السعودي مكسيكي، والمكسيكي سعودي

تاريخ النشر 2023-05-11


هولا أميقوس، عفوًا، قصدنا: هلا بالعيال! المكسيك تبعد عن الرياض آلاف الكيلومترات، لكن مافيه مسافة تمنع بطوننا من اكتشاف مطبخهم اللذيذ. عندهم بوريتو، وناتشوز، وتورتيلا. وعندهم بهارات منوّعة مختلفة مثل الكايين والسيلانترو والتاهين والهابنيرو. 


مطبخهم مليان نكهات تثري أيّ وجبة عشاء، للأسف، قليل في الرياض مطاعم مكسيكية أصيلة.. اللي موجودة عندنا هي النسخة الأمريكية من المطبخ المكيسيكي. 


في هذي اللستة فيه خمسة مطاعم أعجبتنا، من أصل تسع مطاعم مكسيكية في الرياض. نمزح، يمكنها أكثر من تسعة لكنها بالتأكيد أقل من اللازم. ڤاموس! 

المطعم الأول

 هذا مطعم، ولا حانة؟ أنا لا أعلم يا صاح. رح هناك وبيقلب صديقك سالم لرودريغو، وصديقتك صيتة لماريا. 

بداخليته الخشبية العتيقة هذا المطعم يعتبر من أول المطاعم المكسيكية في الرياض، ويقدّم تجربة متكاملة بأغاني خلفية مكيسيكة وتقدر تلبس بونشو (اللي هو البشت المكسيكي) والسمبريرو (طاقية مكسيكية) وتبدأ تمثّل في فلم كاوبوي قديم. 


مطعم اميجوس يقدّم منيو مكسيكي يتميّز فيه التشيلي ريلينيو، وهو حبّة فلفل حار محشوّة باللحمة المفرومة وجبن الكيسو المكسيكية، وهذي الجريمة بحق البشرية تقدّم مقلية ومع الرز والفول وسلطة ما تهمّك ولا تهمنا. 

في مطعم اميجوس أخوين رهيبين يشتغلون سويّة من بنقلادش، لكنهم روحيًا مكيسكيين: إذا رحت هناك اسأل عن حسين وعبد القيّوم وشف شنب واحد منهم وسولف معه. 

مب بس التشيلي ريلينو اللذيذ عندهم، برضه عندهم برقر مكسيكي، وبيتزا ناتشوز، وتشمي تشانقا، وانشلادا، وأشياء كثيرة مبهرة صح ولذيذة. 

المطعم الثاني

تخيل تشوف أكل سعودي لابس بونشو، هذا الوصف اللي ممكن توصفه لمطعم تاكوريا، تاكوريا موب مطعم مكسيكي بحت، هو مطعم خليط بين الأكل السعودي والعربي والأكل المكسيكي، يعني ماريا رودريغوز العتيبي. 

هذا المطعم في حيّ النفل يفتح يوميًا الساعة أربعة مساءًا ويقدّم وجبات مكسيكية بمنظور عربي، أو عربية بمنظور مكسيكي؟ ما ندري. بس الوجبات اللي بدّع فيها هذا المطعم هي: تاكو لحم مظبي، سلطة الكراب، ولا تنسى تحلّي بالتشوروز المخبوزة. 

وعشان الصيف جاء، وقبل لا يزاعق عليك الزعاق بدرجة الحرارة: اشرب موهيتو الليمون الحساوي أو شاهي مثلّج بالحبق المديني وبرّد خاطرك فيه. 

وش اللي يجمع المكسيك بالسعودية؟


فكّرنا وش اللي يجمع المكسيك بالسعودية؟ وقررنا على التالي: كلنا مجتمعات تتمحور حول العائلة.

كلنا نأكل شاورما، بس بشكل مختلف. كلنا نأكل رز، بس بشكل مختلف. 

كلنا علاقتنا متوترة مع امريكا. كلنا اجوائنا حاره. نحب الأكل الحار. والبهارات. 

كلنا تاريخيًا بيوتنا طينية متشابه ومثل المثلثات النجدية بتلقى مثلثات مكسيكية: الناتشوز. 

كلنا عندنا خليج وحدودنا فيها بحرين من الشرق والغرب. وعندهم صبار؟ عندنا نخل. 

وأخيرًا: لمبات الشوارع الصفراء في الرياض تعطينا احساس فلتر هولويوود على مدن المسكيكية. 


في أشياء كثيرة تجمعنا، بس أهمها هو الأكل، لا يفوتك المطعم الثالث: 

المطعم الثالث

الابن البار للتاكو، صحيح ما عنده منيو متنوع بالأكل المكسيكي لكن مركز على الأصناف اللي يقدمها ويضبطها! هنا بتلقى التاكو على أصوله. بتشوف في المنيو ٣ طلبات: تاكو، فامبيرو، وكساديا. وفيه خيار انك تصمم التاكو حقك، نصيحتنا لك إذا بتتبع هذا الخيار اختر المكونات هذي: تورتيلا دقيق القمح، ستيك مشوي، جواكمولي وصلصة بانديرا والبصل والفلفل المشوي اطلبها برا، وآخر شي الصلصة اختر درجة الحرارة وسط.

كذا فريس، الطباخ غير الماهر يختار التاكو حقّه. أنت وشلون تأكل التاكو حقّك؟ علّمنا بالتعليقات. 

المطعم الرابع

ميزة الأكل المكسيكي في الرياض ماله نوع محدد من المطاعم، اللستة فيها مطاعم فخمة زي تاكوريا، ومطاعم كاجوال زي تاكوسن، وإذا بغيت أكل مكسيكي على السريع وطعمه لذيذ لا تتعدى مكسيكا.

