بعد اكتشاف أول بئر نفط بالسعودية في عام 1938، لاحظت المملكة إن فيه تحدي كبير في قطاع الطاقة، فبعد الاعتماد الكبير على المهندسين الأجانب لسنوات عديدة، احتاجت المملكة لمرحلة تطوير تعليمية كبيرة، كانت المملكة تحتاج مواطن يقدر يمسك مناصب كبيرة ومهمة في هذا القطاع، خاصة إن وقتها كان هو أهم مصدر دخل للمملكة والاستثمار في موارده البشرية من بدري هو الحل الوحيد والأهم.

وفي ٢٣ سبتمبر ١٩٦٣م، ومن خلال مرسوم ملكي تم الإعلان عن سادس الجامعات السعودية، الجامعة الأولى والوحيدة المتخصصة في مجال البترول:

كلية البترول والمعادن.

"كان هذا المعهد حلمًا من أحلامنا قبل عدة سنوات، حيث كنا ننظر إلى ما حولنا فنجد أنفسنا صامتين مبهورين ليس في إمكاننا أن نجاري غيرنا، أو نقارع الأمم الأخرى في سبيل النهضة والحياة، ولكن الله سبحانه وتعالى سهّل السبيل ومهّد الصعاب التي تعترض الطريق، فوُجد هذا المعهد في فترة لا تتجاوز السنتين، وفي اعتقادي أن هذه فترة قياسية، أن ننظر إلى ما كنا عليه قبل سنتين، وما نحن عليه الآن".

- الملك فيصل في حفل افتتاح الجامعة 

مدينة الظهران تسمت بهذا الاسم نسبة لجبل جيري بارز و"ظاهر" في منتصفها واللي يوصل ارتفاعه إلى 100 متر، وهو الجبل اللي انبنت على قمته جامعة الملك فهد للبترول والمعادن.. اللي بالمناسبة بالقرب من المكان اللي تم اكتشاف فيه أول بئر نفط بالمملكة "بئر الخير"، أو بئر رقم ٧.

بدأت كـ "كلية" البترول والمعادن اللي كان عدد طلابها ٦٥ طالب، وخرّجت في أول دفعة ٤ طلاب فقط!، ثم في عام 1975 تحولت لـ "جامعة" البترول والمعادن، وبعد زيارة الملك فهد لها في 1986 تحولت رسميًا لـ"جامعة الملك فهد للبترول والمعادن".

كل فترة يحدثون ويجددون كلياتهم وتخصصاتهم باللي يتناسب مع السوق ومتطلباته، وهذا اللي يخليها من الجامعات اللي نسبة العروض الوظيفية اللي توصل لطلابها قبل تخرجهم نسبة عالية مقارنة بأي جامعة سعودية أخرى.. مثلًا بعد النهضة الكبيرة اللي حققها قطاع الذكاء الاصطناعي وفائدته الكبيرة في مختلف القطاعات الهندسية وغير الهندسية، قررت الجامعة تدرّس كل طلابها مقرر ذكاء اصطناعي مهما كان تخصصهم.. وهذا الاهتمام بالتفاصيل العلمية الصغيرة، هو اللي خلاها الجامعة الأولى عربيًا، والسادسة عالميًا في براءات الاختراع.. تقدر تعرف تفاصيل أكثر عن التخصصات الدقيقة داخل كل كلية والقطاعات اللي تخدمها من هنا.

في ٢٠١٩ صار أكبر حدث تعليمي تاريخي في المملكة، وهو قرار فصل جامعة البترول عن مسؤولية وإشراف وزارة التعليم، وواحدة من أكبر القرارات اللي صارت بعدها هو قرار قبول أول دفعة طالبات بكالوريوس في تاريخ الجامعة من يوم تأسيسها في عام ٢٠٢١، وهذا موب بس حدث بترولي، هذا حدث سعودي تاريخي بسببه بتتخرج أول دفعة بنات في التخصصات الهندسية البترولية في السعودية في عام ٢٠٢٦، يعني بعد ٨٨ عام من اكتشاف أول بئر نفط بالمملكة!.

