فيه ثنائية متكاملة ومتجانسة ومنسجمة مع بعض: اللحم والجوّ الزين.

هذي الثنائية تشم ريحتها في أيّ منتزة برّي مزدحم بالرياض، أجدد هذي المنتزهات: منتزه الملك سلمان البرّي، واحد من أفضل أماكن الشوي في الرياض.. بس اذا كان المكان زين لازم اللحمة تكون زينة.

سمّينا هذي اللستة "المجد للرخوم" لسببين: أولًا، لأن أهم علامات الجودة في قطعة الستيك هيّ الترخيم. وثانيًا: لأنك إذا بتشوي ستيك في منتزه برّي، أنت بلا شك رخمة، مع كامل احترامنا.

حاولنا نجمّع عدّة خيارات لملاحم أسعارها متفاوتة؛ فيها الرخيص والغالي، الطازج والمفرزن، الجديد والقديم. بالعافية عليك مقدمًا!

من انتقل كريستيانو رونالدو للرياض وطبّاخه الخاص ما يشتري لحم الا من ملحمة وحدة: تشوبد. هذي الملحمة تأسست سنة ٢٠١٥، وهيّ سفير لحم رسمي من منظمة لحوم البقر والغنم الأسترالية وهذا المنصب الشرفي ما يمنعهم يقدمون أنواع مختلفة من اللحم.. فهم أول من جاب الواقيو الياباني للأفراد، وأول من وفّر اللحم المغذى بالأعشاب.

اللي يميّز تشوبد هو الجودة، اذا دخلت لفرعه بتشم ريحة اللحم المبرد المختار بعناية، أو يمكن ريحة ركن الجبن الفاخر يطغى عليه.

فيه تنوّع عالي بمنتجات تشوبد، تقدر تشتري منهم قطعة فلات ايرون، أو قطع خد البقرة، أو أيّ قطعة ودك فيها اذا قلت لهم.

تشوبد هو محطة تأخذ فيها كل مستلزمات الشوي اللي تحتاجها، وإذا ما لك خلق تشوي: تقدر تذوق لحمهم بشكل مباشر من مطعهم المميّز: سبريد.

تدري وش يطلب كريستيانو دائماً من تشوبد؟ سييييييييييخ كباب!

ميت ستوري زي ما هو باين من اسمه يهتم بقصة حياة قطعة الستيك، من بدايتها في المزرعة اللي جت منها، لين ما توصل بطنك. يستوردون لحومهم من مزارع محددة في أستراليا واليابان زي مزرعة رينجر ڤالي في أستراليا المتخصصة بالبلاك أونيكس وهذا النوع ما تلقاه إلا في قصة لحم، وهم من الملاحم النادرة اللي يبيعون واقيو ياباني بدرجة ترخيم ١٢.

مالك هذي الملحمة ما ياكل ستيك ومع ذلك صار خبير ستيك درجة أولى يعرف كل شي عنه، من أنواع الستيك إلى تراخيصها وحتى مزارعها، وكان يجرّب الستيكات على أصدقائه اللي من عشّاق اللحوم.

في نفس الملحمة عندهم مطعم تقدر تختار لك فيه أي نوع ستيك مع سماكته و درجة الاستواء اللي تفضلها أو جرب شي من المنيو مثل ساندويتشات الستيك أو البرجر.

هذا المحل الفاخر جدًا هو أول شركة لحوم عندهم غرفة مخصصة لتجفيف اللحوم، تقدر تشوفها بمنتصف فرعهم الجميل قرب حيّ التحلية، غير محلهم ولحمهم فهم يخدمون احتفالاتكم بمأكولاتهم اللذيذة

‎ 

هذا مب ملحمة تقليدية، منتجاتهم الغالية والفاخرة مصنوعة بشكل يدوي داخل مطبخهم المركزي، منتجات زيّ الصوصات والبهارات المميزة، أطباق الجبن الفاخرة، وساندويتشاتهم اللذيذة: الباسترامي والروست بيف.

تقدر تأكل عندهم قطعة ستيك بوزن طفل توّه مولود، ومدة تجفيفها تساوي دخول هذا الطفل للحضانة. جرّب قبل ما تشتري منهم اللحم.. تأكله عندهم!

اللي يميز هذا المحل في اللستة إنه هو الأقدم والألطف للجيب، وجهة الغذاء هي ثلاجة لحوم مستوردة بدت تبيع للأفراد في الرياض من بعد كورونا، بس بدايتهم الفعلية في بيع اللحوم كانت من ١٩٧٢م بالجملة باسم (ثلاجة شحاتة) وهو مؤسس المحل اللي كان يبحث عن أفضل مصادر للغذاء في العالم خصوصاً اللحوم.

‎ 

بدت تجارة عائلة شحاته في جدة ثم توسعوا في المدينة والرياض وناوين على توسع أكبر في الجنوب والشمال بعد، ومتخصصين في بيع اللحوم الفاخرة المجمدة بأسعار ممتازة وتركيز عالي على جودة اللحوم.

المحل من بداياته وهم مركزين على استيراد اللحوم الفاخرة عالية الجودة لكن اللي فرق معهم إن الحين تطورت ذائقة المستهلك في المملكة عن أول، وحالياً يستوردون من ٦ دول مختلفة، سألنا المدير العام حسن شحاتة وش ينصح فيه وقال إنه ينصح جداً بالأرجنتيني.

شكرًا لكم! كان هذا عددنا الجديد من منتج لستة من كلماشي.

ودّك تشوي ستيك من اقتراحاتنا؟ شيّك على قائمة اللستة في جوجل مابز! تبي تشوي مع أخوياك؟ شاركها في قروب الشلّة!شاركها في قروب الشلّة!