الأحساء تاريخ، الأحساء عمر يوصل لأكثر من ٥ آلاف سنة، الأحساء أهلها، الأحساء خير أرضها.. الأحساء تجارتها.

يقول "بُولِيبِيُوس" أكبر مؤرّخين اليونان في عصره عن الأحساء قبل ١٢٠ عام قبل الميلاد:

"كانت الأحساء من المراكز التجارية الهامة، وسوقًا من الأسواق النشطة في بلاد العرب، وملتقى لطرق القوافل الواردة من جنوب الجزيرة العربية، ومن الشام والحجاز والعراق والهند، وأن سكانها كانوا من أغنى شعوب الجزيرة"

تشوف حقيقة كلام المؤرخ اليوناني في وقتنا الحاضر، وكيف التجارة طبع متأصل في أهلها، من كبيرهم لصغيرهم، لأنهم ناس يحبون بيدهم يصنعون تجارتهم. في اللستة الماضية تكلمنا عن تاريخ الأحساء، وفي هذي اللستة بنعرض لك حاضرها، شكلها الجديد اللي ما محى روحها القديمة، عن مطاعمهم وقهاويهم وأماكنهم اللي تشبهم.

دار بسمة حرفيًا "دار"، المسكن اللي يجمع لك قائمة الطعام متنوع عربي وعالمي، رشحنا لكم طبق "المفلق الحساوي" في لستة الأحساء الماضية، بس في هذي اللستة بنرشح لك طبقين من ألذ الأطباق عندهم حسب رأي جميع زواره: ريزيتو حساوي، وورق عنب حساوي، اللي كلهم متسوين من الرز الحساوي!، واحد من أغلى وألذ أنواع الرز بالعالم. تقدر تشوف في قائمة الطعام قسم خاص اسمه "حساوي دار بسمة"، فيه كل الأطباق االلي تفننوا في تقديمها ودمجها مع الطابع الحساوي.

اسم "سنيار" جاي من مصطلح قديم يستخدم عند البحارة، وهو مسمى قوافل السفن اللي يرافقون بعض في رحلات الغوص والصيد.

واحد من أشهر مطاعم الأكلات البحرية في الأحساء،  قريب جدًا نقلوا لفرعهم الجديد، وصار واحد من أكشخ وأجمل المطاعم البحرية في ديكوره وجلساته وجودة خدمته وطريقة تقديمه للأطباق، بتلاحظ الفرق الكبير لما تشوف تعليقات وصور قوقل ماب وتقارن قبل سنة بالآن.. نرشّح تجرب من عندهم سمك العروسة المشوي، وبرياني الربيان، وقباقب بالجبن.

فيه مطاعم إيطالية كثير، فيه مطاعم بيتزا أكثر، بس ليه Lievito غير الباقين؟.. لأن الشريك المؤسس ورئيس الطهاة للمطعم هو الشيف الحساوي حكيم الشعيبي. المطعم رايق وهادي ومن النوع اللي كل شيء على طاولته يقلب رومنسي، خدمة جبارة، أكل جبار، قائمة طعام  محدودة بس كل طبق فيه لذيذ. عيال وبنات الأحساء أجمعوا إن أفضل طبق رئيسي هو بيتزا ديافولا وكوبري ريزيتو، وأفضل حلا ذاقوه طوال عمرهم هو التيراميسو من ليڤيتو. بتلقى في قائمة الطعام توصيات من الشيف حكيم شخصيًا، زي إنه يقول لك: ترى صوص العسل الحار "اللي مصنوع محليًا"، ينفع مع بيتزا المارجريتا والديافولا أكثر من أنواع البيتزا الثانية.

الأفضل إنك تحجز قبل تروح لهم، لأن المكان صغير وطاولاته محدودة، وفي نهاية الأسبوع صعب تلقى فيه مكان.

ريشيو من المقاهي اللي توسعت بشكل كبير وسريع في أنحاء المملكة وفي فترة بسيطة، البداية من شرقها ثم راح لغربها، وشمالها، وجنوبها. صاحب المقهى هو ولد الأحساء عبداللطيف الملحم، فتح فرع جديد في أشهر سوق شعبي بالأحساء: سوق القيصرية، ويقدم قائمة طعام موب موجود في كل فروعه من الشاهي والمكسرات والعصيدة والسمبوسة، مطعم/مقهى شعبي مصغّر يناسب الجو العام للمكان الموجود فيه، والمختلف تمامًا عن تصميمه العصري في الفروع الثانية.