نسبة كبيرة من طلاب البترول هم من خارج المنطقة الشرقية، ونسبة منهم من الطلاب العالميين اللي يجون من خارج المملكة.. فتجربة السكن هي تجربة فريدة تشابه -إذا موب نفس- تجربة الإبتعاث، عشان كذا تشوف سوالف صديقك المبتعث لبريطانيا هي نفس سوالف خويك اللي ماسك خط ٤ ساعات بس لجامعة البترول، صح الأول تشوفه كل رأس سنة، والثاني تشوفه كل ويكند.. بس تجربتهم وحدة من كثر ما الجامعة بالنسبة لهم تجربة حياتية ثقافية واجتماعية قبل تكون علمية.

ثم بعدها تبحث عن رفيقك المناسب، أو هو بيلقاك ويجي يكلمك ويقول فعليًا: "مواصفاتك عجبتني وش رأيك نسولف أكثر"

كل هذي التفاصيل لأن اختيار زميل السكن بنفس أهمية اختيارك لتخصصك فعليًا، لأنه بيعيش معك عمر وبيأثر لطريقة نظرتك للجامعة وأسلوب حياتك فيها.. وفي كل ترم في مدة محددة تقدر فيها تعيد مرحلة التواصل والبحث عن شريك حياة جديد.

العمائر السكنية جالسة تتطور كل فترة وتضاف ميزات كثير كل سنة دراسية، من مناطق الغسيل وتوسيع الغرف وتنويع خياراتها بعد ما كانت فقط ثنائية، صار فيه خيار تكون ثلاثية ورباعية وبعضها له مطبخة الخاص، عكس السابق اللي كان فيه المطبخ مشترك للدور، والعماير الجديدة فيه بكل دور غرفة غسيل بعد ما كانت بعيدة وفي مبنى مستقل.

الجو العام للسكن حبي مره، وكل عمارة فيها مجتمعها الخاص، وأحيان كل دور له مجتمعه الخاص المختلفة عن كل دور، لأن كل عمارة تتغير شخصيتها حسب الشباب أو البنات اللي داخلها، ويقدر شخص يرشح نفسه كأمين للعمارة: ويصير يشرف على عمارته وياخذ مبلغ شهري يستخدمه للفعاليات والترفيه للي ساكنين فيها، ويكون مسؤول التواصل لتصليح مشاكل السكن ورفع طلبات الطلاب للإدارة.

بخصوص الطالبات، فيه نادي خاص بالسكن يسوون فيه رحلة كل شهر خارج الجامعة، وينظمون إدارة السكن رحلات بحرية شبه أسبوعية للطالبات لشاطئ الجامعة الخاص الموجود بالهاف مون.

كان فيه تعاون ما بين الحكومة السعودية وما بين شركة أرامكو بإنشاء مدارس في المنطقة الشرقية، مثل أول مدرسة أنشأتها أرامكو (اللي كان اسمها كاسوك بذاك الوقت) في عام ١٩٤٠ في مدينة الخبر اللي كان هدفها تعلم الموظفين القراءة والكتابة، ثم سوّت "مدرسة الجبل" أول مدرسة في الظهران تم تأسيسها في عام ١٩٤٤، اللي كانت مهتمة بشكل كبير باللغة الإنجليزية عشان تمهّد لخريجيها التحاقهم بشركة أرامكو.. ثم بنت مدرستين للبنات في الستينيات وسلمتهم لمديرية المعارف (وزارة التعليم وقتها)، وهم مدرسة فاطمة الزهراء الابتدائية في الخبر، ومدرسة رحيمة الابتدائية في رأس تنورة.

ثلاثة ما يسكتون في المجالس، النباتي والمبتعث وطالب البترول.. ليه؟

لأن مثل ما النباتية أسلوب الحياة، جامعة البترول أسلوب حياة موب بس أسلوب دراسة، وهذا اللي يخلينا ما نتردد نسوي لها لستة، لأنها مدينة داخل مدينة، وكثير طلاب ما يطلعون من حدودها إلا بالويكند لأنه قادر يعيش يومه من أوله لآخره بدون الحاجة لشيء برا، صار الطالب فيها موب "بيتوتي"، صار "بترولي".. عشان كذا بنعطيك قائمة من الأماكن والفعاليات اللي تسويها خلال معيشتك في الجامعة.

للطلاب والطالبات مجمع خاص منفصل عن بعضه ويتشابهون بشكل كبير بالخدمات، لكن مع ميزة إضافية للبنات لأن مبناهم السكني تم بناءه بجانب سكن أعضاء هيئة التدريس فصاروا يستفيدون من المنشآت الخاصة بالأعضاء، مثل المجمع وبعض الأسواق.. في مجمع الطلاب سوبرماركت، مطاعم وكافيهات، حلاق، مغسلة ملابس، قرطاسية، فرع للبنك الأهلي، وفي مجمع البنات وأعضاء هيئة التدريس نفس الأشياء تقريبًا بالإضافة إلى عيادة اسنان، ومطعم الجامعة داخل المجمع موب في مبنى مستقل زي العيال.

