ليالي الطايف

تاريخ النشر 2023-08-05

الطايف مدينة في غرب المملكة العربية السعودية تقع في منطقة مرتفعة عن سطح البحر وهذا اللي يخلّي جوها عليل. وش عندك في الويكند؟ ليه ما تروح الطايف؟ ليه ما تجرّب الشاهي الطايفي في الطايف؟ ليه ما تمسك خط للطايف؟ الطايف مدينة ما تقدر تنزل لها.. عشان تروح لها لازم تطلع فوق، جسديًا وذهنيًا. 



الطايف هيّ عروس المصايف.. أجمل وصف انقال عنها هو انها قطعة من الشام أخذتها الملائكة لتطوف حول البيت الحرام، وتاريخيًا كانت هيّ مصيف ملكي لملوك مملكتنا الحبيبة، كان المؤسس طيّب الله ثراه يقضي صيفه في قصر شبرا، والملك فيصل رحمة الله عليه يقضي صيفه في بيت الكاتب. 

الطايف ماهي بحديثة عهد على السياحة، من قديم الزمان وكل العرب يسافرون لها عشان يزورون سوق عكاظ، الفعالية اللي ما زالت مستمرة بعد ما تم إعادة احياءها قبل عشر سنوات؛ والطايف أثرت المشهد الفني في السعودية، هي اللي ألهمت العميد الموسيقار طارق عبدالحكيم انه يلحن أجمل المقاطع الموسيقية في الأغنية السعودية، وهي ردّت صدى صوت ابتسام لطفي يوم غنّت: لا تطل بالله بعدك. 

وكأن الطايف تقولك: يا سعودي، ياللي عندك إجازة مدارس، ياللي ودك تسافر، ياللي رحت للطايف وأنت صغيّر لا تطل بالله بعدك.. فليس يحلو العيش بَعدك. 

شكر خاص لعبدالله الكناني ووائل مرقص على صناعتهم لخط الطايف، هذا الخط الجميل اللّي جمّل عناوين اللستة.

في هذي اللستة بنأخذكم في جدول يومي لليلة من ليالي الطايف، نسّقها ورتبها لنا مخرجنا الفذ فيصل، ووثقها بفيديو رهيب بننشره بكرا. نبدأ من القهوة، قد سمعت عن المقهى النحاسي؟ 


المكان الأول

المقهى النحاسي كوبراري

اسم المقهى الحقيقي هو كوبراري وهو مأخوذ من كلمة Cup و Library لأن عندهم مكتبة تقدر تاخذ منها كتاب تقراه وأنت تشرب قهوتهم اللذيذة أو تستعيره منهم بعربون يرجعونه لك بعد ما تعيد الكتاب٬ وإذا بغيت تقدر تحضر أحد جلسات القراءة اللي يقيمونها في المقهى وتناقش الكتاب مع الكاتب نفسه.

أكثر ما يميز المكان هو تصميمه الكلاسيكي الجميل٬ فكرته يخليك تحس انك في بيت ريفي ويهيئ لك أفضل جو للقراءة٬ صاحب المقهى واللي صمم المكان مع عائلته يشبّه المكان بأنه يشبه ديكورات مسلسل Anne على نيتفلكيس. وبالنسبة لمسمى (المقهى النحاسي) قال صاحب المكان انه يوم حط اسم المقهى على قوقل صار يطلع لهم بالعربي بهذي الترجمة الغريبة ومن بعدها لزق فيهم الاسم بدون قصد.. وكذا تكسب الأشياء أساميها. 


المكان الثاني

حي الخالدية

المقهى النحاسي موجود في الحي الملكي٬ حيّ الخالدية، سمّي هذا الحي بالخالدية نسبة للملك خالد رحمه الله، وهو حيّ راقي فخم مليان تحف معمارية، اذا بتتجوّل فيه احرص تلبس نظّارة شمسية: لأن انعكاس الشمس على قطع الرخام الفاخر اللي تجمّل القصور قد يكون عالي شويّ.  

يصلح للتمشية برجلك أو بالسيارة٬ ولا تخاف إذا سمعت صوت أغاني وأنت ما شغلت شي٬ هذا صوت حي الخالدية٬ حيّ من كثر ماهو فخم وراقي فيه موسيقى تصويرية خاصة به.