مقهى وكف موب قهوة، وكف تجربة، وكف مجتمع. ناس فاهمين الأحساء، فاهمين ثقافتهم، فاهمين وش التجربة اللي يبون يقدمونها للحساويين وغير الحساويين. هنا ما نرشّح لك وكف عشان قهوته المضمونة، ولكن لا تفوت كوكيزهم الحساوي، اللي أكيد ترشّح لك واجد، بس بنرشح لك إياه زود. ودام الصيف أقبل علينا جرب الكركديه حقهم، ولا قريت ذا اللستة بالشتاء لا تنسى فعاليتهم الشتوية "وكف كامب" اللي يسوونها بشكل موسمي في البرّان الحساوية.

غير إن اسمهم بديهي لأنهم يفتحون 24 ساعة، بس إبداعهم بعد بديهي.. هم أول مقهى سعودي يسوي عصير بارد ومنعش من اللومي!، اللومي أو الليمون الأخضر الحساوي هو ثاني أهم محصول زراعي في الأحساء، اللي يعصرونه ويعتقونه بالشمس ويضيفونه في بعض أكلاتهم الشعبية.. ولأن مقهى 24 ما يكفيه يعصر اللومي ويسوي منه عصير، راحوا جمدوه وسووا منه عسكريم!

أُحِبُكِ يا (أحساء) في كلِ نظرة

إلى الحقلِ صَلَتْ بـي إمامًا ومُؤْتَـما

وصدري الذي لو ضَمَ ألفَ جميلة

تَظَلُ جذوعُ النخلِ أجملَ ما ضَما

- جاسم الصحيح

في المبرز، شارع الملك خالد، مبنى ٢٧٤٧.. فيه كوب شاهي ينتظرك في تِيا.

تِيا من محلات الشاهي اللي تأخروا في جيّتهم للسوق، بس سبقوا منافسينهم بالسوق، بمفهوم بسيط جدًا: كيف تفهم عميلك وتتجدد عشانه في كل موسم، وتعطي نفسك مساحة للتجربة، مثلًا: في رمضان قدموا في قائمة طعامهم ساندويتش كبدة، وفي الصيف قدموا "عسكريم" الفيمتو القديم اللي داخل كيس بلاستيك، وبعد يقدمون خبز مسحة بالجبن كخفايف في كل المواسم.. ديكوره الخشبي بالنقوش الشرقية وزواليهم المعلقة بالجدران، يخلي الفرع مكان دافي حتى بعز الصيف، وزي ما يقولون:

بيالتنا ما تعرف وقت ومكان/بيالتنا تصنع الوقت، وتخلي المكان مكان!

بالمناسبة.. لا دخلت دوّر "بيتر"، أو هو بيسبقك ويجيك بنفسه ويقول لك: "ارحبوا"، ويبخّرك.

قائمة الطعام في دعيج بسيطة كعادة محلات الشاهي، بس الخفايف عندهم مميزة، يكمل الشاهي بالمكسرات، بس مع دعيج؛ يكمل الشاهي بأبو فروة والذرة المشوية والخبز الحَمَر!. أغلب محلات الشاهي يحطون حول كوب قزاز مَسكة كرتون عشان ما توصل الحرارة ليدك لما تشرب (اللي بالمناسبة مالها فايدة والحرارة بتحرق يدك)، بس دعيج ما يحط كرتون، يحط قماشة سدو!، فوق ما تهمهم صحة يدينك، يهمهم كشختك. من التنافس اللطيف في الأحساء، بعد ما سووا "وكف" فعاليتهم الشتوية في البر، راحوا دعيج سووا فعالية كشتة على البحر هه.

الحساويين يحبون الفصفص/الحَب، الحب الشمسي خصوصًا، اللي يسمونه بينهم "الحب الحساوي"، يسوونه بطريقتهم الخاصة في بيوتهم ومزارعهم.. يحطونه بقدر مويه كبير مع الملح، ويطبخونه على نار الحطب وسعف النخل اللي يضيف للحَب الحساوي نكهة مختلفة عن أي حَب ثاني. معلومة ظريفة: يقولون إن أهل الأحساء يستهلكون الفصفص بشكل كبير، لأن جمعاتهم وعزايمهم وأفراحهم كثيرة وربي مسعدهم.

الأحساء تعتبر من أكبر مصدرين الفنون المسرحية والشعر والأدب بالمملكة. ولأن أهلها فنانين بالفطرة، كانوا يحتاجون لمكان يجمعهم، مكان يساعدهم يطورون من نفسهم ويحصلون مجتمع يشبهم، والشاعرة نورة الموسى الله يرحمها لبّت طلبهم. نورة الموسى كانوا يسمونها "أم الأحسائيين" لأنها كانت تقضي حوائج الناس ومهتمه بالعمل الخيري والاجتماعي، ولأن حبها للفن يوازي حبها لأهل الأحساء، حولت بيتها لدار فنون اللي داخلها أول معرض فني بالأحساء!.. كل غرفة وصالة وممر وحوش صار مكان لعيال وبنات الأحساء. ولأن أحفادها يشرفون على الدار من بعد وفاتها، إرثها ما وقف. ينظّمون في الدار نقاشات للكتب، ولقاءات ثقافية، وجلسات رسم حر طوال الأسبوع. تجربة لطيفة لو كنت مع عائلتك أو أصدقائك، وتقدر تزور حساباتهم اللي يعلنون فيها عن المعارض واللقاءات الجديدة.