وفي نصف مجمع العيال فيه شاشة كبيرة تنعرض فيها مباريات مختلف الدوريات طوال أيام الأسبوع، ومباراة الارجنتين والسعودية في كأس العالم بقطر حققت أكبر تجمع وصخب طلابي قد شافته الجامعة في المجمع من يوم افتتحوه في ٢٠١٣.

واحد من أقدم أسواق البيع بالتجزئة في المنطقة الشرقية اللي عمره يوصل لأكثر من ٤٠ عام، ومن بين كل فروعه الـ ٩٠ من حول المملكة، قرروا يفتحون فرع كامل داخل جامعة البترول عشان يخدمون الطالبات ومنسوبين الجامعة وعائلاتهم اللي ساكنين داخل الحرم الجامعي.. فهو خيارك الأول لمقاضي الشقة الأساسية.. ليه بس يخدم الطالبات موب الطلاب؟ لأنه بالأصل مبني لمنسوبي الجامعة ثم تم بناء سكن الطالبات عندهم فصارت تشملهم.

وإنّا نتمشى في أسوار الجامعة لفتتنا دبابات توصيل لتطبيق جديد ما قد مر علينا، وسألنا الطلاب لو هذي شركة توصيل جديدة بالشرقية، والجواب كان: هذا شركة توصيل خاصة فينا!.. جامعة البترول عندها تطبيق توصيل خاص فقط بطلاب ومنسوبي الجامعة اسمه kfupm delivery تقدر تطلب فيه من المطاعم الموجودة داخل الجامعة ولأي مكان جالس فيه، سواء سكنك ولا كليتك ولا درج المسعى وأنت تركض لكلاساتك.. المعلومة الحلوة إن التطبيق كان مجرد مشروع تخرج، لكن عجب إدارة الجامعة واستثمروا فيه وطبقوه على أرض الواقع.

داخل الجامعة فيه مختلف الملاعب لمختلف الرياضات، وينظمون بشكل مستمر دوريات موب بس لكرة القدم والرياضات الأساسية، مثلًا قبل أشهر كان فيه "ألومبياد" داخل الجامعة يتنافسون فيه الطلاب، مثلًا: كان فيه بطولة للـ Powerlifting/رفع أثقال، وسباقات ركض وجري.

ما ندري لو فيه جامعة سعودية عندهم متجر الكتروني رسمي، بس جامعة البترول من الجامعات هذي، توفر قمصان وهودي واكسسوارات للاستخدام اليومي تساعدك تنتمي للجامعة فوق ما أنت منتمي.. تقدر تشيّكه من هنا.

البترول أفضل جامعة بالسعودية مهتمة بشكل كبير بالنوادي الجامعية، لدرجة يعاملون كل نادي كشركة لها كيانها ومجلس إدارتها الخاص، لدرجة الطلاب يجيبون بنفسهم الرعايات ويوقعونها ويشتغلون عليها لحالهم.. فانضمامك لها هو تجربة حياتية موب بس جامعية، لأنها تعتبر وظيفة جانبية لك.. غير النوادي المرتبطة بالتخصصات العلمية بالجامعة، فيه نوادي مميزة ومبتكرة لها تأثير حتى خارج حدود الجامعة، مثل نادي دراجي البترول -أول نادي دراجات أكاديمي بالمملكة- اللي موب بس يسوي جولات داخل الجامعة لكن يشارك وينافس في بطولات برعاية الاتحاد السعودي، ويسوون دورات وورش تساعدك تكون درّاج محترف.

هذا المسجد بني في عام 1974 وصممته الشركة الأمريكية: كوديل روليت سكوت، وموقعه مميز على حافة بركة من الماء في حرم الجامعة، تصميم المسجد مختلف وجذّاب.

تقدر تلاحظ تميّز فنّه المعماري القائم على تجريد الزخارف المعمارية المحلية من خلال أسطحه الخرسانية ، أو حتى سقف المسجد المميز بشكله المربع والمتكون من شبكة من القبب الزجاجية اللي تدخل ضوء الشمس، وحاز المسجد على جائزة عبد اللطيف الفوزان لعمارة المساجد في عام 2014.

مسجد البحيرة دُعيت فيه الكثير من أدعية الرجاء والفرج لأجل امتحانات الميد تيرم والفاينل، ولاشك بإن روحانية المسجد أعطت طلاب الجامعة مشاعر الإطمئنان والراحة والقليل من النوم.

في منتصف الجامعة بتحصل لوحة جدارية كبيرة تتحدث كل فترة، فيها اسامي جميع خريجي جامعة البترول من يوم تأسيسها للحين.. قريب منها بتحصل ساعة الجامعة المشهورة، اللي كانت عبارة عن خزان مويه، وكان الواحد يقدر يعرف الساعة كم بدون حتى يشوفها.. كيف؟ في كل ساعة جديدة كانت ترن بصوت مرتفع مميز حسب الساعة اللي هي فيها، يعني لو الساعة صارت ٥ بيطلع صوت الرنة ٥ مرات، ولو الساعة ٢ بترن مرتين .. بس للأسف الخزان معد فيه مويه، والساعة تشتغل بس وقفت ترن :(. 

مكان تجمع الباصات هو السكن، فما راح تتعب وأنت تنتظر، وكل الباصات تمر على كل المحطات فعادي تركب أي باص تشوفه قدامك وين ما كنت حول الجامعة.. لو تبي تركب الباص من أول محطة لين آخر محطة موب مستغرق الموضوع أكثر من ٢٠ دقيقة.. فخل ببالك إنك تطلع من السكن قبل الكلاس بفترة بسيطة عشان توصل بالوقت.

ما حبيت الباص وتبي حرية أكبر بالتنقل؟.. تقدر تجيب سيكلك الخاص أو سكوترك وتنتقل فيه لأي مكان بالجامعة وتلبّقه وين ما تبي سواء بنت أو ولد، الجامعة مُهيأة بشكل كبير للسياكل والسكوترات، وبتلاحظ كثير طلاب يستخدمونها..

ما عندك سيكل وسكوتر؟، ما يخالف.

الجامعة موفرة سكوترات كهربائية زي اللي تشوفها بالمماشي، بتلاحظها موزعة حول الجامعة وتقدر تستخدمهم متى ما حسيت إن مالك خلق تمشي، بس حط ببالك لو بتجيب سيكلك إن الجامعة مبنية على جبل، فأحيانًا بتحتاج تشيل السيكل عشان توصل لكلاساتك خاصة لما تتجاوز السنة التحضيرية.

من أول أسبوعين بتعرف الأماكن السرية وتمشي مع الطلاب وتعرف كيف يروحون كلاساتهم بأسرع طريقة، بتعرف ممرات سرية وطرق مختصرة.. كل اللي عليك تلحق أقل شخص كاشخ بالجامعة لأنه دليل واضح إنه مخضرم وعاش كفاية بإن يكون هدفه الوحيد يوصل للكلاس سليم. 

أبرز 9 خريجين من جامعة البترول 

وزير الطاقة - صاحب السمو الملكي الأمير عبدالعزيز بن سلمان بن عبدالعزيز آل سعود

وزير النفط في البحرين - الشيخ محمد بن خليفة بن أحمد آل خليفة

وزير الاستثمار - معالي المهندس خالد الفالح 

وزير الاتصالات وتقنية المعلومات - معالي المهندس عبدالله بن عامر السواحة

الرئيس التنفيذي لمشروع نيوم - المهندس نظمي النصر

الرئيسيين التنفيذييين لشركة STC (السابق والحالي) - معالي المهندس خالد البياري، والمهندس عليان الوتيد

رئيس شركة أرامكو وكبير الإداريين التنفيذيين - المهندس أمين حسن الناصر

الشريك المؤسس لشركة البيك - المهندس إحسان شكور أبو غزالة

مصمّم كلماشي

فيه علاقة غريبة ما بين البترول وما بين مجتمع القيمرز والأوتاكو.. وفيه صورة نمطية كبيرة إن طلاب البترول يعشقون الأنمي، وهذا شيء مفروض ما تنصدم منه طالما إن حياتهم كلها دراسة، وهذا السبيل إنهم يتجاوزون وقت الفراغ والغربة، فهذي ترشيحات مننا عشان تساعدك تقضي الخمس سنوات اللي تدرسها بأكثر طريقة أنمية ممتعة، بس السر هنا إنك بس تشوف حلقة وحدة كل يوم، عشانك بترولي ولا عندك وقت للمزح.

