بنبان، محافظة من فئة (ب) شمال الرياض، وسنويًا الرياض مع توسعها شمالًا تقرب من بنبان أكثر. لكن في شهر ديسمبر الرياض كلها تروح بنبان. ليه؟ عشان يحضرون ساوند ستورم.

ساوندستورم هو أحدث الظواهر الثقافية اللي غيّرت في نمط معيشة أهالي الرياض والمملكة: احتفال موسيقي ضخم مشابه للمهرجانات العالمية مثل مهرجان تمورولاند في بلجيكا و كوتشيلا في أمريكا. 

في هذي اللستة مجموعة من النصائح اللي تجهزك تروح لساوندستورم.

ساوندستورم هو مهرجان موسيقي كبير يقام ضمن فعاليات موسم الرياض، في كل سنة ساوندستورم يجي بمفاجآت جديدة وحجم أكبر.

ساوندستورم ٢٠٢٢ فاز بأكثر من عشر جوائز عالمية، أهمها كانت الجائزة البلاتينية من جوائز ميوز الإبداعية. 

ساوندستورم هو من ضمن فعاليات مدل بيست، اللي تعتبر أبرز منصة لثقافة الموسيقى في المنطقة. الموسيقى كانت دائمًا حيّة في المملكة العربية السعودية لكن خلف البيبان وبشكل سري عالي الخصوصية، المشهد المتحفّظ هذا حوّل طاقات فنية كبيرة من الشباب السعودي لحالة من الخمول، لكن اليوم المسارح مفتوحة للعامة، والكل يقدر يشوف مواهب عالمية ومحلية قدام عيونه.  

 وش جوّك بالأغاني؟ روك اند رول؟ ميتاليكا جايّين يوم الخميس.

خليجي؟ أميمة طالب فيه.

ويز كيد، دش داش، مشعل، تيستو، عمر دياب.

كل هذولي يطلعون يوم الخميس.

أما يوم الجمعة فيه ديد ماوس، كريس براون، رامي صبري، بالو، ديسكو مصر، ويوم السبت، آخر أيام ساوندستورم بيكون فيه:  داليا مبارك، كايروكي، دافنشي، نوريا وغيرهم كثير. فيه أكثر من ٢٠٠ فنان ومؤدي بيطلع في ساوندستورم السنة هذي، مهما كان جوّك، بتلقاه في ساوند ستورم.

وعشان يسهل عليك تعرف اللاين-أب وتفاصيل كل يوم.. حمل تطبيق ساوند ستورم.

فيه ثمان مسارح مختلفة في ساوندستورم ٢٠٢٣، أكبرها هو البيق بيست اللي بيحتضن فرقة ميتاليكا يوم الخميس، ومسرح الداون بيست اللي يحتضن فناني الموسيقى البديلة والهيب هوب، ساوند ستورم كبير مرة عشان كذا اكتشف واكتشف لين تضيع، وعشان تضيع وأنت مبسوط حمّل تطبيق مدل بيست، بوصلتك اللي بتعلّمك كل شيء: خريطة كاملة للحفلة، خيارات الطعام وأماكن دورات المياه عشان ما تتوهق، ارهب شي بالتطبيق إن فيه قائمة ترتبها بأوقات الفنانين اللي بتحضر لهم. 

ضروري تشحن جوالك فل قبل ماتطلع، وأيضًا تشحن شواحنك المتنقلة اللي بتتنقل بين جيوب شلتك وناس ثانين ما تعرفهم، بس بتساعدهم لأنك رهيب. وقبل ما تروح ساوند ستورم لازم تنام زين، وجب معك مطّارة عشانك بتمشي واجد، وإذا خلّصت لاتشيل همها لأن الموية متوفرة ومجانية بكل مكان. 

الهدف الرئيسي للبس في المهرجان هو لفت الانتباه. عشان كذا البس اللي تبي، تي-شيرت، بنطلون، البنطلون تي شيرت، والتيشرت بنطلون.. على كيفك. أهم شيء لا تخالف الذوق العام، لا تغطي وجهك، ولا ترسّم كأنك رايح عرس. 

ورغم حرارة الحدث لازم تعرف إن الرياض في ديسمبر قاسية شويّ وباردة جدًا. عشان كذا احرص تتدفّى كويس.

جهّز رقصاتك من بدري وتدرّب عليها، اذا كنت الموسيقى هادية والليلة بأولها فأرقص على الهادي، هز كتفك مرة يمين، ومرة يسار وحرّك يدّك مع اللحن. وإذا ولّع الدي-جي هنا تطلّع مواهبك المدفونة. عندك أنواع رقصات مختلفة اخترنا منها ثلاثة:

رقصة المقص: الرقصة المشهورة اللي كانت لعيون أبو مشاري وأبوحنّة، رقصة المقص تستلزم سيقان طويلة ومرنة وملابس خفيفة نوعًا ما لسهولة الحركة. هذي الرقصة مناسبة للديب هاوس. 

رقصة النطلة: تخيّل نفسك تهجول بإلنترا موديل ٢٠٠٩ في شارع البحري والشارع قدامك فاضي، وماعندك معزز واحد، كل اللي حولك معززين. هذي الرقصة مناسبة للتكنو.   

رقصة كريستيانو: رقصة مقتبسة من عبدالعزيز الشهري اللي كان يقلّد عرضة كريستيانو، رقصة تحافظ فيها على عاداتك وتقاليدك وميزتها إنها بسيطة ماتحتاج أي تكلّف. هذه الرقصة مناسبة لكل شيء.

قبل تحترم أحد، احترم نفسك. ساوندستورم هو مكان للجميع. انبسط، بس لا تخرّب بسطة أحد، لا تتوقع لأن فيه زحمة محد بيشوفك. الجهات الأمنية حاضرة بالمكان، ولكل ثمانية أشخاص حاضرين في ساوند ستورم فيه كاميرا، وفيه فريق أمني خاص مُدرّب على التعامل مع الحالات الصعبة. 

- حافظ على نظافة المكان، فيه عدد كبير من سلّات المهملات بكل اتجاه. 

- ارقص وغنّي واضحك مع الجميع، وحط مسافة آمنة بينك وبين الأشخاص عشان كلكم تنبسطون وانتم مرتاحين.

- بكل زاوية بتلقى شيء مُبهر تصوره، وثّق هذي اللحظات الممتعة، لكن احرص ما تصور الأشخاص بدون اذنهم. 

وإذا صار أي مشكلة في الحفلة، فيه أربع أماكن بالمهرجان مخصصة للتعامل مع قضايا الاحترام في ساوند ستورم، وتقدرون تبلغون بشكل مباشر عن أي حالة من خلال هذا الباركود. 

كلماشي تهتم بأنماط المعيشة المختلفة المملكة، وتهتم بأي شيء يثري تجربة المدن الثقافية. ساوندستورم هو مثال واضح على كيف المدن تُفعّل ثقافيًا، عشان كذا بنكون معكم في تغطية مباشرة لساوند ستورم هذي السنة، مع حلقة جديدة من برنامج "الجبيلة يسأل". 

مهرجان ساوندستورم 2023 ينتظرك! اشتر تذكرتك من هنا