دليل السفرة الاقتصادية لأبها

تاريخ النشر 2023-08-13

السفر الاقتصادي أو الـ Backpacking هو طريقة السفر الخفيفة اللي تستخدم فيها أقل عدد ممكن من العتاد والمال لما تسافر، تستخدم المواصلات العامة، تختار أماكن إقامة غير الفنادق، وتصير رغبتك هي اكتشاف المنطقة وتراثها وأسرارها مو لأجل سياحة تعتمد على الرفاهية والتجارب الاعتيادية، والسؤال: هل تقدر تسافر سفرة اقتصادية في أبها، وتروح لها خفيف وترجع خفيف؟.. طبعًا.


وفي هذي اللستة بنعطيك نصايح لسفرة ويكند اقتصادية ما تنساها، من السكن في خيمة صغيرة فوق الجبال، لين تلحق الغروب جنب شلال!


كيف تروح أبها؟

طيارة

السفر الاقتصادي يبيله حنكة وأول مراحل الحنكة هي الطيران، أسعار الطيران أزمة عالمية خاصة لو ما كنت مسافر لحالك، وقتها بتكون نصف ميزانية السفرة عليها.. لكن، فيه أكثر من طريقة تقدر تفوز فيها على الأسعار، أهمها: الوقت.. السعر مسألة وقت والتخطيط من بدري بيخليك تاخذ أفضل سعر ما راح تلقاه لما تخطط قبل السفرة بأيام، وثانيًا: العروض!.. اقتناص العروض يبيله بحث جيد، بس هيئة السياحة هذي السنة ما تبيك تبحث تبيك بس تضغط زر واحد يجمع لك كل عروض السفر من تطبيقات حجز الطيران والفنادق إلى وجبة غداك لما توصل، تحصل صفحة العروض لهيئة السياحة من هنا.


خط

السفر خط تجربة مختلفة تمامًا بتخلي سفرتك فيها قصص وسوالف وضحك ويمكن تصير هي متعة السفرة موب السفرة نفسها، لأن مثل ما يقولون: المتعة في الرحلة لا الوصول، واحنا نقول: المتعة بالرفقة، لا الرحلة ولا الوصول.

السر الكبير لأي سفرة قررت تكون خط بدل طيران هو "مين معك؟"، فاحرص لو بتمسك خط إن اللي معك بيخلونه خط مليان ضحك ووناسة. غير إنها بتكلفكم بالكثير ٣٠٠ ريال قطة على البنزين، وهذا لحاله ضحك ووناسة.


وين تسكن؟

لا تسكن في فندق

فيه تطبيقات كثير مهم تكون عندك لو بتسافر لمنطقة سياحية تعرف إن فنادقها بتكون مليانة وخياراتها تقل في المواسم، 

وهذا لا يعني إنك بتخلي سفرتك أقل مستوى لما ما تكون في فندق، على العكس تمامًا ابتعادك عن الفنادق ممكن يزيد من متعة التجربة. اشهر تطبيقين يعرضون لك خيارات سكنية فريدة في بيوت أصحاب المنطقة نفسها هم airbnb وجاذر إن. تجربة لازم تعطيها فرصة، لأن مين ما يبي يقوم الصبح وهو وسط مزرعة أو في بيت صغير بأبها ما بيعرف طريئو حدا -على قول فيروز-.


خيمة

لو جوك مغامرات وتبي شيء جديد يكون عنوان هذي السفرة، النوم في خيمة فوق الجبال من أروع التجارب اللي ممكن تعيشها بحياتك.. بتحصل كثير شركات سعودية توفر لك مكان للتخييم، بس أصدقائنا في بانجيا أميز فريق ممكن يوفر لك تجربة متكاملة مو فقط خيمة تنوم فيها. بانجيا عندهم مزرعة ويوفرون خيار المبيت فيها سواء في خيم صغيرة أو غرف خاصة ومجهزة، بسعر يبدأ من ١٥٠ ريال مع وجبة فطور مجانية لكل يوم!، وتقدر تستخدم كل مرافق المزرعة اللي مساحتها ٤٠ ألف متر مكعب؛ تتمشى فيها، تسوي هايكينق، تسلم على بقرهم، تلعب مع قطاوتهم، أو تسوي يوقا فوق خزانهم.. تقدر تعرف بانجيا أكثر من هنا.


وين تاكل؟

المطعم اللي تحسه وصف لحالة شعورية اخترعها مدرب للتنمية الذاتية، بس هو صدق بيودي حالتك الشعورية لمكان ثاني كنت غافل عنه في صباحاتك. دوار السعادة عنده ٦ دوارات بالرياض ودوار بجدة ودوار بأبها، وهذا يعلمك شيء واحد بس؛ إن أكلهم ما يلف ولا يدور. من المطاعم اللي تدخلها وأنت تحسب عارف وش تبي، لين تكتشف إنك بتستمر تطلب كل شوي ساندويتش جديدة من كثر ما خبزهم وحشوتهم خفيفة على المعدة، مدغدغة لخلايا المخ.. وعلى قول استاذ SA في قوقل ماب "ياللي تقرأ افلح افطر من عندهم وعلى مسؤوليتي".