الترشيح الأولي البديهي: One Piece.. ليه؟ لأنك بتخلص الإنمي بعد ٣ سنوات تقريبًا لو شفت حلقة وحدة كل يوم (قابلة للزيادة لأنه للحين يُنشر).. بكذا يبقى على تخرجك سنتين.

ثم تشوف Hunter x Hunter، كنا بنقول اللي من البديهي شفته في سبيستون، بس طالما إنك من مواليد الألفين، فبيكون جديد عليك، هذا الأنمي هو رفيق حياة مواليد التسعينات، صياد صغير يحاول ياخذ لقب أفضل صياد باليابان على خطى أبوه اللي سحب عليه من يومه صغير.. بياخذ منك ٥ أشهر لأنه ١٥٠ حلقة تقريبًا.

فتروح تشوف Haikyū!! إنمي لطيف خفيف عن فريق طلاب لكرة الطائرة يحاولون يفوزون ببطولة اليابان للمدارس، بتخلصه بعد ٣ أشهر لأنه ٩٠ حلقة تقريبًا.

كم باقي على تخرجك؟.. سنة ونصف تقريبًا.

Bleach طالب ثانوي انولد يشوف الاشباح في المدينة، وبسبب هذي القدرة القوية، دربوه عشان يكون مسؤول عن الموازنة ما بين عالم الأحياء والأموات… بياخذ منك سنة  لأنه أكثر من ٣٨٠ حلقة.

Mob Psycho 100.. "موب" طفل غريب أطوار ما يعرف يعبر عن نفسه، بس عنده قدرة خارقة بالتلاعب النفسي!.. بياخذ منك شهر متابعة لأنه قرابة ٤٠ حلقة.

عندك شهرين من حياتك الجامعية تقفلها بـ ٦٠ حلقة تقريبًا من Fullmetal Alchemist، اللي يتكلم عن عالم مليان تجارب علمية غير أخلاقية على البشر، يحاولون يعيشون فيه اثنين اخوان واحد منهم تحول لعملاق حديدي والثاني فقد يده بسبب تجربة علمية فاشلة، وهذا اللي بيخليهم يبحثون عن حجر الفلاسفة اللي بيعيد لهم أجسادهم الطبيعية.

الحين باقي ٣ أشهر وتتخرج.. رح ذاكر، لأن أنت بتصير الإنمي وبنتابع معاناتك. 

الإجازات الرسمية شيء، والدراسة بالبترول شيء ثاني.. راح تنبسط بالإجازة لكن راح تعوضها، مثلًا: إجازة فوز المنتخب السعودي على الأرجنتين في كأس العالم ٢٠٢٢، الطلاب عوضوها بيوم ثاني وداوموا.. وفي حرب الخليج طاح صاروخ على بوابة الجامعة الصبح فعلّقوا الدراسة، ورجعوها الظهر هه.

وصلنا لنهاية اللستة البترولية

شكرًا للطالب علي الصعيدي، والطالبة زينب التريكي اللي شاركونا تجربتهم الخاصة في الجامعة، وشكرًا لفريق العلاقات العامة بجامعة البترول اللي ساعدونا في زيارة الجامعة ومشّونا في أسيابها ومبانيها عشان نكتب لستة بناءً على تجربة فعلية موب فقط قراءات، نتمنى إنها لستة قدمت أفضل صورة لتجربة بترولية تستحق تُشارك.

وتقدرون تزورون الجامعة بنفسكم وتاخذون جولة مع فريق العلاقات العامة، ينشرون كل أسبوعين في حسابات الجامعة جدول الجولات اللي تعتبر فعليًا جولة سياحية معرفية تتعرفون فيها على تاريخ وأسرار هذا الصرح التعليمي الفريد جدًا اللي ما يشبه أي صرح تعليمي بالسعودية.

هذي كانت سادس لستاتنا للمنطقة الشرقية وثاني لستاتنا عن مدينة الظهران بدعم من مركز إثراء،

تقدرون تشوفون باقي لستات الشرقية من هنا.

وهنا أغنية نبيك تسمعها قبل تمشي، جلسة طرب لطلاب قبل ١٣ سنة كتبوا فيها أغنية يشرحون فيها معاناتهم الدراسية في جامعة البترول.