وش تاكل في اليوم المفتوح؟

تاريخ النشر 2023-06-01

تخيل هذا السيناريو: لك ٦ أيام ماشي صح على الدايت حقك: شوفان، دجاج مشوي، بروتين شيك، شوفان، دجاج مشوي، بروتين شيك.. ملّيت صح؟ 


إذا ملّيت من الأكل الصحي لدرجة إن طعم الدجاج المشوي صار مطاط بالنسبة لك، هذي اللستة تجاوب على أهم سؤال في أسبوعك الصحي: وش تأكل في اليوم المفتوح؟ 


جهّز نفسك قبل اليوم المفتوح، جوّع نفسك؛ لأن في هذا اليوم المبارك أنت ما تبي تشوف أكل قدامك سعراته الحرارية أقل من احتياج الإنسان الشهري.. أنت تبي تأكل كمّية دهون يحرقها فرع فتنس تايم كامل، وكمّية صوصات ولغوصة تخلّي الكائنات الفضائية اللي تشوفك من فوق تتقرّف منّك. ليه؟ لأنه لذيذ. 


في هذي اللستة بنذكر أكثر المطاعم من وجهة نظرنا اللي أبدعت بالأكل غير الصحي،  توقع في هذي اللستة الكثير من السعرات الحرارية.


المطعم الأول

عكس اسمه تشيز كيك فاكتوري مب مصنع، هو مطعم تأسس في كاليفورنيا غرب الولايات المتحدة، و أول فرع له خارج أمريكا كان في دبي مول. 


بس تشيز كيك فاكتوري يستحق لقب المصنع بكل جدارة لأنهم فعلاً يصنعون مكوناتهم من الصفر عندهم في المطبخ، و على رغم من كبر حجم قائمة الأكل عندهم اللي لازم تدرسها قبل تطلب مع مدرس خصوصي (فريس الطباخ غير الماهر يقدّم خدماته عبر هذا الرابط). نضمن لك إن أغلب إذا مو كل الطلبات بتكون لذيذة، وإذا ما كانت لذيذة نضمن لك إن صحونهم كبيرة. 


أغلب الناس يقعون في فخ الطلبات الكثيرة بزعمهم أن أحجام أطباقهم زي أي مطعم ثاني.. على عرش هذي الطلبات الضخمة طلبهم الأفضل دجاج الماديرا اللي عبارة عن صدر دجاج مشوي فوقه جبن موزاريلا مع صوص الماديرا مع الفطر، هليون مشوي وبطاطس مهروسة مع قشر البطاطس. 


طبق نحلم فيه ونرجع له. وإذا تبون شيء مختلف جربوا سالمون الميسو. 






تبي تخرّبها بسرعة؟ خرّبها مع المطاعم السريعة

خنوقف اللستة هنا شوي، كلنا ندري وش أكثر شيء تشتهيه في اليوم المفتوح: المطاعم السريعة، خصوصًا كنتاكي. تعريف أكل المطاعم السريعة إنه أكل كثير الدهون، مضر، مليان بمحسنات الطعام، وكل كلمة تضرب أكثر عالجرح وتخلّي سعابيلك تقوطر. 


أكبر ميزة لمطاعم الفاست فوود أو المطاعم السريعة موجودة في اسمها، إنها سريعة. أنت تبي شيء سريع لدرجة إنه ما يمديك تندم على قراراتك قبل ما يوصل الطلب، الندم يجي بعدين وأنت منسدح من التخمة بعد سطلين كنتاكي.


