الرياض مافيها بحر بس فيها سمك، فيها سمك كثير: سمك مقلي، سمك مشوي، وسمك مطبوخ بالحجر. وش أفضل السمك في الرياض؟ وشلون تشتري السمك؟ وشلون تأكله؟ نتوقّع بفمّك.. عشان تتأكد اقرأ اللستة كاملة وعلّمنا بالتعليقات.

يوم الجمعة هو يوم السمك في مدينة الرياض، يتحولون الأباء لصيادي سمك في أسواق السمك المنتشرة شمال وجنوب المملكة. يلمسونهم ويحطون أصابعهم في خياشيمهم عشان يطلعون افضل سمكة تتغدى عليها عائلتهم الجميلة. 

مبيعات مطاعم السمك تزيد أكثر من ٪٥٠ يوم الجمعة، وهذي معلومة حقيقية. من بين كل هذي المطاعم وش أكثرهم اللي يستحق الوقت اللي بتقعد فيه بالزحمة؟ في هذي اللستة بنذكر ٥ مطاعم سمك وبحريات منتب ندمان على تجربتها، شارك هذي اللستة مع الوالد وجربوا مطعم جديد بكره وعلّمونا رأيكم: 

مطعم جوشن تأسس سنة ٢٠١٩ وأرضية المطعم عبارة عن رخام أزرق جميل يعطيك إحساس وهمي انك قاعد تمشي في قاع المحيط وانك على وشك تقابل حورية بحر لكن أنت في الحقيقة بتقابل سمكة في حي المنصورة.

عندهم أنواع سمك كثيرة ومختلفة من سلمون مستورد من مزارع النرويج اللي دايم تلقاه بالموسم و تقدر تاكله مع خبز ملوح يمني وسمك الدنيس المطبوخ بالتنور واللي هم مشهورين فيه.

رغم ان جوشن مطعم صغير بالعمر إلا انه كسب سمعة كبيرة، إذا شفت المنيو حق المطعم بتشوف ٤ أنواع رز، بس فيه نوع خامس سرّي يقدمونه يوم الخميس: رز برياني.

 والشي الرهيب الثاني في منيو هذا المطعم ان عندهم ٧ أنواع حلا مثل المعصوب الملكي وعريكة عرايسي بس نصيحتنا لك: جرّب المرسة، وهي زي المعصوب بس بدون قشطة. 

إذا زرت سوق الشمال المركزي للأسماك بتشوف محلّات كثيرة جنب بعض تشتغل بنفس الطريقة: تدخلها، تختار السمك اللي تبيه، تختار طريقة التحضير اللي تبيها ويطبخونها لك، لكن أسماك دلّة عليه زحمة أكثر من الباقي، هل أسماكهم مجتازة اختبار رخصة القيادة؟ 

اللي يميز مطعم أسماك دلّة هو أسماكهم الطازجة اللي تجي يومياً من الشرقية. عادة المحلات تشتري أسماكها من مزاد الأسماك اللي موجود في السوق، لكن أسماك دلّة يرسل ٢ من الموظفين يومياً يجيبون أسماك من الدمام بالسيارة، ننصحك تطلب من عندهم صيّادية شعور وكنعد، لأنها بتدل فمك على طول.

في الرياض ما عندنا بحر، بس عندنا أسواق سمك مركزية تجيب السمك الطازج دائماً، وإذا رحت هناك تحتاج مهارات معيّنة في اختيار السمك الزين والتفاوض عشان تلقى لك صفقة رابحة تقدر تسميها: صيدة.

عندنا في الرياض سوقين رئيسيين للسمك: سوق الشمال المركزي للأسماك و سوق المربع للأسماك هناك بتلقى كثير من محلات ومطاعم السمك وأسعارهم هي الأفضل في الرياض، بس لا تشتري من أول محل تدخله، تمش في السوق أول وقارن بين الأسعار.

أكثر الأسماك اللي عليها طلب في الرياض هي: الكنعد، الشعور أو الشعري، الهامور، العنبر أو سلطان إبراهيم، الناجل، البياض، العربي، الزبيدي، الصافي، البوري، البليطي، وطبعاً الروبيان. اعرف هذي الأسماء واسأل عنها في المحل حتى لو ما تبيها، بس عشان يتوقع بائع السمك انك فاهم.

