فيه علامات كثيرة تدّل إنك نضجت (وفي رواية، شيّبت)؛ أحدها أنك تبدأ تتقبل -وفي أوقات، تتلذذ- بأكل ما كنت تحبه، زيّ الخضروات!
مع تقدمك بالعمر، يمكن صرت تحب الشمندر، أو تستمتع بمرارة الباذنجان، وصرت ما تمانع حلاوة القرع لا لقيته بالرز.

لكن فيه ناس، عكس الخضروات، ما ينضجون أبد وما زالوا يشيلون الخضار من السندويشة.
لكل من لم ينضجوا بعد: مطعم هذا الأسبوع لكم.

‎ 

‎ 

‎ 

‎ 

على اسمه، يقدّم هالمطعم أطباق كلها مشوية بالمنقد! عندهم مشاوي وأطباق جانبية مختلفة، وحتى ورق العنب يشوونه!
سألنا مطوّري المنيو لهذا المطعم عن كيف جتهم فكرة شواء ورق العنب، وقالوا: "في مرحلة التطوير تساءلنا: وش الحدّ اللي نقدر نشطح فيه؟"

المطعم افتتح في أواخر شهر أكتوبر من سنة ٢٠٢٤م، ومن ثقتهم في جودة أكلهم افتتحوا ثلاث فروع في فترة قصيرة!
من الزحمة اللي عليه حاليًا، غالبًا ما راح تلقى كرسي فاضي. يعني، بتستلم الطلب وتأكل بالسيارة وأنت تتفرج على مقاطع من قناة كلماشي في يوتيوب (بنحط لك روابط أحدث منشوراتنا آخر النشرة).

يمكن شفت له إعلانات كثيرة الفترة الماضية، بس هل هو فعلًا يسوى الضجة اللي سواها؟ الإجابة المختصرة: ايه، يسوى.

‎ 

بمجرّد ما تدخل الفرع، بتقدر تشوف كامل المطبخ - ما يخبون شي -  أي بيمديك تتطمّن على نظافة المكان وتشوفهم يحضرون طلبك؛ من خَبز الرغيف - يمديك تختار خبز أبيض أو بر -  إلى شواء اللحم وتحضير السندويش لك.
أطباقهم الجانبية معطينها نفس أهمية الأطباق الرئيسية. عندهم حمص، ذرة، بطاطس و ورق عنب كلها مشوية.

هذا المطعم بيعجب صديقك عدّو الخضار؛ كونه ما راح يتعبك إذا صار فيه - الله لا يقوله -  شريحة طماط بالغلط، لأن أغلب سندويشاتهم تحتوي على لحم وصلصة وبس. لكن لو صدق هو مشخصن مع الطماط، لا يطلب كباب الدجاج. لا يقول محد قال لي! 

‎ 

كل سندويش مسوين له صلصة خاصّة، بس بيخيرونك بين كمّ واحد إذا جيت تطلب.
نصيحتنا: اختر الصلصة اللي يرشّحونها؛ لأنهم أدرى، إلا لو عندك تفضيلات معينة.

هل سندويشات الستيك لازم يصير سعرها كِليَة؟ منقد يقول لا.
فيليه ستيك مع الصوص الذهبي والبطاطس.

من الأفضل مبيعًا! لحم حاشي مع طحينيّة بشراب القيقب، وبقدونس، وباذنجان مقلي.

الأغلب يطلبونه مع الثوم، بس ننصحك تطلبه بالطحينيّة. يجي معه بطاطس نحيفة جدًّا ومقرمشة!

نحب الأشياء المميزة، ونقدّر لما الناس تشطح. أضفناه كجدير بالذكر لأنه يختبر نظرية إن أي شيء ينشوي على الفحم لذيذ.

كانت هذي لستتنا الواحد والعشرين ضمن لستات "مطعم الأسبوع" في مدينة الرياض.

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب