مطعم "كارني بي" هو مطعم برقر جديد من الشيف الأرجنتيني العالمي، ماورو كولاقريكو، هذا المطعم حائز على جائزة افضل ٥٠ مطعم في العالم سنة ٢٠١٩. 

هذا الشيف يعتبر نقيب، لأنه عنده ثلاثة نجوم ميشلان.. عنده مطاعم عالمية فخمة من فئة الـ"فاين دايننق" (أو المطاعم الفاخرة) حول العالم من الأرجنتين إلى فرنسا إلى اليابان. 

وبما انه أرجنتيني، والأرجنتينيين معروفين بحبهم في أكل اللحوم. قرر يفتح له مطعم برقر. 

الفرع الأول كان في مسقط رأسه الأرجنتين، الفرع الثاني في سنغفورا، الثالث  كان في بلجيكا والفرع الرابع.. بالرياض. 

ليش الرياض؟ لأن الشيف ماورو لاحظ التطور الي قاعد يصير من ناحية ذائقة الناس في المطاعم وحبهم للبرقر وقرر انه يقدم لنا برقره الخاص.

على رغم ان شكله مطعم برقر عادي إذا دخلت تشوف طاقم متكامل احترافي واضح انهم متدربين على يد الشيف الكبير ماورو.

فهذا الشي يخليك تتطمن انك بتاكل اكل لذيذ. غير الكنب المريح. والموقع رايق بعد. يلقبون نفسهم بـ: مزرعة تملك مطعم وليس العكس، أطباقهم المبتكرة تصمم بناء على المكونات الطازجة المتوفرة عندهم.  

مساعد الشف إيميليو متواجد بالمطعم بشكل دائم بالرياض وماخد وضعية الشف الأساسي بالمطعم. سألناه وش رأيك بالرياض وجاوبنا انه يحب دجاج شواية من مطعم وادي الزمرد ودايم يأكلون منه الطاقم.

طلب البرقر المفضل هو الكومبليت برقر، مع خبز بريوش مع سمسم وحبة البركة (حبة سوداء) وقطعة كبيرة سميكة من اللحمة الطازجة من كثر ما انها طازجة كأن البقرة سلخت في المطعم.. وفوقها بيض مقلي.

قطعة كبيرة من اصابع الحلوم المشوية غارزينها بعصى خشبية و فوقها صلصة طماطم حارة متبلة ومبهرة. وجبة النباتيين المثالية. ولذيذة حتى لو ما كنت نباتي.

‎ 

كانت هذي خامس نشراتنا في لستة "مطعم الأسبوع".

تبي تصير من المحظوظين اللي وصلتهم أول ناس؟ سجل بالنشرة البريدية من هنا

أما لو تبي تشارك هالتوصية مع قروب العائلة، شارك التوصية عبر واتساب