فيه ٣ أشياء تدل ان السمك طازج: أول شي العيون، انتبه لا تفتنك بس العيون مهمة وأنت تختار السمك، لازم تكون واضحة وشفافة وفيها لمعة، حتى الجلد إذا شفت على قشر السمك لمعة وكأن عليه طبقة دهن اعرف انه طازج، وبالنسبة للخياشيم ابحث عنها في قوقل عشان تعرف مكانها، هذي لازم يصير لونها أحمر فاتح. 

شواطيء المكلّا من أقوى المطاعم قرب الصناعية، ومنافس حقيقي مطاعم ومطابخ السعيد إذا تبي تأكل لحوم بيضاء صحّية بدال المندي والمظبي. 

المكلّا يعتبر حديث المنشأ. فاتح له تقريباً ٨-١٠ سنوات ولهم فرعين: الظريف ان اللي يفصل الفرعين هذي هو جدار واحد: الفرع الجديد ووالفرع القديم كلهم جنب بعض. 

الجديد هو الزحمة والقديم توهم مجددينه فصار القديم جديد والجديد قديم.. مافي ذاك الفرق بينهم عالعموم كلهم نفس الجودة.. بس يمكن الفرق الوحيد ان الفرع الجديد القديم فيه أحواض سمك.

وسولفنا مع واحد من أبناء عائلة المحل الأخ أحمد باتيس اللي ساعدنا في المعلومات وكان واثق من جودة الأكل ونصحنا بالسالمون وقال لنا: 

 "اطلبوا السالمون تنور عشان نكسبكم دايم." -كاشير أحمد باتيس.

إذا مالك في وجع الراس وتلميس السمك رح لشواطئ المكلّا، في هذا المطعم أنت ما تختار السمك ويوزنه لك، أنت علمهم بس نوع السمك اللي ودك فيه وكم نفر وهو بيجيب لك أجود شي، يعني بالضبط كأنك تطلب بخاري… بس سمك.

وبنفس طريقة البخاري عندهم نوعين من الرز، لا يفوتك الرز الحضرمي وهو عبارة عن رز… بس انه حضرمي، الشي اللي متأكدين منه انه لذيذ جداً. ولا تنسى تطلب منهم السَمبل الإندونيسي وهو معجون فلفل مكشّن وإضافة رهيبة جداً مع الرز.

ميدار مطعم سمك مشهور جاينا من المنطقة الشرقية و فتح له فرعين واحد في حي القدس و فرع ثاني على طريق الملك فهد شمال الرياض.

ميزة ميدار انه جايّ من الشرقية، وهو من أشهر مطاعم الشرقية للسمك ونصيحتنا لك اطلب من عندهم سمك (سبيطي) مشوي اللي مغطينه بخلطة الصويا مع صوص الوسترشر. لذيذ. ولا باس إذا خذت سمك سيباس مع نص رز أبيض و نص رز صيادية مع روبيان.

المكان خشبي و كله صور صيادين السمك على شواطيء و بحار الشرقية يعطيك إحساس ان السمك جاي منهم. وفعلاً هذا الصح. جرب شوربة ثمار البحر كمان. وكثر عصرة الليمون على كل شي طبعاً. 

مذاق قرمشة محل سمك صغير في حي خنشليلة ما تلقى عنده أنواع كثيرة من البحريات زي المحلات الكبيرة لكن يقدم ٨ أنواع سمك هي الأكثر طلباً ويضبطونها، زي سمك الثمد اللي هو التونا، هذا السمك مشهور في اليمن لكن مع وصفة مذاق القرمشة وبهاراتهم الرهيبة صار من طلباتهم المميزة هنا.

مذاق القرمشة معروف عند سكان جنوب الرياض باسم (قرمشة) لأن هذا هو الاسم اللي بدا فيه قبل ٨-١٠ سنوات في محل صغير جداً على شارع أبها، والحين بعد ما ذاع صيته وصار من المحلات اللي يجونها الناس من أقصى الرياض بيفتح فرع جديد في شارع المطاعم قرب الصناعية.

لا يفوتك من عندهم الربيان المقلي بالبهارات اللذيذة حقتهم.