حسب علمنا، تشكيل هو واحد من أوائل متبنين فكرة المكتبة اللي داخلها مقهى، موب المقهى اللي داخله مكتبة.. لأنهم في الأصل دار نشر!، وهذا اللي يميزهم عن غيرهم.

المكان عبارة عن تجربة ثقافية سهل تخليك منتمي للمكان، فكرة خلق مجتمع ثقافي بدت من أول خطوة خططوا فيها حتى في مرحلة البناء، بتلاحظ ذا الشيء بالمساحة الكبيرة في منتصف المكتبة اللي فيها مُدرجات للحضور ومنصة للضيوف، وهذا اللي يخليهم من أرتب المقاهي اللي طبقوا فكرة الجلسات الثقافية.

اصدقائنا من الكويت، اللي جونا وفازوا بقلوبنا باهتمامهم بمحبين القراءة والأدب، لأنهم متبنين فكرة الجلسات الثقافية من أول يوم لهم. صوفيا دار نشر كويتية جالسة تتوسع خليجيًا وبدت بالبحرين والرياض، ومالهم إلا سنة وشوي من افتتاحهم بالرياض، إلا إنهم صاروا حديث كل المهتمين بهذا النوع من المجتمعات الثقافية. مكتبة صوفيا تنزّل جدول مسبق لفعاليات كل شهر، عشان تجهزون نفسكم بالفعالية اللي تناسب اهتمامتكم. مكان لطيف للشغل، وألطف للقراءة والتعرف على ناس يشبهونك.

مقهى في الدرعية، يشبه الدرعية. أشجار بكل مكان، طاولات فنية دار ما دار.. ليه هو أفضل مكان تقضي فيه وقتك مع أصدقاك وعائلتك وحتى مع نفسك؟ لأن تقدر تقضي فيه يومك كله وأنت تنتقل بين فعالية والثانية، طاولات للرسم والقراءة والشغل، جلسات خارجية مليانة أشجار فوق راسك. يسوون جلسات وورش لكل أنواع الفنون، من الموسيقى، للرسم، للنحت، للأدب. يكفي إنهم وسيعين صدر، قد شفت مقهى مخلي حسابه برايفت وكاتب بالبايو: ما نستقبل البطاريق والأطفال؟.

المقهى اللي تحسه سر، لأنه من المقاهي الصغيرة اللي مجتمعه أصغر منه، تحس كل اللي يعرفونه بس ٥٠ شخص يجون كل يوم يشتغلون ويجتمعون فيه. مكان دافي حتى في عز الصيف، ومن الأماكن اللي تدخله وتقول: "صدق الضيق موب بالمكان الضيق في الأنفس"، لأنه مهما ازدحم تحسه للحين وسيع حتى لو حوطوك الناس من كل اتجاه. قريب صاروا يقدمون جلسات نقاش مع الفنانين والكتاب. يقول واحد من مجتمع المقهى: كتبت نص فيلم في أندرينا، وفاز في مهرجان اليونسكو للأفلام.. وبكذا، نكون فضحنا سر واحد من أجمل مقاهي حي غرناطة.

وثبة، واحد من أبدع الأماكن في اللستة وأكثرهم فنًا في ديكوره. بتدخل وتحس كيف كل هذا الجمال متخبي عنك كل ذا الفترة؟.

عمر المكان شهرين بس، لكن صاحبة المكان منيرة القارئة النهمة اللي درست التصميم الداخلي، خلت المكان سهل عليه يخلق مجتمع في هذي الفترة البسيطة جدًا، التصميم، اختيار الكتب، وبناء دور كامل مخصص بس للقراءة والجلسات والفعاليات الثقافية.. يخليه مكان فاهم وش يحتاجون فئته المستهدفة.

مطعم، مقهى، مخبز، اسطبل، بادل، مزرعة.. في مكان واحد.

من كثر ماهو شامل كل شيء قوقل ماب يسميه: مزار سياحي.. مكان يستاهل تتعنى له وتمسك خط العمارية عشانه، رح له ومعك مجموعة ولا مع أهلك، لأنه يناسب كل الأعمار حتى في جلساته الأدبية، من جلسة عن الشعر الجاهلي، إلى جلسة قراءة قصص للأطفال. تأكد قبل تروح إنك تحجز زيارة لهم من تطبيق ماي تيبل في حسابهم هنا.