المكان الثالث

مطعم أهلا وسهلا

ممكن تقول ان مطعم أهلا و سهلا هو نسخة مطعم ماما نورة لأهالي الطائف. لكن هل ماما نورة عندهم نافورة بوسط مطعمهم؟ إذا لا أيهم اللي فعلاً أحسن؟ ما ودنا نزعّل ماما نورة بس يا حظ أهل الطايف في هذا المطعم: المكان كبير و نظيف و كله نوافير بأنواع مختلفة. الكبيرة و الصغيرة و المصخرة و المشجرة و ثريات. و التصميم رخامي كأنك في قصر شامي مصغّر. 


مالك هذا المطعم ضابط سابق في العسكرية٬ لذلك نظام المطعم زي نظام مطابخ الميز. وش هو الميز؟ كلمة أوردية معناها الطاولة لكن عندنا في السعودية معناها المطبخ اللي ياكلون فيه العساكر في عملهم. عندهم قائمة كبيرة جداً من المأكولات من ضمنها المفاطيح و كباب الاسكندر و أنواع كثير من الحلى.

المكان الرابع

قيمز سكوير

في الطايف إذا بغيت تلعب بولينج٬ بلياردو٬ تنس٬ سوني٬ بلوت تقدر في أي وقت تقريباً لأن قيمز سكوير فاتح لين ٥ الفجر٬ وأنت هناك لا تفوتك قهوة ميرلو وخذلك كوب قهوة من عندهم، مقهى ميرلو هو مقهى سوّاه الفنان السعودي صالح اليامي.. ولهم ثلاث فروع. 

اذا اشتهيت تلعب بلوت في الطايف لازم تعرف أن أسامي أشكال الورق تختلف هناك، الهاص يسمّونه لال. 

المكان الخامس

مطعم كندة

من أكبر المطاعم في الطائف و يشمل كل أفراد وطبقات المجتمع٬ سواء كنت عزابي لحالك؟ مكانك موجود. تبي تروح مع الشباب و تشوفون مباراة ديربي الهلال ضد رونالدو؟ موجود. وإذا كنت رايح مع أهلك؟ فيه منطقة عائلية كبيرة وأماكن مخصصة للأطفال من ضمنها منطقة خاصة للرسم. قد يكون أميز طلب عندهم هو الوليمة النحاسية، وهو الطلب المحلي المميز اللي يقدم بصحن نحاسي يعلوه ثلاث طبقات من تحت إلى فوق: رز، عرايس٬ ومشاوي كِندة المميزة. 


المكان السادس

جبال الهدا

طريق الهدا أو مايسمى قديماً بدرب الجمّالة قد يكون أقدم طرق الجزيرة العربية من درب البخور٬ الطريق هذا يعود لـ١٠٠٠ سنة وكان مسير قوافل الجمال المحملة بالبضائع التجارية٬ وأنت طالع هناك بتشوف بسطات شاهي على جنب وباعة فواكة وخضروات من البساتين المجاورة للهدا، وقف عندها وخذ لك كوب شاهي أو تفكّه قبل ما تبدأ جلسة العلاج النفسي في مطل الحلواني٬ تمش في المطل٬ طلق رجلينك٬ ودوّر ورد طايفي ثم قطّف الوردة حبّة حبّة: تحبني.. ما تحبني.. تحبني.. ما تحبني.. 


المكان السابع

بيت الفطائر

من عام ١٩٩٩ وهذا المطعم يقدم أفضل شاورما بالنسبة لكثير من سكان المنطقة٬ صحيح ان اسمه بيت الفطاير وطبعاً مشهورين بالفطاير. لكن على حسب مخرج كلماشي الفذ فيصل عندهم ألذ شاورما بالعالم من دون ثوم لدرجة أنه ياكل منه كل أسبوع.

قالوا أهالي الطايف عن المطعم: "من أقدم الشاورما اللي على الفحم في السعودية." و"تبقى افضل شاورما بالطائف عيشهم لذيذ و الشاورما لذيذة"

شارك هذي اللستة

التعليقات


رواية انها قطعة من الشام وطاف عليها الملائكة (غير صحيحة) الرواية الحقيقة أن من بنى الطائف (قبيلة ثقيف )وحوطوها بسوراً يطوف بها فسميت بالطائف ونستشهد بقول الشاعر الجاهلي امية ابن ابي الصلت : نحن بنينا طائفاً حصيناً نقارع به الابطال عن بنيانا !🤍

قبل ٦ أشهر - طائف جدي الأول ❤️

اييوا فين مبشور الطايف ! و أهم مخبز في التاريخ, مخبز هدية.