مطعم بسيط ويحبونه شباب أبها، لأنه يقدم مينيو شعبي غير معقد وتقدر تاكله بأي وقت. عندهم غرف خاصة للعوائل أو الشباب لمتابعة المباريات، ولاحظنا إنهم مسمين الغرف الخاصة بأسامي المنتزهات والمناطق في عسير "الحبلة، الفرعاء، السودة، المطار".. تعرفنا هناك على موظف نيبالي وسيع صدر بتعرفه بدون نوصفه لك، سلّم عليه وسولف معه عن الممثلين الهنديين لأنه يحب بوليود جدًا، واطلب منه العريكة تكون مع الرضيفة، والرضيفة طريقة طبخ للسمن مع الطحين باستخدام الأحجار، وتطلع لنا هذي الوجبة المليانة بسعرات حرارية يحتاجها جسمك بعد يوم طويل.


لو تساءلت ليه طمرنا وجبة الغداء، وبتفكر لثواني إن فريق تحريرنا نسى يحرر.. انتبه.. لأننا مدركين، إنك لازم تتغدى من مطعم الحنيذ اللي في لستتنا الأولى عن أبها (جدول الصيفية في أبها)، بيكون ألذ غداء ممكن تذوقه حتى لو كنت شخص غير آكل للحوم، لأن لحمة الحنيذ بتحوم في عقلك للأبد.


وش تسوي فعاليات؟

هايكينق ومشي بالغروب جنب شلال

عسير مليانة شلالات، وحاليًا في مواسم الأمطار شلالاتها تستمر بالجريان لأيام حتى بعد ما يوقف المطر.

عين الذيبة مكان مميز للتأمل أو حتى للمشي والهايكينق لأن مكانه مميز وطبيعته مناسبة لكل شيء حتى لو تبي تفرش بأي مكان وتشرب شاهيك مع ذا النفاه والهواء البارد اللي جايّك من الشلال.


لا تشتري فواكة جاهزة، اقطفها

واحد من التجارب اللي ترجعك طفل، بتحسك شخصية كرتونية وأنت تمشي بين الخَضار والشجر وتقطف التين والعنب والفراولة، وتاكل منها مرة وتجمع منها مرات. كانت تجربة لطيفة ودنا إنها ما خلصت في مزرعة بن جربوع في عسير. يبيعون الفواكة جاهزة عند باب المزرعة، بس كل يوم من العصر للمغرب يفتحون قطف الفواكة للزوار، عشان تختار وتنقّي الحبات اللي تبيها بعناية.


ما ينفع تزور عسير بدون يكون لك زيارة لتنومة، خاصةً للعم فايز الشهري اللي صار هو الوجه السمح لهذي الأرض الكريمة. استضافنا العم فايز المشهور بـ"دحدوح" في متحفة الصغير، سولف معنا عن تاريخ القرية، عن قصته مع الملك عبدالله بالجنادرية، وعن علوم وسلوم الجنوبيين في استقبال زوارهم، وعن وش حكمته بإنه يخلي الضيف يشاركه في طحن القهوة قبل يسويها؟

تقدر تشوف في حساباتنا فيديو بسيط سويناه مع العم دحدوح.


سوق الثلاثاء واحد من الأسواق الشعبية المشهورة في وسط أبها -صح اسمه الثلاثاء بس يفتح كل يوم-، بتلقى فيه كل شيء ودك فيه؛ يتقشّر لك البرشومي قدامك، ويصير خاطرك ببهارات لأهلك، وأثريّات لك، أو فساتين لبنت أختك. موب لازم تشتري لأن وجودك هناك بيكون وسيلة مشي وتأمل وسوالف ممتعة لأن كل اللي هناك صدورهم وسيعة، وأجواء المكان الاجتماعية تخليه بريك حلو ما بين فعالياتك الكبيرة.


هذي كانت نهاية لستتنا الثالثة عن عسير، كانت رحلة ممتعة شفنا فيها ناسها، عشنا وأكلنا معهم، سمعنا قصصهم وكتبنا عن أماكنهم، لو عجبتك هذي اللستة وودك تعرف أبها أكثر تقدر تقرأ لستتنا الأولى (جدول الصيفية في أبها)، ولستتنا الثانية (المقاهي في أبها البهيّة)، وتشوف حساباتنا اللي نشرنا فيها محتوى مرئي يلخّص دهشتنا الكبيرة بهذي البقعة الجغرافية اللي ما يكفيها الكلام، وتحتاج تزورها وتعيشها.. ولا تنسى تشوف ملف الدليل الكامل اللي مسوينه هيئة السياحة، فيه فعاليات ومطاعم وأماكن تاريخية بتساعدك تصنع خطة سفر مرتبة لموسم عسير.


شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

وين تأكل برنش في الرياض؟

من وين تاكل كيكة؟

حان وقت المشاوي