تجهيزات العروس في الرياض

تاريخ النشر 2023-06-22

جت الإجازة الصيفية وبدأ موسم الأعراس في السعودية، هذا الموسم اللي يبحلون فيه المعازيم بفساتينهم عشان ما يشوفونهم حمولة سارة خوال موضي مرتين بعرس السليمان وعرس العلي، وتبحل العروسة بأشياء ثانية بنتطرّق لها بهذي اللستة. 


ليه قاعدين نسوّي لستة لتجهيز العروسة؟ خلصت مطاعم الرياض؟ لا. بس قلنا ننوّع بالمحتوى ونكسب أجر المعاريس الجدد. 

طيب واذا كنت رجل؟ عندنا لك تقرير بيطلع بكرا عن تمويل الزواج، تبي تحتاجه إذا اختارت شريكة حياتك أيّ الأماكن المذكورة في اللستة. 

القاعة

الزواج مكلف اقتصاديًا، وأحد أهم أسباب هذي التكلفة هي القاعة، سيدة الليلة، إذا زانت زان عرسكم.

خيار كلاسيكي راقي يجمع بين العراقة والخبرة وبالنهاية.. "تواجه".

السعة الاستيعابية للقاعة: ٣٥٠ بتكلفة تقريبية ٦٠٠ ريال للشخص مع العشاء. 

نيّارة أقاموا أكثر من ١٠ مليون زواج.. مب مخطين بزواجك. 

أحلى شيء فيه أنه بيقلل عليك خساير الديكور لأن ديكوراته مذهلة، الحمامات والمرافق جميلة جدًا ماتحتاج فلسفة كثير كم مزهرية ورد وصل الله وبارك. في حال حبيتي بعض الفقرات تكون خارجية في الهواء الطلق.. يجي. 

 

وبما أن المنتجع فندقي من الممكن الأقارب أو أهل العروسة ياخذون لهم شاليه جنب شاليه العرس ويتزينون فيه. 

سعر شاليه أنيق يأخذ ٤٠ شخص يبدأ من ١١ الف ريال 


السر لزواج ونيس ومافيه نفسٍ ثقيلة ومايكلف هو أنه يكون: عائلي. 


الـ إيڤنت پلانر

من مميزات أنك تجيبين إيڤنت بلانر( منسق فعاليات) قوي وفاهم هو أنك مايحتاج تخوضين بتفاصيل زي العشاء، الكيكة، الزفة، التقديمات والصبابات، هذه كلها أشياء تنطوى بداخل الباقات اللي يقدمونها مصممين ومنظمين الحفلات زي: 

احدى صديقات كلماشي وصفتهم وقالت: لو تبين المريخ بعرسك بيجيبونه لك. 

الميزانية ست أرقام صحيح.. لكن فيه مميزات: عرسك بيتذكرونه الشعب أجمع، عيالك بيقولون ليتنا حاضرين عرسك يا يمّه، انبهار لا نهائي من الحمولة. 

عن فهم المحلّي للمحلّي نتحدث، لأن المالك لهذه الشركة بنت سعودية ذوق، وتقدّم خيار أنيق لأنه بيقلبون لك القاعة لشيء ما تتوقعينه: لعبتهم الاضاءات وتوزيعها وتصاميمهم غير مكررة. 


في حال ما كانت الخطة صرف رقم مكون من ٦ خانات ننصحك بهذا الخيار: 

شخصيًا اللي كتبت هذي اللستة سوت زواجها والدعوات عندهم: وش يحتاج الواحد غير شيء مرتب ويشبهه ولطيف على الميزانية؟ إذا رحتوا لهم اسألوا عن "بكر" سنع بيعجبكم.. "وله فزعة عند الملاقى عجولة"على قولة الشاعر ياسر التويجري.

الفنانة

كان ياما كان.. كانت فنانة الأعراس تتسمى طقاقة، عفى على هذا الفن الزمان.. وهنيّا لمن انطرب فيه وذاقه. 

- ملكة الأعراس السعودية

الأسم مارأينا فيه حاجة لإشهاره لأنه أشهر من نار على علم، أول أغنية تنطلب منها لمواليد التسعينات: حبة حبة 

ولجيل التيك توك: قفلوا باب المشاريه. 

حتى لو غنت بالجو غيم لمحمد عبده، الضيفة راقصه راقصه. 

لايوجد تسعيره واضحة لإحياء الفنانة القديرة الزواج ولكن المبلغ لا يقل عن ١٠٠ ألف  

- أميمة طالب

في حال كان ذوق العروسة مودرن ويميل لأنها تحب أغاني عبدالمجيد عبدالله الجديدة 

أميمة طالب خيار ممتاز، شخصيتها بالأعراس ونيسة عمومًا وصوتها بالخليجي لايعلى عليه. 

