يا هلا والله! 👋🏻 لستة اليوم بتكون مختلفة نوعًا ما: بنتكلّم عن مطاعم شمال الرياض.. بس مو عن حيّ الملقا أو الياسمين، بنتكلم عن بعض المطاعم في مدن وقرى شمال إمارة الرياض: المجمعة، الغاط، شقراء، وأشيقر. 

تجهّز، امسك الخط، جهّز ترمس شاهي، خذ لك قحشة مكسرات على ذوقك، وتأكد ان نقطة انطلاقك تكون من شمال مدينة الرياض عشان تصير أقرب للمدن اللي بتروح لها، وعشان ما تمل بالطريق جهّزنا لك بلاي ليست من أغاني محمد عبدة محسوبة بالضبط على مدة الرحلة الأولى، شيّك عليها وقيّم ذوقنا بالموسيقى.

أجمل ما في الرياض هي شبكة طرقات سريعة ومتصلة تقدر إذا سيّدت معها بأي اتجاه توصل لكل مدن المملكة.. في هذي اللستة حنا بنحدد اتجاه واحد بس وهو الشمال. المطاعم في مدن شمال الرياض مهب كثيرة، وهذي دلالة واضحة على كرم أهالي هذي المدن والقرى: مافيه مطاعم كثيرة لأنك إذا رحت لهم غالبًا بيعزمونك على العشاء. 

تحذير: هذي اللستة هي مجرد محتوى ترفيهي، فضلا لا تسافر عشان تجرّب المطاعم وتهاوشنا إذا ما عجبتك. 

هي المدينة الرئيسية لمحافظة المجمعة، وأكبر مدن إقليم سدير التاريخي، وهيّ مدينة مركزية بسوق مزدهرة إذا مشيت في طرقها تحس وكأنك تمشي في أحياء الرياض لكن اللي يفرق فعلًا هو وساعة صدر سكانها. 

أهالي المجمعة هم مجتمع مهني ومنتج لكن يرفّه عن نفسه ويتنزه، تبعد مدينة سدير الصناعية والتجارية عنهم ٦٠ كيلو، ووادي المشقر ٧  كيلوات، هذا الوادي الجذّاب اللي يسمّونه: نيل المجمعة. تبي تعرف ليه؟ شيّك التيك توكحقنا، حطّينا تجميعة مقاطع لمجموعة من اخواننا المصريين اللي يستمتعون بصيد السمك في هذا الوادي. 

مدينة المجمعة كانت ترحّب بزوّارها دايمًا عبر لوحة تقول فيها أهلًا بكم بمدينة المستقبل، بس شالوها. ليه؟ نتوقع لأنه المجمعة الآن هي في المستقبل، لأنك تقدر توصل لها عبر قطار الشمال، وفيها سينما تعرض أفلام غير أفلام بارقة للإنتاج الفنّي اللي اشتهرت فيها المجمعة، وممشى بلديتها مليان عواميد ذكيّة، وهي ابتكار سعودي لعواميد اضاءة تعمل بالطاقة شمسية تبث الانترنت المجّاني وتمكّن الزوّار من شحن هواتفهم وتنبّهم بأوقات الصلاة. 

إذا ما رحت مع القطار ومسكت طريق الرياض سدير فأول وجهة لازم توقّف فيها هي محطة العتش، بتلقى هناك ما لذ وطاب من منتجات مزرعة فيحاء العتش من الألبان والأجبان والسمن البلدي. هذي المنتجات اللي تلقاها موسميًا في بقّالات ومحلّات الرياض لكن دائمًا موجودة هنا، ودائمًا موجودة في تطبيق مرسول. 