قبل ٦ أشهر - طيف

الطايف في عيني تشبه كل الأغاني و القصايد اللي يُقصد بها الوطن.. مدينة آمنة، جميلة في نهارها و ليلها، اتأمل غروبها كل يوم بلا ملل أول كلل! و أنا اقرأ اللستة بتركيز و حماس شعرت و كأنني وسط هذه الأماكن و استرجع ذكرياتها.. شكرًا كلماشي على هذا العمل اللطيف و المألوف بحب عن مدينتنا الطيبة.

قبل ١٠ أشهر - أمجاد

من الاماكن الي المفروض تكون باللسته شاهي ابو وحيد وبالاضافه الى ايسكريم الشرقيه ومطل نهاية العالم هذا مكان سري مانعلم فيه احد الا حقين الطايف وجبل دكه بالشفا وغيرها الكثير واشكرك على اللسته

قبل ١٠ أشهر - هشام

نسيتُ الشفا و غزالها و الردف و غديرها و أيسكريم الشرقية و البلد ومطعم الطيبات كان ينافس أهلا وسهلا

قبل ١٠ أشهر - FAHAD

شاورما عبدالرؤوف كانت متميزه ولحقت على عزها كان يقدم شاورما شديدة اللذة وبخبز الصامولي إلى أن توفى الله صاحب المطعم وانتقلت ملكيته لأشخاص آخرون ونزلت الجودة "حسب ما سمعت لأن خبري قديم"، ومطعم المعلم فيصل المنجف خصوصًا السليق الطايفي عنده ودجاج الكوزي خيالي الي ما يجربه أثناء زيارته للطائف تجربته ناقصه بكل تأكيد وعنده بلح شام إستحالة الواحد يتخطاه ودي تعيدون الزيارة لعيونه هو لحاله. صدقوني يستاهل وختاماً آيسكريم الشرقية الغني عن الوصف، اشوف كلها من معالم الطائف الرائعة والي تستحق الزيارة فعلاً

قبل عام واحد - محمد

حبيت الطايف وانا من اهلها لكن نسيتو الشفا وغزال الشفا وتين وغيرها

قبل عام واحد - شهد

نسيتو الشفا والاجواء الحلوه

قبل عام واحد - مجهول

وين مبشور الطايف معلم من معالم الطايف

قبل عام واحد - A

احب الطايف اذا مشيت من مكة متجهة للعوالي رايحة مع طريق الكرى تجتاحني حماسة حلوة لها ابي هواء بارد ياخي ابي هواء نظظظظيف ابي طبيعة ابي مطاعم حلوة هذا غير كافيهات الشفا الجديدة اللي تستاهل التصوير. بردها سلام ❤️

قبل عام واحد - Naifh Alsulmy

اقسم بالله اني احب الطائف لانها مدينة حلوة لكن معاكم حبيتها اكثر لانكم مبدعين بكل ماتحمل الكلمه من معنى وشكرا لي المخرج المبدع اللي عندكم وصاحب الفكرة قبله ع الراس 👏🏽❤️.

قبل عام واحد - ضياء

كوبراري يفوز وبقوه

قبل عام واحد - المهلهل

رهيب رهيب كل من قام على جمال الفيديو واتمنى اشوف مقهى ترحال جزء من جمال التصوير لانه قريب ع القلب هالمكان من لذاذه وقصه ك وجهه ف الطايف مميزه 🧡🧡🧡

قبل عام واحد - غاليه

نسيت افضل محل شاورما بالطائف الي هو شاورما عبد الرؤوف

قبل عام واحد - R

اشكركم على هذه اللستة وعلى فكرة مطعم بيت الفطاير يبغاله مزاج عالي

قبل عام واحد - حازم الثبيتي
عطنا رأيك

تبي تقرأ لستات ثانية؟

أفضل ١٥ مطعم في مدينة الرياض

وين تأكل برنش في الرياض؟

وش تأكل بالعصر القصديري؟