طريقتهم تشبه صب واي في الطلب، تبدا باختيار الخبز ثم البروتين ثم الخضار والصوصات، وهذا الشي مريح لضميرك، رغم انك اكلت ٣ بوريتو من عندهم، إلا انك بتحس انه أكل صحي.

مكسيكا يسوّون أكثر حركة أمريكية عن المكسيك وهيّ إذا طلبت تاكو يوم الثلاثاء بيعطونك حبّة تاكو إضافية مجانًا. ليه؟ لأنها ثلاثيات التاكو. 

وش جديد المسلسلات والسينما المكسيكية؟

في التسعينيات كان من أشهر الأشياء اللي تنعرض في التلفزيون العربي هي الدراما المكسيكية المدبلجة بالفصحى، مثل ماريا ميرسيدس المسلسل اللي قصته عن ماريا البنت الفقيرة المسكينة ومعاناتها في توفير لقمة العيش لأسرتها.

تميزت المسلسلات المكسيكية وبالذات ماريا بالمبالغة بالدراما والأحداث المأساوية في القصة، وهذا اللي  خلاه أشهر مسلسل مكسيكي وقتها، بس يبقى أفضل عمل مكسيكي بالنسبة لنا هو حلقة طاش ما طاش بأسلوب الدراما المكسيكية.

الأعمال المكسيكية تطورت من ذاك الوقت وعندهم مسلسلات وأفلام جديدة رهيبة صح ما نزلت لها دبلجة بالفصحى بس تقدر تحط ترجمة، اخترنا لكم ٣ من هذي الأعمال:

العمل المكسيكي الأول

جرائم غامضة: اغتيال كولوسيو

مسلسل محدود من ٨ حلقات عن قصة حقيقية صارت في المكسيك سنة ١٩٩٤ بعد اغتيال مرشح لرئاسة المكسيك اسمه "لويس دونالدو كولوسيو" ومحاولة زوجته انها تحل قضية اغتيال زوجها وكشف المرتكب، لكن الاغتيال الحقيقي في هذا العمل بيصير على مللك وأنت تتابع.

العمل المكسيكي الثاني

عندليب المكسيك

زي ما عندنا العندليب عبدالحليم حافظ، المكسيك عندهم عندليب اسمه لويس ميغيل، اللي أعطى اللقب هذا للفنان لويس غالباً مترجم نيتفلكس اللي ترجم اسم المسلسل بس معروف لويس انه من أبرع وأنجح الفنانين في تاريخ أمريكا اللاتينية موب في المكسيك بس، تابع المسلسل واعرف قصة الفنان واحكم بنفسك، نعتقد انه بيكون مسلسل تهواه وتتمنى ما تنساه.

العمل المكسيكي الثالث

باردو

هذا الفلم العظيم من الأفلام اللي ترشحت للأوسكار، قصته عن صحفي وصانع وثائقيات يروح في رحلة للتصالح مع ماضيه وحاضره وهويته المكسيكية، وزي ما هو باين من الوصف هذا فلم من النوع الفني وما يعتمد على الأكشن والأحداث، كأنك خذت مسلسل ماريا مرسيدس وعكست كل شي يسوونه.


هذا آخر عمل مكسيكي في هذي اللستة السريعة، بس بقى المطعم الأخير:

المطعم الخامس

أغلب المطاعم المكسيكية في الرياض هي في الحقيقة مب مكسيكية، هي تقدم نوع أمريكي من الأكل المكسيكي اسمه تيكس ميكس، ونادر ما تلقى مطعم مكسيكي تقليدي أصلي زي إل بلاسير.


اللي سوا الوصفات للمطعم هو الطباخ المكسيكي الرهيب كيفن، صح ان اسم الطباخ ما تحسه انه مكسيكي، عشان كذا بنسميه رودريغو. الطبّاخ رورديغو يطبخ أطباق منوّعة في إل بلاسير مثل: ألامبري وهو فعالية أكثر من انه أكلة، إذا طلبته بيجيك خلطة دجاج مع لحم على الصحن وخبز تورتيلا عشان تغرف فيه الأكل زي الفول. 


ترا المطعم فاخر نوعاً ما، يعني إذا جيت تروح له البس طقم دبي.


شارك هذي اللستة

التعليقات


للل

قبل عام واحد -

و دون روبنز يا اميقوس! اجودي و البريا تاكوز👌🏿👌🏿👌🏿 it’s a must

قبل عام واحد - ماريا

اميقوس رحت له عشان تشيلي ريلينو وجابوها لي فاضية من غير فلفل وكان أكثر شيء محبط💔، للأسف الرياض للحين مافيها أكل مكسيكي وخصوصًا تاكو يبرد القلب

قبل عام واحد - نجلاء

مطعم هولبوش في الشرقية الاحساء البوريتو حقهم رهيب والبيريا تاكو 😗

قبل عام واحد - Mohammed alnujaydi

أختلف معكم في تاكوسون، مفترض برا القائمة. تجربة ما تنعاد مب حول المكسيكي. 🤣 دون روبين هو الأول ⭐️

قبل عام واحد - سوما

وش رايكم في دون روبين اللي في السفارات؟ ما يستاهل؟ ولا عشان ذكرتوه في قائمة ثانية ما يُقترح مرة ثانية؟

قبل عام واحد - ابراهيم

ترا نسيتو واحد رهيب و صاحبته مكسيكيه و اسمها نورا شد بلاد ما غيرته و كذا اسمه مطعمها بالسفارات اسمه دون روبنز لايفوتكم 👍

قبل عام واحد - غوادالوبي
عطنا رأيك

تبي تقرأ لستات ثانية؟

مطلات أودية الرياض

كلمة تسعدك: فطاير

وشلون تتقهوى بأقل من ٨ ريال؟