مطعم فلفل، أو بوفيّة تيك-توك المشهورة، محل المشويّات هذا تغيّر تمامًا بعدما ما صار هبّة أو تريند في تيك-توك، المحل من يومه زحمة لأنه يتميّز بتقديم برجر القرصان اللذيذ لحم أو دجاج.. لكن بعد انتشار فيديوهات لناس يقطعون مسافات طويلة عشان يجربون ساندويتشاته الملفوفة بالقصدير تغيّر الطابع الديمغرافي للناس اللي يجونه.. هل هو يستاهل؟ ايه. ثق بنا، عندهم ألذ شيش طاووق بالمملكة العربية السعودية.. ويصفون مايونيز قودي وشطّة رنا صفوف كثيرة في مطبخهم، يعني ما يبخلون على ساندويتشتك بأفضل المكونات الممكنة بالسوق. 

مدينة الغاط هي اخر بلدان إقليم سدير التاريخي، معروفة بنزلتها الشهيرة، أو الدحديرة، اللي يبدأ منها طريق القصيم.

رغم ان هذي المدينة هي متناهية الصغر جغرافيًا لكن أثرها التاريخي على مملكتنا هائل، لأن الغاط هي مدينة أساطير تاريخية سعودية، بس قبل لا نتكلم عن الأساطير التاريخية، وش تأكل في الغاط؟ 

تدري في مزرعة في الغاط تملك فيها الماركة العالمية لوي فيتون؟ اعرف أكثر في أول حلقة لنا من منتجات غزت العالم: وشّي الشركة اللي بدأت من الغاط بإقليم سدير والآن تملكها لوي فيتون؟

بعض الصور اللي استخدمناها للغاط من عدسة سلطان العضيدان، لا تفوتكم مدونته!

في محطة سما الشهيرة قبل نزلة الغاط الأشهر، فيه مطعم مشويّات عراقي صغير. هذا المطعم هو مطعم المحطّات المفضل للمسافرين شمالًا، تلقى فيه مكينة الشاهي على البخار اللي تقدر تضبط وزنيته على كيفك، وساندويتشات المشاوي اللذيذة اللي مفروض ما تأكلها عندهم، مفروض تأخذها معك في نزهة لتاريخ السعودية في الغاط. 

أمراء الغاط كتبوا التاريخ في معارك توحيد المملكة، وولّاهم الملك عبدالعزيز على إمارات عدة ومناطق مختلفة حوالي المملكة، والغاط هيّ موطن أم الملك سلمان بن عبدالعزيز حفظه الله، حصة بنت أحمد السديري رحمها الله، وموطن الأمير الفارس والشاعر محمد الأحمد السديري، وين ما تحل عينك في الغاط بتلقى بصمة عائلة السديري الكريمة تجمّلها.

مثل دار الرحمانية

مكتبة بناها أمير الغاط عبدالرحمن السديري في منتصف بستان العرنية، البستان اللي أوقفه جلالة الملك المؤسس لوالده غفر الله لهما، هذي المكتبة مبنية على الطراز النجدي، لو نشيل الكتب منها بتتحوّل لقصر مبني من الطين ومليان بالأقواس النجدية. 

للدار بستان ونيس، ممتع للتنزه وتصفح الكتب، ومفتوح لك ولساندويتشات كبابك طول اليوم، ولكن الدار تفتحت لفترتين فقط، صباحًا من ٨ حتى ١٢، ومساءا من ٤ حتى ٨.

منتزة الزويلية

وهي منطقة كثبان رملية صغيرة، أو طعس، مفروشة مثل الزولية في غرب الوادي؛ تاريخيًا كان هذا الطعس هو اللي يورّد الماء لـ أهالي الغاط لكن بيره اندثر. زادت شهرته أكثر بعدما استقبل أهالي الغاط الملك المؤسس فيه والآن هيّ حديقة بديعة محافظين عليها بلدية الغاط بشكل مثالي وزارعين فيها أشجار الـكينا الضخمة. 

قرية أشيقر التراثية هي كأنها نموذج مصغّر لكل مدينة نجدية مرّت على القرون، وهي بعد برهان حيّ على قدرتنا وقدرة أجدادنا على البناء والتنمية، سهل تضيع في هذي القرية التراثية الساحرة بممراتها الضيّقة، ولا بد تضيع فيها، إن ما ضاع جسدك فبتضيع بخيالك.. تتخيّل هذي البساتين.. مين كان يعيش فيها؟ وهذي الجدران السميكة.. وش كان يصير وراها؟ إذا لقيت أيّ أحد من أهالي أشيقر هناك وهم موجودين دائما فلا تتردد بسؤالهم أيّ سؤاال، بيكرمونك أولًا ببشاشتهم وحسن خلقهم، وثانيًا بعلمهم وقصصهم اللي ما تمل منها.