٢٠٢٣ كانت سنة صعبة ماليًا على مطاعم الوجبات السريعة، كثير منهم واجهوا انخفاض كبير في الأرباح في الربع الأول من السنة، وكل اللي دخلوا موجة الصمود أو الخسارة هذي طلعوا بشيء واحد مشترك: وجبات جديدة،


 الفترة هذي فترة ذهبية للمطاعم السريعة بالنسبة لك، كلهم قاعدين يبتكرون وجبات جديدة تنرفز أي أخصائي تغذية عشان يرضونك ويكسبونك كزبون، سوينا لستة خفيفة عنهم تعالوا نشوف وش عندهم:


خيار فاست فوود (١)

البيك

مطعم البيك فتح من السبعينات في جدة و من يومها وهو مشتهر بالدجاج المقلي حقهم بسعره المعقول وطعمه اللي فوق مستوى سعره ويسوى كل سُعره. 



البيك من فترة طلع من جدة ومكة، وأخيرًا بعد سنين طويلة من الانتظار فتح له فروع حول المملكة. 

مو بس الفروع اللي توسعت و تطورت.. طلبات الأكل كمان. يتصدرهم ساندوتش البيق بيك، هو أفضل ما تقدمه المطاعم السريعة حاليًا، مناسب لليوم المفتوح. حوالي ١١٠٠ كالوري.. يعني يمكن ١ ما يكفي.


خيار فاست فوود (٢)

برغرايزر

برغرايزر مطعم كثير وغالبًا فيه فرع يبعد ٥ دقايق عن بيتك، بعد نتائج مالية مخيّبة للآمال وانخفاض أرباحه بنسبة ٨٥٪ أطلق وجبة بالتعاون مع اليوتيوبر الرهيب بندريتا مناسبة جدًا لليوم المفتوح. 


برجر بندريتا عبارة عن برجر دجاج كريسبي مقلي فوقه كيرلي فرايز. إيه نعم، البطاطس جوّا البرقر. 

بس لا تخاف البيبسي برا البرقر، قلنا يوم مفتوح وبنفلها بس ما نوصل لذي الدرجة.

خيار فاست فوود (٣)

بيتزا هت

بيتزا هت من أوائل مطاعم البيتزا الأمريكية.. و عندهم طلبات شاطحة.

 آخر شطحتهم هو طلب الميلتس. شريحة بيتزا مصفوطة على بعضها و داخلها حشوة تغطها بكل صوص متوفر عندهم. أو كلها بنفس الوقت. مين اللي بيقولك لا؟ ضميرك؟ ممكن.. سحقًا لضميرك في سبيل اليوم المفتوح. 


خيار فاست فوود (٤)

الطازج

في اليوم المفتوح الشيء الطازج الوحيد اللي تحتاجه هو مطعم الطازج، لا يغرك الفروج المشوي اللي يعتبر أكلة صحية وهنية.. قبل فترة نزلوا وجبات جديدة زي الكريسبي رول والكريسبي برجر اللي عبارة عن سندويتشات مقلية كاملة ومغلفة بالبقسماط.


الطازج الحين مب المطعم الصحي اللي أنت خابره، الحين دخل بقوة في منافسة المطاعم بالكالوريات، وبننتظر لين يطلعون نسخة مقلية من بسبوستهم الطريّة. 

خيار فاست فوود (٥)

برجر كنج

كواترو تشيز من برجر كنج.. أربعة أنواع جبنة في مكان واحد. ملك البرقر. و منافس المهرج الأول.. سابقًا. 


الآن الملك سقط قليلًا من عرشه. ولكن.. كل فترة و فترة ينهض لكي يوفر لنا وجبة تخريبية عنيفة و شديدة اللهجة. برقر مع ٤ أنواع جبنة مختلفة؟ حتى خبزة البرقر فيها جبنة مشوّحة عليها. 


خيار فاست فوود (٦)

كنتاكي

كم يوم قمت فيه من النوم وكانت أول فكرة جت في رأسك هي: مشتهي كنتاكي. ليش هذا الشعور الغريب يجينا؟ هل شايب كنتاكي طلع لك في الحلم وإذا قمت من النوم تنساه؟ 


إدارة تطوير المنتجات في كنتاكي شافت الدجاج حقهم وقالت: يحتاج المزيد من الكالوريات، عشان كذا أضافوا ليز في بقسماط الدجاج. وفيه قاعدة معروفة في اليوم المفتوح: سطل الحجم العائلي حق كنتاكي مب للمشاركة، هذا لك لحالك.