خيارات اقتصادية:

وفي طيّات الرياض فنانات كثير رهيبات، لعبتهم الزواجات 

ولكن الحظ ما أنصف عامل الشهرة في حياتهم .. 

- الفنانة حنان

صوت رهيب وشخصيتها "الحي يحييك" 

نوصّي أنكم تطلبون فرقة معها مو بس إيقاع 

كود الخصم: من طرف فوزانه 


أرقام تواصل: 

+966557493126 


+966566395750 


المصورة

شرط المصورة بالزواج أن تكون نفسيتها حلوة ماتكشر بوجهك إذا ما مشى شيء على مزاجها 

بالعكس تمشي مع الظروف وتضبط الأمور وتبعث في العروس أجواء راحة وطمأنينة ووسيعة صدر بالمجمل 

من واقع تجربة عدة صديقات.. لقينا المصورة اللي تنطبق عليها المواصفات أعلاه مع إحترافية عالية بالتصوير والإلتزام بالوقت 

تسنيم السلطان هيّ مصورة زواجات عالمية سعودية حازت على جوائز عالمية لتصويرها التوثيقي. 

اللي يميزهم غير اللي ذكرناه، أن الباقات عندهم متنوعة والخيارات كثيرة من ناحية عدد الصور وساعات التصوير والأسعار ايضًا. 

فستان العرس

نظريًا، هو فستان الليلة الواحدة (حتى لو أعرستي مرتين لاسمح الله منتيب عايده الفستان) هل ممكن تنفقين عليه فوق ٣٠ ألف، نعم ممكن.. وبدون تفكير ولا يحتاج اقتراحات إيلي صعب هو خيارك الأمثل لأن فساتينه تسوى كل ريال من ناحية الجودة. 


لكن برضو إسماعيل (خيّاط فساتين زواج من أكثر من ٢٥ سنة في أسواق مكة) جودته كويسه لو أخذنا بالحسبان موضوع الليلة الواحدة. كل اللي عليك تجيبين صورة لفستان عاجبك بشرط عدم المبالغة بالتفاصيل ورفع سقف التوقعات بالتنفيذ. 

تتراوح أسعار الفساتين عند إسماعيل من ١٥٠٠ ريال وحتى ٤٥٠٠ ريال.. نسبيًا معقول 

أسم المحل اللي يعمل فيه إسماعيل في أسواق مكة: دنيا الأفراح.

الكعب

تنبيه: نرجوا من العروس القارئة مراجعة طول زوجها المصون قبل إختيار الكعب حتى لاتخدش رجولته في الزفة. 

خيارات حلوة لكن غير مريحة:

- جيمي شو كولكشن العروس

يتميز هذا البراند بتصاميم مرصعة باللؤلؤ والكريستالات مع مزيج الساتان الأبيض، تناسب لون فستان الزفاف وتطفي طابع أنثوي للطلة. تبدأ الأسعار من 3 آلاف ريال تقريبًا.. لكن من النهاية، من بيشوف الكعب غير المصورة اللي بتصوره جمب الخاتم والطقم يعنني حركة؟ لأن غالبًا الفستان يغطي الكعب بالكامل..


خيارات حلوة ومريحة وتستخدم حتى لبعد العرس:

- سان لوران كعب الدبابة المعروف (بلاتفورم)

الكعب هذا لا يخلو منه أي بيت سعودي فيه وحده اسمها العنود 

لكنه بشهادة الكثير من العنود وريم والهنوف، أكثر كعب مريح ويرزّ وله استخدامات عديدة خصوصًا لو كان لونه نود 

يبدأ سعره من 4000 ريال حسب اللون وطول الكعب. 


وإذا كنتِ للآن صاملة على البقاء داخل حدود الميزانية ترى أي كعب من ASOS يكون موديله بلاتفورم ولونه يناسب يفي بالغرض والأسعار تبدأ من 100 ريال والتوصيل خلال اسبوع الى اسبوعين بالكثير. 

الميك أب آرتيست

 هذه الميك أب آرتيست الموهوبة اعتمدتها الممثلة نور الغندور للوكاتها بالرياض 

قوية صح؟ الأقوى من كذا لوكات العروس اللي تسويها ونفسيتها الحلوة. 

الميك اب ارتست لطيفة بالدمج ما عندها يمه ارحميني

لوكاتها ناعمة وتطلعك احسن نسخة من نفسك كما قالت احدى الصديقات 

لكن بالمواعيد.. يبيلك تصفّين لاين لأن أقرب موعد ياخذ بالشهور.  

