي التركية مستخدمين مكينة شاهي البخار (السماور) الموسومة بشعارهم، وايضًا يستخدمون نوعهم الخاص للشاهي اللي تقدر تشتريه بنفسك.

بيت الشاهي الحيوي هذا له ستة فروع في الرياض، دائمًا مزدحم بالمساء، تقدر تشوف بنفسك الناس وهم يلاحقون بعض بالسواليف، الجلسة الخارجية فيه ما تتفوّت، حتى مع أجواء الرياض الصعبة الرذاذ اللي موزّع على كل جلسة يحلّ هذا التحدي. 

أكثر شي يتميّز به هذا المكان هو الديكور الداخلي، كثير محلات تحاول تقلّد الأسلوب الكلاسيكي للبيت السعودي القديم لكن شاي وسمسم هم الوحيدين اللي قدروا يجيبونه صح.. وفيه فعالية مميزة في المكان هذا: عندهم نسخة قديمة من دليل الهاتف، حاول تلقى رقم هاتف بيتكم القديم فيه. 

في فرع حيّ الوادي بعد الساعة ٤ يقدمون أنواع مختلفة من الأطعمة زيّ المطبّق والتشباتي، بالحقيقة مب هم اللي يقدمونها، يجيبونها من مطعم بجنبهم.. بس برضو لذيذة. 

بيت الشاهي هذا كان عربة باعة جوّالة، أو بسطة، وتحوّل لمحل.. يقال عن الشاهي اللي يقدمونه انه أرجل شاهي في الرياض.. ويوم جرّبناه نتفق معهم، بيت الشاهي هذا اللي يميزه انه محل صغير يقدم شاهي جمر، يعني لو تقعد فيه لعدة ساعات بترجع وريحتك حطب، كأنك كاشت في منتصف الصيف. 

يفتح ٢٤ ساعة في حيّ الرمال، بس لا تشيل هم الزحمة اللي قدّامه لأنهم سريعين ولا تشيل هم الشاهي لأنه في الراس. 

قبل ما تقول: طابور عشان شاهي؟! نقول صف بالطابور وجرّب هذا الشاهي. 

أول ما تدخل بتلاحظ ان المحل ينفع يصير محل عطور، مهب بس عشان ديكوره الداخلي البسيط، عشان الروائح العطرية اللي تطلع من الأنواع المختلفة من الشاهي اللي يستخدمونها. شباب سعوديين فتحوا المحل هذا بعد ما كان فود ترك مشهور، الناس يحبون عنده الكركدية والشاهي المنكّه المثلّج، لكن حنّا أعجبنا عنده الشاهي الطايفي. 

واحدة من أشهر وأكبر بسطات الشاهي سابقًا في ثمامة، لكن مع التطوّر العمراني اللي حصل اضطروا يتوسعون ونقلوا لمحل، ثم نقلوا لمحل ثاني، الحين ما ندري بالضبط وينهم بس إذا لقيتهم علّمنا، يحطون قدام فرعهم سيّارتين قديمات يمكن تساعدك تلقاهم. 

اللي يميّزهم انهم يقدمون خدمة السيّارات، تقدر تقعد بسيارتك وتنتظر مقنّد الرأس يجي عندك. 

آخر بيت شاهي في اللستة هو أول واحد، كيف؟ هذا المحل اللطيف في حيّ النرجس هو واحد من أوّل بيوت الشاهي الحديثة في الرياض، ديكوراته الداخلية رايقة والمكان من جوّا دافي كأنه صالة بيت، والموسيقى اللي يلعبونها داخل المكان تدل على ذائقة مرتفعة للطاقم التشغيلي لبيت الشاهي هذا. 

ومن المميزات الثانية لبائع الشاهي هو انهم يبخرون المكان يوميًا، ويمنعون دخول الأطفال فيه، يعني تقدر تشرب شاهي براحة واطمئنان وسكينة وجنة الأطفال منازلهم. 

أخيرًا هكّر مرسول.. بدال ما تروح لبيت الشاهي، أطلبه من مرسول وخلّه يجيك! وشلون تضبطه زيّ ما يضبطونه؟ اعتمد الوزنية اللي نقلها لنا فاهم من ملك الشواهي: مقابل لتر موية ١٠ جرام شاهي إذا كان بدون سكر  أو ١٢ جرام شاهي مع ٥٠ جرام سكر.  وتختلف الوزنية باختلاف انواع الشاهي، نوع الشاهي اللي نفضله حنّا في كلماشي هو شاهي أبو جبل، تقدر تطلبه فرط أو حتى أكياس شاهي.. ودايمًا مرسول بيوصله لك.