العشر الأواخر وقت السلطة

تاريخ النشر 2023-10-30

صارت.. رمضان الكريم عدّا بسرعة واليوم الخميس هو أول يوم في العشرة الأواخر، في كلماشي نتمنى من كامل قلبنا انك استغليت الشهر هذا زين، وكسبت حسنات قد ما كسبت كيلوغرامات. 

ليه نقول انك كسبت كيلوغرامات؟ سهلة: حبّة السمبوسة اللحم الوحدة فيها ١٦٠ سعرة حرارية. كم سمبوسة أكلت؟ كأس التوت فيه ١٦٥ سعرة حرارية، كم كاس توت شربت؟ 


لا تشيل هم، لا تقلق، لا تفصل ثياب عيد جديدة، العشر الأواخر فرصة لك تزيد حسانتك وتنقص كيلوغراماتك.. لأن 

العشر الأواخر وقت السلطة.

توضيح بسيط.. 

الفريق اللي يشتغل على كلماشي أغلبه جاي من قطاع الدعاية والإعلان، سوّينا كلماشي تحت هدف اننا نقدم محتوى مختلف يحترم المتلقي.. عشان كذا قررنا اننا ما نعلن للمطاعم أبدًا في لستة من كلماشي، عشان يضمن القارئ ان المنتج اللي قاعدين نمدحه هو منتج جربناه وحبّيناه. 



نبدأ بالثقيل؟ لا.. نبدأ بالخفيف:

المطعم الأول:

إذا ما تحب البامية قرارتك بالأكل غالبًا غلط، غالبًا أنت من النوع اللي يحط كتشب مع البيض المقلي، أو يصب الحليب قبل الكورن فليكس. وقّف، انضج، وحبّ البامية لأن البامية تعطينا طمأنينة، وتعطينا طعامة، وتعطينا أمان.. بس في السلطة هذي البامية تعطينا ميزة جديدة: القرمشة.

سلطة البامية المقرمشة من PLEnty slds

مطعم بلنتي هو مطعم جديد في حي المحمدية الرياض، عنده سلطات جديدة ولذيذة زي سلطة البامية المقرمشة وسلطة السلطعون المقرمش واختراعهم الجديد اللي يسمّونه زلطة لولو. 

وإذا ما عجبتك السلطة ترا عندهم  بار للسلطة، تقدر تروح بنفسك وتتخيّر المكونات اللي تبيها. 

المطعم الثاني:

المطعم الثاني يقدم سلطة بشكل آخر، النوع اللي يصير قطعة دجاج كبيرة بين خبزتين وخس. أوكيه، المطعم الثاني ما يقدم سلطة.. يقدم ساندوتش دجاج بس برضو صحّي. 

ساندوتش هاوس تشكن من توم توم

نظرة بسيطة على شعار المطعم تعلمك انه للحين عالق في التسعينات.. بس هل هذا شيء سيء؟ أبدًا.. مفروض نحترم المطعم اللي يهتم بالمنتج حقّه أكثر من شكله، وهذي ميزة توم توم وساندوتش الدجاج المشوي عندهم له سنين وطعمه ما يتغير بفروعه الـ ٢٨ كلها. وش السر؟ الوصفة السرّية حقتهم اللي يوم سألناهم عيّوا يعلمونا وشّي. (تحليلنا للموضوع: عشان كذا هي سرّية) 

بس هل هو صحّي؟ الساندوتش الواحد فيه ٣٩٠ سعرة حرارية بينما لو نقارنه بس بالبيق تيستي من ماكدونالدز مثلًا اللي فيه ٩٢٢ سعرة حرارية يثبت لنا الساندوتش هذي انه صيغة ثانية من السلطة. 

المطعم الثالث:

مزرعة الجريبان العضوية هي وحده من أوائل المزارع العضوية في المملكة، تقع المزرعة في محافظة البدائع وعلى بعد حوالي ٢٠ كيلومتر من قصر عذلة التراثي. وشلون تذوق محصولهم؟ رح للمطعم هذا -> 

منتجات مزرعة الجريبان في tree house cafe

مطعم/مقهى تري هاوس يستخدم بالعموم محاصيل وطنية وبالخصوص محاصيل مزرعة الجريبان العضوية، المميز في هذا المكان هو التنوّع اللي يصير في أطباقه على حسب مواسم المحاصيل، عنده  منيو للخريف، ومنيو للربيع.. موسم البرتقال في العلا؟ تلقاه يقدم عصير برتقال العلا. موسم الفراولة بالقصيم؟ تلقاه يقدم سلطات بفراولة القصيم.

شكرًا لوقتك! هذي سادس لستة لنا وبكذا نكون ختمنا الموسم التجريبي لكلماشي. الموسم الجاي بيجي أقرب مما تتصوّر، وفيه لستات غريبة عجيبة عن مدينة الرياض زيّ: 


كيف تكون فيغان وسعيد بالرياض؟
السعوديين يتقهوون أكثر من الازم.
مطابخ رز تجمّل بكل عزيمة. 

شارك هذي اللستة

التعليقات


لا توجد تعليقات
عطنا رأيك

تبي تقرأ لستات ثانية؟

مشروبات صيفية لمحاربة شمس الرياض

أفضل ١٥ مطعم في مدينة الرياض

فعاليات خميس كامل بأقل من مية ريال