من ٦ سنين.. ندى ميك اب ارتست بدت مسيرتها بالمجال، مرت عليها جميع الملامح ومختلف ستايلات وترندات الميك اب 

سعر خدمة ميك اب العروس عندها 2000 ريال وهذا يعتبر أقل بكثير من متوسط السوق اللي يبدأ من 3000 ريال 

المشكلة الوحيدة أن ندى إنسانة وسيعة صدر وضحوك وممكن العروس من كثر الضحك تسيّح الماسكارا، ولكن هذي إيجابية برضو لأن من يبي ميك اب ارتست تكشّر بوجهها؟ 

الهير ستايلست

المجال اللي مازال يكتسحه أخواتنا من الجنسية الفلبينية، ولكن دخول السعوديات فيه أحدث نقلة نوعية في فهم طلب العروس ورغباتها. 

 متخصصة في لوكات العرايس، اعتمدوها أغلب العرايس اللي زواجاتهم كانت بنيارة الفترة اللي فاتت 

متمكنة في مسألة يندر التمكن فيها وهي ثبات التسريحة vs أن شكل التسريحة مايطلع لاصق من كثر السبراي. 

ملتزمة بالوقت.. شغلها أسطوري.. لكن نسقي معها مبكر 

أكبر مدحة ممكن تجيك بعد ماتسوين شعرك مع منى.. "ماشاء الله كنك لبنانية؟" 

مدحة تسعيناتية بامتياز لكنها تقول اشياء كثير بكلمة وحدة.. ولا هو قصورٍ بباقي الجنسيات.

هذا الخيار للعرايس اللي عادي عندهم يطلعون بيوم عرسهم وفارق اللوكيشن مايسبب لهم توتر 

مشغل قطرة ندى من أقدم المشاغل بالرياض.. زباينه من كل الطبقات والجنسيات 

وريهم الصوره والباقي.. هم ابخص 

لكن إذا كنتي العروس يُفضل أنك تحجزين معهم قبل لأن يوم الجمعة الوضع هناك يا تلحق ياما تلحق 

خدمة تسريحة العروس عندهم ٨٦٣ ريال 

نصيحة جانبية: احجزي مع أخصائية الشعر "استر". 



في النهاية، ايش ماكان ترتيبك للعرس كبير أو عائلي، هذي فلوسك وفلوس زوجك، اصرفيها بالشكل اللي يناسبكم 

فستانك من إيلي صعب ولا إسماعيل سوق مكة.. مايهم، المهم أنه يومك.

انبسطي فيه بالطريقة اللي أنتِ تبينها، قولي لهم يجيبونك لك شاورما ماما نورة، فكّي الرسم وارقصي ماكرينا قدّام الحمولة. 


الاتيكيت اللي مايناسب توجهك وسعادتك.. سوي له سكب، ترى ماهو زفاف ملكي بريطاني، عادي تعطينها رقصة بعد الزفة 

عادي تضحكين بالصور من قلب وتطلعين أسنانك. 


وعادي تعيشين هاليوم بكل حواسك.. عشان تتذكرينه العمر كله: وألف الصلاة والسلام عليك ياحبيب الله محمد. 


شارك هذي اللستة

التعليقات


ههههههههه

قبل ٣ أشهر - abdullah

صدق صدق صدق ما ندمت اختياري ناردين كان زواجي في قاعة التخصصي واخذت موعد مع الاستاذ بكر ونصحني نذمة وما ندمت لحظة على اختياري له وما ندمت اني استعنت في نصيحتكم لنا عن ناردين ويدينق

قبل ٨ أشهر - رغد

ياخي لستاتكم تجنن ودي اشتغل معكم كان احد قاعد يسولف علي اشكركم بصراحه ونستوني وانا ما تزوجت اصلا ههههه

قبل عام واحد - sara

صراحة تعاملت مع ناردين ويدينق قبل اربع سنوات تقريبا والاستاذ بكر من جد يبرد القلب ويسهل الامور ويساعد بطريقة لا توصف

قبل عام واحد - Maha alkharegi

الرتز كارلتون كم سعر قاعته

قبل عام واحد - WA

نبي لستت ملكة عائلية بالبيت 👏🏻

قبل عام واحد - معلق سري

يعطيكم العافية ، عطونا قاعات زود وتكون مجربة والناس اللي فيها ثقة. وودنا مواضيع أكثر مثل هذي موسم الزواجات مطول.