خرّجت الأحساء فنانين وشعراء وسينمائيين وأُدباء لهم صيتهم محليًا وعالميًا، وعشان لازم تعرف حجم أثرهم في تشريف المملكة، هذي أبرز الشخصيات اللي خرّجتهم أرض الأحساء:

التعليم: الأمير والشاعر خالد الفيصل أمير منطقة مكة المكرمة، والكاتب والأديب والوزير غازي القصيبي درسوا كلهم في المدرسة الأميرية أو "بيت الثقافة"، أول مدرسة حكومية في الأحساء!.

الشعر: حصل ابن الأحساء الشاعر حيدر العبدالله على لقب أمير الشعراء في الموسم السادس من المسابقة، وهذا اللي خلاه الشاعر الأصغر والسعودي الأول الذي يحصل على هذا اللقب.. هنا تحصل وثائقي عن الشاعر حيدر الحمدلله من إنتاج شركة ثمانية.

السينما: فيلم أغنية الغراب للمخرج الحساوي محمد السلمان اختارته هيئة الأفلام السعودية لتمثيل السعودية رسميًّا في مسابقة الأوسكار عن فئة أفضل فيلم دولي. تقدر تشوف الفيلم في نيتفلكس من هنا.

الفن: الأحساء مليئة بالفنانين، الرسامين، لأنها تاريخ وبيئة تحفز الفن.. واحد من أهم الفنانين التشكيليين السعوديين والأحسائيين بشكل خاص هو الاستاذ عبدالرحمن السليمان، واحد من أوائل مؤسسي الفن بالمملكة، وكان أول معرض له وعمره ١٧ عام في معرض بالتعاون مع نادي الاتفاق بعام ١٩٧١، ودارت لوحاته العالم وانباعت لوحته الشهيرة "مصلين يغادرون المسجد" في مزاد بلندن بـ ١٧٨ ألف دولار!. رأس قسم الفن التشكيلي في الجمعية العربية السعودية للثقافة والفنون.. تقدر تتابع حسابه اللي يكتب فيه مقالات عن نفسه وعن المشهد الفني بالأحساء والمملكة.

هل كنت تعرف إن الأحساء عندها شاطئ؟

على بعد ساعة وربع تقريبًا من شمال الأحساء، فيه شاطئ محد يعرفه، واللي يعرفونه من أهل الشرقية يستثقلون إنهم يمسكون خط عشانه، وهذا اللي يخليه من أكثر الشواطئ اللي لازم تزورها، لأنه بعيد عن المدن وتلوثها الضوئي، الليل فيه ليل، والصبح فيه هادي خالي من الإزعاج. سواء صيف ولا شتاء، يستحق تطالع البحر وتتأمله حتى لو ما سبحت فيه. مهتمين بتفاصيله من حدائق وجلسات ودورات مياه، وأماكن للترويش على امتداد الشاطئ. ننصحك تزوره مع أخوياك أو عائلتك، عشان تقولّهم: "هل كنتوا تعرفون إن الأحساء عندها شاطئ؟!".

هذي كانت لستتنا الثانية عن الأحساء، عن شكلها الجديد اللي ما يختلف عن ماضيها وثقافة أرضها وعادات ناسها، بتلقى روح الأحساء حتى في المشاريع الجديدة، عيالهم يتنافسون مين فيهم يوظف ثقافة الأحساء بشكل مبتكر وما سبقه فيه أحد، بيتزا يسويها شيف حساوي، وعسكريم لومي، وفن وعلم وتاريخ يمشي معك وين ما رحت.

أخيرًا، لا تنسى تقرأ لستتنا الأولى عن الأحساء عشان تعرف تاريخها، عن أماكنها اللي لها آلاف السنين، وأرضها اللي اكتشفها وسكنها الكنعايين.. نشوفكم في لستة جديدة، عن مدينة جديدة من مدن المنطقة الشرقية!.

الشعرُ والتمرُ يا أحساء عيناكِ

وثغرُكِ الماءُ والدنيا حكاياكِ

لمّا نظرتِ إلينا وابتسمتِ جرى

نهرا قصيدٍ ونخلٍ من مُحيّاكِ

- حيدر العبدالله