المقاهي في أبها البهيّة

تاريخ النشر 2023-08-11

لاحظنا في زيارتنا لأبها إننا كل ما زرنا مقهى عندهم قالوا لنا: "هذا ماله شهرين فاتح".. وعرفنا وقتها إن أرض أبها خصبة للمشاريع المميزة، عيالها وبناتها ما يوقفون يبتكرون مقاهي ومخابز تنافس المدن الكبيرة في جودتها وأفكارها الجديدة.

في أبها جلسة البيت هو خيارك الأخير، الجو زين، المشاوير حلوة، حتى زحمتها تنبسط فيها من المناظر والأمطار، فعطيناها لقب عاصمة الجلسات الخارجية في السعودية؛ لأن موب بس جوها يساعد، كافيهاتها تساعد!


في هذي اللستة جمعنا لكم أفضل كافيهات أبها اللي نضمن لك فوق كوب القهوة اللذيذ، تجربة فريدة ومكان يستحق يكون وجهتك الجاية.


المكان اللي يقدم واحد من أجمل المخبوزات في أبها، ورغم إن مجال المخبوزات صعب إلا إنهم تميزوا بإن كل شيء بالمينيو حقهم محبوب عند عملاؤهم، لكن وعلى شهادة الجميع لُب عنده ألذ فرنش توست ممكن تذوقه في أبها. ولو بخاطركم تعزمون أحد في بيتكم بدل تنورونهم بالفرع، لُب يقدمون صواني ضيافة تجمّل عزايمكم.

سالفة جانبية: واحد من الأشياء اللي تميز لُب هو قربة من عملاءه، وأحد المواقف اللطيفة كانت لما لاحظوا في تعليقات قوقل ماب كثرة الشكاوي على كراسيهم غير المريحة، فجمعوا كل التعليقات في فيديو واحد وقالوا: عشانكم غيرنا كل كراسينا.

ونيابةً عن كل عملاؤهم نقول: شكرًا لُب على الكراسي الجديدة.


كايا من المقاهي القديمة والمميزة في أبها، ولو تركنا كل شيء رهيب يقدمونه، مكان المقهى لحاله يعطيه أفضلية كبيرة إنه يكون مكانك الجاي اللي تشرب فيه قهوتك الصباحية. كايا موجود في شارع الفن وهذا موب صدفة، تصميمه عبارة عن تحفة فنية تسكن تحت الشجر، بواجهة زجاجية تغطي الفرع بشكل كامل وتخليك تشوف الفن من كل الزوايا، وفي وقت المطر يعتبر من أعظم الوجهات لأن قطرات المطر وضباب أبها بيحفّونك من كل مكان وأنت جالس داخله.. ننصحك تزورهم في الصباح؛ لأن فوق قهوتهم اللذيذة يقدمون فطور على مستوى عالي.


مقهى حي ملموم وصغير، بس أصحاب المكان روحهم كبيرة ويخدمونك بقلوبهم. قابلنا صاحب المكان عبدالله وولده نواف، الوحيدين اللي يشتغلون في المقهى -إذا رحتوا قولوا لهم فريق كلماشي يسلّم عليكم-. في لستة سابقة (مقاهي الحيّ ترجعك حيّ) تكلمنا عن شروط إنك تتسمى مقهى حي، وستيبس واحد من المقاهي اللي حققوا الشروط وفازوا عليها بنقطة؛ لأنه يطل على حديقة مليانة شجر، فصار مقهى حي حرفيًا حي.

قصة قصيرة: عبدالله كان عنده محل شاهي، بس كورونا فازت عليه زي ما فازت على غيره وقفل المشروع، وواحد من أهم أسباب قراره إنه يفتح مقهى ستيبس كان بعد ما كبر ولده نواف، وقتها حرص إنه يكون حوله عشان يساعده يخالط الناس ويركز في تطوير نفسه ومهاراته في فترة مراهقته. لازم تشربون قهوتكم من يد نواف داخل الكوخ الصغير اللي بانينه بالفرع.


ملك تريند الشاي في عسير، له فرعين واحد بجانب مطار أبها والثاني في ساحة قصور أبو سراح التاريخية. كل فرع لهم يعطيك تجربة وجو مختلفين، ولكنه اشتهر بفرع طريق المطار اللي أرضيته كلها حجر وكأنك تشرب شاهيك على مطل، ورغم إنه كان تريند بسبب تصميمه الداخلي الغريب للبعض، لكنه للآن ما ينافس إلا نفسه. دكة شاي موب بس شاي، يقدمون فطور ومخبوزات لذيذة على مدار اليوم، تقدر تطلب لك مع الشاهي بيتزا أو سمبوسة جبن أو عريكة، قائمة أكل تقدر تفطر وتتغدى وتتعشى فيها.

عندهم جلسات شعبية خاصة مع شاشات تقدر تتابع فيها المباريات على رواق، مثلًا تقدر تتابع مع أخوياك مباراة أبها والهلال يوم ١٤ أغسطس، وتحتار مين تشجّع.. حنا في كلماشي نشجّع المنتخب السعودي.


المعروف لا يعرّف.. في كل مكان بالمملكة لهم خطوة، وذي المرة خطوتهم وصلت لأبها، بأجمل فرع لهم ممكن تشوفه عينك.. ليه؟

لأنه ببساطة متناسب مع بيئته، استخدامهم للأحجار وخشب العرعر في تصميمهم الداخلي يخليك تكمّل رحلة الاندهاش العسيرية حتى وأنت تتقهوى داخل أربع جدران، واحد من المقاهي الرائعة اللي ما تعزلك عن محيط وروح أبها، لكن تزيد تواجدك فيها.

كانقرو هو اللاعب المحترف في هذي اللستة؛ لأنه في قرية طبب اللي تبعد نصف ساعة عن أبها. السؤال: هل يسوى تمسك خط نص ساعة عشان كانقرو؟.. الجواب: عطنا سبب مقنع ما يخليك تمسك خط لكانقرو؟، شباب طبب مميزين جدًا رغم صغر قريتهم إلا إنهم يخدمونها بإبداعهم، في اللستة الماضية (جدول الصيفية في أبها) تكلمنا عن كوخ السرو اللي سواه أحد أبناء القرية، والآن كانقرو كافيه بتصميمه المميز اللي يشبه طبيعة القرية لدرجة لو شفته من برا بتحسبه بيت من بيوت أهلها، عشان كذا صار كانقرو بيت أهل طبب الثاني.. يقدمون فطور وبرنش مع جلسات خارجية  تطل على مزارع القرية. 



هذي كانت لستتنا الثانية عن أبها، حرصنا إنها تكون قائمة للمقاهي اللي تعطيك تجربة عظيمة تزيد ارتباطك في أبها قبل تزيد ارتباطك بالمكان نفسه، سواء بجلساتهم الداخلية والخارجية أو حتى بأصحابهم الرهيبين اللي منها وفيها.

أخيرًا، لو ما قريت لستتنا الماضية (جدول الصيفية في أبها) فاتك حنيذ علي رمزي اللي يوديك للفضاء، ومطل السحاب اللي بتاخذ فيه أول غفوة تبعد ٢٨٠٠م عن سطح البحر.. ولو ودك تعرف كل أماكن وفعاليات موسم عسير تقدر تشوف الدليل الكامل لهيئة السياحة.


شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

مطاعم الرياض تكشخ فيها

وش تقرأ من معرض الكتاب في الرياض؟

القهوة تقول للشاهي: يا عمّي