قبل عام واحد - سالم

مره تجنن كانه احد يسولف قدامي مره حبيت كثرو من هاذي الاشياء 😂🤍

قبل عام واحد - ريما

اللسته جت في وقتهاااا

قبل عام واحد - 👰‍♀️

خياااال

قبل عام واحد - ديمة

شكراً لكم على ام المجهود ، زواجي قريب واحتاج اشياء كثيييير احبكم ❤️❤️❤️

قبل عام واحد - لموشي

الجازي الغفيلي ميكب و شعر خيااال ❤️‍🔥❤️‍🔥❤️‍🔥

قبل عام واحد - .

تجنن اللستة بتزوج بدون عريس أهم شي الوناسة

قبل عام واحد - تزوجت مرتين وتطلقت

الصدق كفيوتو ووفيتوا، فيه قاعات كمان متوسطة ومنتجعات حلوه مثل نوشين يبين فيها الشغل رغم صغر حجمها ، سنترا ايضا، تصلح لعدد ٣٠-٥٠ ، اوشا تعطي لوكيشنات تصوير عروس رائعة، فوكو و الموفنبيك لو الزواج كبير الشغل فيها يطلع تحفه 😍

قبل عام واحد - اريج ابراهيم ميك اب ارتست

الله يسعدك

قبل عام واحد - .

وش هاللسته الذربه😋 الله يوسع صدوركم يارب وعقبال العزابية💃

قبل عام واحد - النوفي

اللستة روعة 😂 للاسف لينا فهد ماضبطت لي شعري 🥲 الثبات في وادي و التسريحة في وادي .. الحمدلله بس 🫠

قبل عام واحد - عروسة ٢ جون

استمتعت بالفكرة والمحتوى وقرأتها بدون ملل بالنسبة لتجربتي في زواجي كان الميك اب والشعر في صالون ديسمبر كانت طله ولا اروع وتصويري كان مع المصورة اسماء عياد على ان زواجي عدى عليه سنه ونص لكن الى الان وانا كل شويه احط صوره من تصويرها لي خلفيه جوالي واستمتع وانا اتفرج عليها واتمقل فيها مبهوررره بقققوة ومحد عنده رايين في اخلاقها وحسن تعاملها ولطافتها

قبل عام واحد - امل محمد

اللسته حلوة وخفيفة دم الصراحة بشارك معاكم بالهير ستايلت غادة وثريا الموسى والارتست الفنانة رانيا لمساتهم على الفنانات منهم ملكة الاعراس السعودية ومشاعل وداليا مبارك وتهاني السلطان تعاملت معهم يجننون اللسته خفيفه لطيفه ممتعه اهنيكم واستمروا بالابداع 😍👌🏽👰🏻‍♀️💃🏽

قبل عام واحد - Noreen

يالله ! وش كثر استمتعت وانا اقراء مع اني من القصيم ولا راح يفيدني كل المكتوب ، ولكن طريقة السرد والتسلسل شي رهيب دمعت من الضحك ، ادمنننت نبي فقرات أكثر

قبل عام واحد - ريماز

منيو الزواج و دهرته بتكون من عندكم، يعطيكم العااااافية يا إخوة.

قبل عام واحد - Jumana

اقتراحاتك خيااال ليييت يصير فيه قائمه مفصله اكثرر 😍😍👍

قبل عام واحد - Sara

يعطيكم العافيه والله، شرح ذكي و مبسط و يعطيك الزبده وهذا المطلوب

قبل عام واحد - Leena

كنت من عرايس الارتست الجميلة إيمان المطيري اتوقع من اقدم الارتست في هالمجال من بعدي ٧ من اقاربي عندها مبدعة وشغلها راقي خلوقه وراقيه والاهم من هذا كله حريصه على المواعيد هذه لازم تكون من ضمن اللسته تخصصها عرايس وتستحق الدعم والتقدير هذا اكاونتها eman_makeup1

قبل عام واحد - غادة العتيبي

تجنن اللسته و التصميم حق الصور هو الي حمسني ادخل واقراها ، زعلت ليه ماحطو الجوهره مع العنود والهنوف! عندي الكعب ترا 😏، عموما تحمست اتزوج موفقين يارب❤️

قبل عام واحد - Aljawhra

بليييز كثرو من الاشياء هاذي ونوعو مع المطاعم 😂 الاسلوووب خيال وخفة دم مو عاديه

قبل عام واحد - Noura
عطنا رأيك

تبي تقرأ لستات ثانية؟

القهوة تقول للشاهي: يا عمّي

نهاية أسبوع في الخبر

رحلة تاريخية، في الأراضي الحساوية