القصدير. عنصر كيميائي ينتمي لمجموعة الكربون في الجدول الدوري، اكتشفته البشرية وبدأت تستخدمه في العصر البرونزي، ورجعت تكتشفه المطاعم السحابية في الرياض السنة هذي ورسميًا دخلنا في العصر القصديري، في الوقت اللي تقرأ فيه هذي اللستة بالأغلب فتحت ٣ مطاعم سحابية تقدم برقر قصدير، وكلهم فكروا ان فكرتهم محد فكر فيها إلا هم. 

في اللستة هذي ما راح نتكلم عن المطاعم السحابية، لأنها مملة. لأي درجة مملة؟ لدرجة انها مهب على السحاب زي ما يقولون لنا.. تراها خدعة! اكتشفوا فريق البحث والتقصي عندنا في كلماشي ان المطاعم السحابية هي مطاعم موجودة على الارض وفي محلات عادية! 

طيّب وشّي لستة العصر القصديري؟ 

هي لستة تدوّن ألذ الأكلات اللي ملفوفة بقصدير. ليه؟ يمكن لأن خلصت أفكارنا، ويمكن لأننا نبي أيّ سبب يخلينا نمدح برجر تسالي.. بس للتوضيح، القصدير ما ينوكل، القصدير هو بس غلاف للأكل، يحافظ على حرارة الأكل ويعطيك لمعان رهيب يورّيك انعكاس وجهك وأنت جوعان وتتشهوى اللي يحتويه. 

حاويات المهملات في الرياض مليانة قصدير، بعدما اجتمعوا قطاوة الشارع وتناقشوا فيما بينهم يبحثون عن الحقيقة الغائبة والأسباب اكتشفوا ان السبب الرئيسي هي بوفيّات البرقر. البرقر المشوي هو مثال على هذه البوفيّات. يقدّم برجر مشوي متقصدر له طعم مميّز جدًا لأنهم بعد تحضير يكبسونه بالكبّاسة وهو جوّا قصديرته، مما يدبّل حرارته ويذوّب جبنه ويحسّن طعمه. 

مين خولة؟ محد يدري، بس برقرها لذيذ. هذا المحل الصغير في حيّ الوادي هو بوفيّه ثانية من بوفيّات البرقر المشوي.. اللي يميزها هو انها في شمال الرياض، وانها تفتح وتقفّل على مزاج عمالة المطعم. 

هذا البرقر قد ما يكون ألذ برقر بالعالم، بس له طعم مميز جدًا، إذا ذقته مره فأنت تبي تقول: اوه لذيذ. بس بعد ست شهور بعد ما تنسى طعمه وتنسى انك رحت له اساسًا تبي تتشهواه بنص يوم عملك، وتبي تحتاج تروح تأكله.. الحين. 

يعني هذا برقر انت ما تبيه.. انت تحتاجه.

عندنا قاعدة: المطاعم الجديدة اللي تسوّي نفسها مطاعم قديمة هي بلاشك مطاعم لحظية، تجي وتروح مع الهبّة، وبتختفي بالسرعة اللي ظهرت فيها. فمطاعم زيّ كذا ما تستاهل نتكلم عنها لأنها بالأغلب يتغير مستواها من الوقت اللي نكتب فيها اللستة للوقت اللي ننشر فيها اللستة. 

لكن هذا المطعم اثبت لنا عكس ذلك: بدأ كمطعم هبّة لكن استمر كمطعم لذيذ عمومًا، والشاهد: طلاب جامعة الأمير سلطان وهم يتجمعون حوالينه يأخذون برجر قصدير وبطاطس بمايونيز وكتشب ورشّة كمّون مع بهارات الكاري.

اذا كنت مستغرب من هذي اللستة، وفي بالك ان تغليف الأكل ما يفرق بطعمه فأنت مخطئ تمامًا! 

الشاهي ألذ اذا كان ببيالة قزاز، والكتكات أطعم اذا كان ملفوف بقصدير.. والكولا ألذ مليون مرّه اذا كان بعلبة قزاز. 

ليه؟ بالنسبة لعلب الكولا فالموضوع علمي: العلب المعدنية فيها بوليمرات تمتص اجزاء بسيطة من نكهة المشروب، بينما القزاز هو مادة اكثر خمول من الالمنيوم أو البلاستيك، فإذا شربت من علبة قزاز أنت تشرب كولا كاملة بنكهتها الطبيعية. 

وبالنسبة للشاهي فالموضوع نفسي، عينك تشرب الشاهي قبل لا تشوفه. علميًا اذا بتشرب كوب شاهي في كأس أحمر فهو بيصير اكثر حلاوة من كوب شاهي أبيض.. لأننا لا إراديًا نربط الألوان بالنكهات في عقلنا، والدراسات تقول ان اللون الأحمر ينربط بالعادة مع الحلاوة.

وبالنسبة للكتكات فهو سبب تافه، اذا ما تدري: فيه اشاعة قد انتشرت بالرياض ان كتكات لندن ينلف بالقصدير والناس صاروا يكشخون فيه. حاجات غريبة. 

نرجع للستة؟ نرجع لللستة. مليت من برقر القصدير؟ طيّب الحين بنغيّر: هذي مطاعم تقدّم أكل لذيذ جدًا ملفوف بقصدير ومتنوّع. 

حيّ الشميسي هو واحد من الأحياء التاريخية والعريقة في الرياض، سمّى بحي الشميسي نسبة لمزارع أسرة الشميسي الكريمة الي كانت تتوسّط الحيّ، الحيّ هذا طلّع لنا أجيال مختلفة ورموز سعودية مثل الفنان التشكيلي سعد العبيد ووزير الإعلام السابق عواد العواد ولاعب كرة القدم عبدالله الجمعان.. شيء ثاني يجمعهم ببعض؟ كلهم على الأغلب قد أكلوا في هذا المطعم.. ريم الشميسي. 

هذا المطعم يقدم شاورما نسمّيها شاورما جنوب الرياض، وهي شاورما دجاج بخلطة البقدونس، وطبعًا يلف الحجم الكبير منها بقصدير. برضو المطعم يستاهل جائزة أجمل سيخ شاورما بالرياض، خاصة اذا زرته وقت المغرب ونور الشمس يتلاشى من المكان ويطلع النور السيخ العظيم هذا. 

اطلع من الشميسي ورح للفاخرية عند هذا المطعم اللي توسّع مؤخرًا.. للمحل اللي بجنبه. فايندنق سوشي هو مطعم صغير بدأ كحفرة في جدار، واليوم صار السفر له من شمال الرياض واحدة من الفعاليات المفضلة لنا في كلماشي. 

بدأ بمكان صغير جدًا فيه الشيف لورنس يتعب ويلف ويشتغل بس الآن مع توسعه الأخير صار مكان دافئ تقدر تتناول فيه اللي تحبه من السوشي والماكي والساشيمي وغيرها كثير من المطبخ الياباني، بوصفات سعودية. بس ليه حاطينه في لستة القصدير؟ لأنهم يخبزون بعض رولات السوشي بالقصدير مثل رول الدراقون فليم اللذيذ جدًا.

هل هذا فود ترك؟ ايه.. لا؟ يمكن. هذا مطعم متكامل من مجموعة شاحنات.. فيه الفود ترك، وفيه الباص اللي داخليته صارت طاولات تمكّن الزوار من تناول الطعام في المكان الساحر هذا. 

قدروا يحولون مساحة أرض افضية لحيّ شعبي مصغّر، ثلاثة تركّات تكمّل بعض وتحضر واحدة من ألذ المكرونات بالرياض اللي يغلفونها ويحضرونها بالقصدير.