في بداية الألفية كانت قرية أشيقر تعاني من عوامل تعرية متعددة، إلّا ان أهاليها تكاتفوا مع بعض، ورمموا هذي القرية، وكل عائلة مسكت بيتهم القديم وحولوه لمتحف صغيّر لتوثيق ذكرى أجدادهم وحوّلوا القرية لمتحف مفتوح بشكل يخليك تقول في نفسك: ليت أهالي أشيقر هم أهالي كل ديرة من ديار السعودية. 

المطعم الشعبي في قرية أشيقر التراثية هذا يشتغل يومي الجمعة والسبت، ولفترة الغداء فقط. فيه يرسلون أهالي أشيقر ما لذ وطاب من أطباقهم المحلية زي الجريش والقرصان والرز وأنت تغرف منها وتوزنها لأنهم بيحاسبونك عليها بالوزن. 

مثل ما روما هيّ مدينة السبع هضبات، فشقراء هيّ مدينة السبع طرقات، مدينة مركزية أساسية في عالية نجد وهي عاصمة إقليم الوشم التاريخي، سمّوها شقراء نسبة لنفودها الرملية الذهبية، ومنها طلع أهم أدباء المملكة مثل عبدالكريم الجهيمان رحمه الله وسعد البواردي طوّل الله بعمره، ومنها أطلع أكبر البيوت التجارية مثل الجميح والعيسى والسدحان، ومنها استزدنا بالعلم والمعرفة لدرجة انهم يقولون في شقراء حتى التيس يقرأ. 

شقراء مدينة ما تعرف المستحيل، لدرجة أنهم نحتوا مسرح روماني في الجبل اللي يتوسّط المدينة، هذا المشروع الهائل والضخم بيوفّر مساحة احتفالات وقاعة تكفّي ٢٠٠٠ شخص، وكله نفذ على نفقة المهندس ابن شقراء البار محمد بن سعد البواردي.

في زيارتك لشقراء لا تفوّت فخر مدينة شقراء، مخبز نوامي، هذا المخبز المشهور جدًا في نجد وباقي المملكة يقصدون له الرحال عشان يجربون أنواعه المختلفة من الأصناف المخبوزة الحالية والمالحة.. كلماشي ينصحونك بشابورة زيت الزيتون عندهم. خذها وخذ زبادي من فيحاء العتش وبيصير عندك وجبة سعودية وطنية صحية وهنيّة. 

بإسمه الغريب هذا المطعم بالنسبة لنا هو الأميّز في شقراء، يقدم رز البخاري مع الدجاج الشواية أو الفحم وأنواع مختلفة من السلطات والإيدامات، إبراهيم، أحد أهالي شقراء وصديق لكلماشي قال عنّه انه هذا المطعم مب ألذ بخاري موجود، إلا أنه ألذ أكل بالعالم.  

هذي نهاية اللستة، شكرًا لكم ونتمنى إذا عجبتكم ترسلونها لقروب العائلة في الواتساب عشان تسافرون سوا معهم في رحلة سياحية محلية تزامنًا مع دخول نجم سهيل..

اضغط هنا عشان تساعدنا في واتساب

هكّر مرسول: 

وكالعادة، نختم اللستة بنصيحة لراعي هذي اللستة تطبيق مرسول، اللي يقول ويطول.  سهل جدًا نقول لك أطلب أي مطعم من اللي قلناهم فوق من مرسول وبيجيبه لك.. حتى وأنت في أبها! لكن المميز فعلًا هو انه مع مرسول إذا رحت بنفسك لهذي الديار أعرف انه معك سند، تقدر تطلب خدمة اشتراكك بطارية من خلال تطبيق مرسول متى ما تعثّر حظك.