لو قلنا إنك تشتري كل صبح كوب قهوة بـ ١٢ ريال وفي الدوام تشتري قهوة ثانية باردة بـ ٢٠ ريال، صرفيتك الشهرية على القهوة صارت ٩٦٠ ريال، حنّا ما نقولّك جمعها وبعد ٥٠ سنة اشتر فيراري لكن فيه طريقة تقدر تتقهوى فيها قهوة محترمة وبنفس الوقت تقص صرفيتك إلى أكثر من النص.

مع كثرة المقاهي والتنافس ما بينها في الرياض فيه مقاهي جديدة طلعت وميزتها التنافسية هي تقديم قهوة بجودة ممتازة وبسعر في متناول الجميع، في هذي اللستة بنذكر أفضل المقاهي اللي لقيناها:

برسك

هذا المقهى سوا ضجة في الإنترنت يوم فتح بسبب طريقتهم المختلفة وأسعارهم، عندهم أرخص كوب قهوة بالرياض يكلفك ٤.٧٥ ريال وهذا يعادل قسط تمارا من سعر الكوب الطبيعي في الرياض، السعر هذا موحد لكل أصناف المنيو ما عدا الحجم الكبير من القهوة، وطريقة الطلب بسيطة: تطلب من الشباك كأنك في درايف ثرو، يجيك الطلب، تصور فيديو تيك توك وتمشي.