خيار فاست فوود جديد

مطعم أربيز مطعم أمريكي قديم لكن أول مرة يفتح عندنا، ليش؟ لأن كان لهم منافس سوقه قوي عندنا اسمه هارديز. وكان عندهم طلب لذيذ اسمه روست بيف ساندوتش اللي كانوا يتميزون فيه اثنينهم. لكن.. هارديز ألغوا هذا الطلب من قائمتهم.


واليوم أربيز فتح له فرع بالرياض ورجّعوا طلب الروست بيف وهلّت الناس بالهتافات والاحتفالات وصفّوا سِرا مدته ساعة ونص عشان ساندوتش… هل يسوى؟

فقط إذا طلبته وجبة مع بطاطس حلزوني مع جميع الصوصات و شلت الخضار! وقلت لهم زيادة روست بيف و جبن.. بالعافية على الحفلة اللي بكرشتك. ولا تنسى ترن جرس السعادة والرضاء داخل الفرع. 

خيار فاست فوود جديد

من هي ونديز؟ وليش غابت عننا؟ أكيد كانوا غيرانين منها وكتبوا عنها إشاعة.. ما علينا. ونديز قد عادت!!! وجابت معها برقر مربع لذيذ! هنيئًا لنا جميعًا وعلى بطوننا! ننصح بطلب الأستاذ ديف و خذ الطلب دبل مع دجاج نقتس على جنب وصوص الباربكيو حقهم و الصوص الحار اللذيذ.. عودًا حميدًا يا آنسة وندي. اشتقنا لك صدق. و عطينا واحد فروستي فانيلا على جنب.


هذي نهاية لستة المطاعم السريعة، بس باقي شيء واحد: كيف تختم اليوم و تخربها بعد التخريب؟ نقولك:


الحلى

فيه محلّات حلا تخصصها تجيب أكلة حالية ولذيذة ومب ناقصها شيء، بس هذي المحلّات ما تتفق، هذي المحلّات تغرّقها بالشوكولاتة كأنها استجواب لعصابة مافيا مع عضو خائن، وهذي الطريقة مب وصفة معتمدة عشان تخلي الحلا ألذ، مب شرط إذا حطيت شيء حالي مع شيء حالي ثاني يطلع لك شيء أحلى، عشان كذا لازم تشوف لك محل يفهم في رياضيات الحلا ويضبط لك المعادلة، وأفضل عالم رياضيات في هذا المجال هو أوڤرجار.


أوڤرجار، محل حلى للحلوين اللي يحبون حلى ألذ منهم. حلى يفجر أحاسيسهم و يبعد عنهم الهمّ والغمّ وكل أحزانهم. كل شيء عندهم لذيذ. لكن طلبنا المفضل هو حلى الجارز. اللي عبارة عن جرات مليانة كوكيز لها أكثر من نوع. ويجي معها صوصات بأكثر من نكهة. ومعهم إبر تسحب الصوصات وتغرزهم في جرات الكوكيز وهي حارة ويصير فيه انفجار من الملذات التشيكولاتية. 

شارك هذي اللستة

التعليقات


خذت كم توصيه من اللسته .. لكن شارهن عليكم وهارديز وينهو ؟

قبل ١٠ أشهر - محمد عبدالله محمد الصرفان

ويييين ماك😡

قبل عام واحد - معصب منكم

(:

قبل عام واحد - معلق سري

جعت جداً

قبل عام واحد - عمر
عطنا رأيك

تبي تقرأ لستات ثانية؟

سحور الأبطال

مطاعم الرياض تغنيك عن سفرة الصيف

وش تقرأ من معرض الكتاب في الرياض؟